ʻOku Tāpuekina Hoku Familí ʻi Hono Moʻui ʻAki e Ongoongoleleí

Ako lahi ange ki he kaveinga ʻo e Palaimelí ki he māhina ní!

Ko e hā ha niʻihi ʻo e ngaahi tāpuaki kuo foaki atu ʻe he Tamai Hēvaní? ʻOku faingofua e ngaahi tāpuaki ʻe niʻihi ke sio ki ai, ʻo hangē ko e māmani fakaʻofoʻofa naʻe fakatupu ʻe he Tamai Hēvaní pe ko ha tuongaʻane foʻou pe tuofefine ʻi ho fāmilí. Ka ko e taimi ʻe niʻihi ʻoku fie maʻu ke ke tokanga ke fakatokangaʻi ʻa e ngaahi tāpuaki ʻa e Tamai Hēvaní. ʻI he talanoa ko ʻeni kau kia Nīfaí, vakai, pe te ke lava ʻo kumi ke ʻiloʻi ʻa e ngaahi tāpuaki naʻe foaki kia Nīfai mo hono fāmilí koeʻuhí naʻa nau moʻui ʻaki e ongoongoleleí. (Te ke lava foki ke lau e talanoá ʻi he 2 Nīfai 5.)

Naʻe fakatokanga e ʻEikí kia Nīfai ke ne ʻave ʻa hono kakaí ki he feituʻu maomaonganoá koeʻuhí ke ʻoua ʻe fakamamahiʻi kinautolu ʻe he kau Leimaná. Naʻe talangofua ʻa Nīfai. Naʻá ne fakatahatahaʻi mai hono fāmilí pea mo kinautolu kotoa pē naʻe tui ki he folofola ʻa e ʻOtuá. Naʻa nau fononga ʻi he feituʻu maomaonganoá ʻi ha ngaahi ʻaho lahi. Ne faifai pea nau fokotuʻu hake ha kemi pea ngāue leva. Naʻa nau tō ha ngaahi tengʻi ʻakau, pea naʻe tupu lelei ʻenau ngoué. Naʻa nau tauhi ha fanga monumanu tokolahi. Naʻa nau langa ʻa e ngaahi falé mo ha temipale, ʻa ia te nau lava ke hū ai ki he ʻOtuá. Naʻe akoʻi ʻe Nīfai ʻa e kakaí mei he folofolá, pea naʻa nau tauhi ʻa e ngaahi fekaú.

Naʻe tohi ʻe Nīfai naʻe nofo hono kakaí “ʻi he fiefia” (2 Nīfai 5:27). ʻOku ʻuhinga ia naʻa nau nofo ʻi ha founga ne tokoniʻi ai kinautolu ke nau fiefia. ʻI he taimi ʻoku tau moʻui ʻaki ai e ongoongoleleí, ʻoku tau maʻu e ngaahi tāpuaki ʻe lava ke tokoniʻi ai kitautolu ke tau fiefia.

Ko e Temipale ʻo Nīfaí, ʻe Michael T. Malm; tā fakatātaaʻi ʻe Thomas Child