Naʻá ku ʻIloʻi e Meʻa ne Fie Maʻu ke U Faí
ʻOku nofo e tokotaha naʻá ne fai e talanoá ʻi he Feituʻu Lotolotó, ʻIukanitā.
Kapau naʻe ʻikai ke u fakaʻikaiʻi ʻa e Siasí, ʻe fie maʻu ia ke u mavahe mei hoku ʻapiakó.
Tā fakatātaaʻi ʻe David Habben
ʻOku ou ako ʻi ha ʻapiako ʻoku fakalele ʻe ha taha ʻo e ngaahi siasi ʻi hoku fonuá. Naʻe fili au ʻe hoku kaungā-akó ʻi ha taimi naʻe ʻikai fuʻu fuoloa mei heni ke u hoko ko ha fai faleʻi ʻo e kalasí. ʻI ha ʻaho ʻe taha ʻi heʻeku palani e meʻa ke akoʻí, naʻá ku maʻu ai ha kiʻi tohi ʻa e Siasí fekauʻaki mo e fono ʻo e angamaʻá. Naʻá ku fakapapauʻi ke akoʻi ki hoku kaungā-akó fekauʻaki mo e angamaʻá peá u kole e fanga kiʻi tohí ki he kau faifekau taimi kakató, ʻa ia ne u tufa ia lolotonga e lēsoní.
Hili ʻeku lēsoní, naʻe fie maʻu ʻe ha fānau ako tokolahi ke ʻilo lahi ange ki he Siasí, ko ia naʻá ku akoʻi kinautolu pea ʻoange mo ha ngaahi nāunau ʻa e Siasí kiate kinautolu, kau ai e Tohi ʻa Molomoná. Naʻe ʻikai ke u ʻilo naʻe ʻikai fakangofua ʻeni ʻe he faiako pulé.
ʻI ha ʻaho ʻe taha naʻá ne ui au ki hono ʻōfisí pea fehuʻi mai pe ko e fē siasi naʻá ku ʻalu ki aí. ʻI heʻeku talaange ki aí, naʻá ne ʻeke mai pe ko e hā e ʻuhinga naʻá ku ʻave ai e “Tohi Tapu” ʻa e Siasí ki he fānau akó. Naʻá ku talaange ki ai naʻá ku ʻave pē ia ki he niʻihi naʻa nau kolé.
Hili ha talanoa lōloa fekauʻaki mo e Siasí, ʻa ia naʻá ne fakamahinoʻi mai ai ʻokú ne tui ʻoku ʻikai ko e Siasi ia ʻo e ʻOtuá, naʻá ne talamai kiate au, “ʻOku ou ʻilo ʻoku ʻikai ke ʻi ai haʻo mātuʻa, ka ʻoku ou kole fakamolemole atu—kuo pau ke ke mavahe mei hoku ʻapiakó koeʻuhí he te ke ului e tokolahi ʻo ʻeku fānau ako leleí ki ho siasí.” Naʻá ne talamai ke u fili ʻi he Siasí mo ʻeku akó.
Naʻá ne ui ha fakatahaʻanga ʻo fakahā ki he akó ʻoku ʻikai ke toe fakangofua au ki he akó koeʻuhí naʻá ku kau ki he Siasi Māmongá pea kapau ʻoku toe ʻi ai ha fānau ako kehe te nau muimui mai ʻiate au kuo pau ke nau mavahe mo kinautolu.
Hili ʻa e fakatahaʻangá, naʻá ne ʻeke mai pe ko e hā ʻeku filí: ko hoku siasí pe ko ʻeku akó. Ne u ongoʻi e Laumālié ʻokú ne talamai ke u taukapoʻi e meʻa ʻoku ou ʻiloʻí: he kuo toe fakafoki mai ʻe he ʻEikí Hono Siasi moʻoní. Naʻá ku vahevahe mo ia ʻeku fakamoʻoní ʻi heʻeku ʻalú. Naʻá ne talamai ke u toe foki ange ʻi he uike hono hokó ke ʻave ha tohi ʻoku fakahaaʻi ai ʻoku ʻikai ke u toe ʻalu ki he akó.
ʻI heʻeku ʻalu atu ʻi he uike hono hokó, kuo liliu ʻene fakakaukaú! Naʻe ʻikai ke ne toe tuli au mei he akó. Naʻá ku fuʻu fiefia, pea ko e lahi tahá pē koeʻuhí he ne u taukapoʻi e meʻa naʻá ku ʻiloʻi ʻoku moʻoní.
Naʻe akoʻi au ʻe he aʻusia ko ʻení ke taukapoʻi maʻu pē e meʻa ʻoku tau ʻiloʻi ʻoku moʻoní. ʻE ʻi ai maʻu pē ʻa e ʻEikí ke tokoniʻi kitautolu. Kapau ne u fakaʻikaiʻi ʻa e Siasí, ʻe mei pehē ʻe he fānau akó naʻe ʻikai moʻoni e meʻa naʻá ku akoʻi kiate kinautolú, ka ko ʻeni ʻoku nau ʻiloʻi ʻoku ou ʻiloʻi ʻa e moʻoní.