Ko hono Fakamālohia ʻo e Toʻu Tupú ʻi he Ngaahi ʻEkitivitī Langaki Moʻuí
Fie maʻu ha ngaahi fakakaukau ki ha ʻekitivitī ʻa e toʻu tupú? Vakai ki he, lds.org/youth/activities ki ha ngaahi fakakaukau ʻe 160 tupu.
ʻI hoʻo hoko ko ha mātuʻa pe taki ʻo e toʻu tupú, te ke fie maʻu ke fakamālohia hoʻo fānaú mo e toʻu tupu ʻi ho uōtí pe koló. ʻOku nau tupu hake ʻi ha kuonga ʻoku mamaʻo ʻa e ngaahi tuʻunga moʻui ʻo e māmaní mei he ngaahi tuʻunga moʻui ʻo e ongoongoleleí. ʻOku nau faʻa ongoʻi tuenoa ʻi heʻenau feinga ke moʻui ʻaki e ongoongoleleí. Meʻa mālié, te nau lava ʻo maʻu ʻa e mālohi ʻi heʻenau kau atu ki he ʻekitivitī mahuʻinga mo e toʻu tupu kehé.
ʻE lava ʻe he Ngaahi ʻEkitivitií ʻo Fakamālohia mo Fakahaofi ʻa e Toʻu Tupú
ʻOku ʻomi ʻe he ngaahi ʻekitivitī ʻoku ola leleí ha ʻātakai ʻoku fakatupulakí ke ako mo moʻui ʻaki ʻe he toʻu tupú e ongoongoleleí. ʻOku nau tokoniʻi e toʻu tupú ke mateuteu ki honau ngaahi fatongia he kahaʻú, fakatupulaki honau ngaahi talēnití mo e meʻa ʻoku nau mahuʻingaʻia aí, ako e ngaahi poto fakatakimuʻá, mo fakaʻaiʻai e feohi fakakaungāmeʻá ʻi heʻenau fengāueʻaki mo e kau talavou mo e kau finemui kehé. ʻE lava ke ʻomi ʻe he ngaahi ʻekitivitií ʻa e ngaahi faingamālie maʻá e toʻu tupú ke nau fakahoko ha ngāue tokoni mahuʻinga ki he niʻihi kehé ʻi he koló. ʻE lava foki ʻa e ngaahi ʻekitivitií ʻo tokoni ke ke fokotuʻu ha vā fai fakahinohino lelei mo e toʻu tupú.
ʻE lava foki ʻa e kau mēmipa māmālohí mo kinautolu ʻoku ʻikai kau ki he Siasí ʻo fiefia ʻi he ʻātakai fiefia mo angamaheni ki he ngaahi ʻekitivitī ʻa e toʻu tupú. ʻOku pehē ʻe Tēvita L. Peki, palesiteni lahi ʻo e Kau Talavoú, “ʻOku ʻomi ʻe he ngaahi ʻekitivitií ha taha ʻo ʻetau ngaahi founga lelei taha ke ala atu ʻo fakahaofi e niʻihi kehé.” “ʻOku ʻi ai ha toʻu tupu tokolahi he ʻikai te nau tali ha fakaafe ʻi he kamataʻangá ke haʻu ki ha houalotu sākalamēniti pe fanongo ki he kau faifekaú ka te nau fiefia ke kau fakataha mo kitautolu ʻi ha ʻekitivitī fiefia. ʻOku lipooti ʻe he tokolahi ʻo e kau ului ki he Siasí naʻe hoko ʻenau fuofua ʻilo ki he ongoongoleleí ʻi he taimi naʻe fakaafeʻi ai kinautolu ʻe ha kaungāmeʻa ki ha ʻekitivitī ʻa e toʻu tupú.”
Ko e taha ʻo e ngaahi kī mahuʻinga ki he ola lelei ʻa e ngaahi ʻekitivitií ko e kau mai ʻa e toʻu tupú. ʻI he malumalu hoʻo fakahinohinó, ʻe lava ke fakahoko ʻe he toʻu tupú ha fatongia mahuʻinga ʻi he palaní; ʻoku ʻikai ha taha ʻe toe lelei ange ʻene ʻilo ki honau ngaahi manakó, taumuʻá, holí, mo e ngaahi fehuʻí ʻiate kinautolu. ʻI he taimi ʻe tataki ai ʻe he kau palesitenisī ʻo e kōlomú mo e kalasí hono palani mo fakahoko e ngaahi ʻekitivitií ʻo makatuʻunga ʻi he ngaahi fie maʻu ʻa e toʻu tupu ʻi he uōtí pe koló, ʻe toe fiefia mo manakoa ange ʻe he toʻu tupú pea te nau maʻu ha ngaahi aʻusia lelei ange.
Ngaahi ʻEkitivitī Kehekehe
Te ke maʻu ha ngaahi fakakaukau ʻe 160 tupu ki he ʻekitivitií ʻi he lds.org/youth/activities, ke ueʻi fakalaumālie ʻaki e toʻu tupú ʻi heʻenau palaní. ʻOku fokotuʻu mai foki ʻe he saití ha ngaahi founga ke tokoniʻi koe ke ke fakapapauʻi e ngaahi fie maʻu ʻa e kau talavoú mo e kau finemuí, fakataha mo hono palaní mo e ngaahi meʻangāue fetuʻutaki ke tokoni ki he toʻu tupú mo e kakai lalahi ʻoku takí ke fakahoko ʻaki ʻenau ngaahi fakakaukaú. Te ke lava ke ʻoatu ki he saití hoʻo ngaahi fakakaukau ki he ʻekitivitií.
ʻOku fokotuʻu mai ʻe he saití ha ngaahi ʻekitivitī ki he tokoniʻi e niʻihi kehé, vahevahe ʻo e ongoongoleleí, fakatupulaki ʻo e moʻui lelei fakatuʻasinó, fakahoko e mūsiká mo e ʻātí, teuteu ki he ngaahi fatongia he kahaʻú, fakahoko ʻo e ngāue fakatemipalé mo e hisitōlia fakafāmilí, mo e ngaahi meʻa lahi. ʻI he matuʻotuʻa ʻa e toʻu tupú pea fehangahangai mo e ngaahi fatongia ʻoku lahi angé, te nau fie maʻu ke kehekehe ʻa e ngaahi meʻa ʻoku nau malavá mo ha ngaahi aʻusia ke ne teuʻi kinautolu ke nau hoko ko e lelei tahá ʻi he hala ki he hakeakiʻí. ʻOku pehē ʻe ʻEletā Paula B. Paipa ʻo e Kau Fitungofulú, “ʻOku fie maʻu ʻe hotau toʻu tupú ha ngaahi aʻusia te nau tokoniʻi kinautolu ke tupulaki fakalaumālie, fakatuʻasino, fakaʻatamai, mo fakasōsiale ke teuteu ai ki he ngāue ʻoku ʻomi ʻe he Tamai Hēvaní kiate kinautolú. ʻOku fakamālohia ʻe he ngaahi ʻekitivitī kehekehe ʻi he uepisaití ʻa e ngaahi faingamālie lahi ʻoku totonu ke tau foaki ki hotau toʻu tupú.”
ʻOku fakalahi ʻe he ngaahi ʻekitivitī ʻa e saití hono ako ʻo e ongoongoleleí ʻaki hono fakafetuʻutaki e ngaahi ʻekitivitií ki he ngaahi tefitoʻi moʻoni ʻoku ako ʻe he toʻu tupú ʻi he ngaahi lēsoni he Sāpaté mo e Fatongia ki he ʻOtuá mo e Fakalakalaka Fakatāutahá.
ʻI he ngāue fakataha ʻa e toʻu tupú, kau takí, mo e ngaahi fāmilí ke palani mo fakahoko ʻa e ngaahi ʻekitivitī ʻoku nau fakaafeʻi e toʻu tupú kotoa ke nau haʻu kia Kalaisí, ʻe toe mateuteu ange ai ʻa e toʻu tangata kei tupu haké ke fakahoko e ngāue ʻa e ʻEikí ʻi he māmaní.
5K Fakafiefia
Fakahoko ha lele pe lue 5K maʻá e toʻu tupú mo e koló.
ʻUlungaanga Totonu He Hulohulá
Aleaʻi mo fakatātaaʻi ʻa e ʻulungaanga totonu ʻo e hulohulá.
Ngaahi pōtoʻi ngāue te tau lava ʻo fakaʻaongaʻi ke ngāue tokoní
Ako e ngaahi pōtoʻi ngāue foʻou pea fakaʻaongaʻi ia ke tokoniʻi e niʻihi kehé.
Ko e Fakaʻaliʻali Talēnití
Palani ha fakaʻaliʻali talēniti ʻa e uōtí pe toʻu tupú.
ʻOupeni hausi ʻa e faifekaú
Palani, teuteu, pea fanongonongo ha ʻoupeni hausi ʻa e faifekaú, meʻa fakafonua naʻe hoko, pe ko ha ʻekitivitī ʻe taha ʻi ha fale lotu ʻi homou feituʻú.
TOʻOHEMÁ: TĀ FAKATĀTAAʻI ʻE Wavebreakmedia Ltd/Lightwavemedia/Thinkstock