Ngaahi Fakapulipuli ʻe Hongofulu ʻo e Manakoa Moʻoní
ʻOku nofo e tokotaha naʻá ne fai e talanoá ʻi Uasingatoni, USA.
Te u maʻu ʻi fē ʻa e fakapulipuli ki he manakoá? ʻI he Fuakava Foʻoú?
“ʻOku tau fika ʻuluaki!” ko e kaikaila ia e tokotaha fakakaekae ʻi ha vaʻinga ʻakapulu ʻa e akoʻanga māʻolungá. Naʻá ku saiʻia he hangatonu hono nifó mo e fakaʻofoʻofa ʻene malimalí. Naʻá ku sio ki heʻene kata mo talanoa ki he tamaiki fefiné mo fakamalinga kākā mo e tamaiki tangatá.
Naʻá ku fakakaukau, “Pau pē ʻoku lāngilangiʻia ke hangē ko iá,” ʻi heʻeku fakakaukauloto ki heʻeku tuenoá. Naʻe fie maʻu ʻe he ngāue ʻeku tamaí ke mau hiki ʻi he taʻu ʻe tolu ki he nima kotoa pē, ko ia naʻe faingataʻa kiate au mo hoku taʻoketé ke faʻu ha feohi fakakaungāmeʻa tuʻuloa.
Naʻe ongoongoa ʻa e tokotaha fakakaekae ko ʻení ʻi he teunga taʻetāú mo e ʻalu ki he ngaahi fakafiefia ʻoku inu kavamālohí. ʻI heʻeku siofi iá, naʻe kamata ke u fakaʻamu ke maʻu e manakoa ko ia naʻá ku fakakaukau naʻá ne fakafofongaʻí. Ne u fie maʻu lahi ʻaupito ke ʻi ai haku kaungāmeʻa pea ʻi ha lau-mōmēniti ne u fifili pe ʻoku totonu ke u tuku hifo ʻeku ngaahi tuʻunga moʻuí ke hoko ʻo hangē ai ko iá.
Lolotonga ʻeku fakaʻuli mo hoku taʻoketé ki ʻapí, ne u moʻua he fakaʻofaʻia pē ʻiate aú, pea naʻá ku lotu ʻi hoku lotó ki he Tamai Hēvaní. Naʻá ku kole kiate Ia ke Ne fakahā mai kiate au ʻa e fakapulipuli ko ia te ne toʻo atu ʻeku tuenoá mo e ongoʻi taʻe malú. Neongo naʻe ʻikai ko ha mēmipa au ʻo e Siasí ʻi he taimi ko ʻení, ka naʻá ku maʻu ha tui mālohi ki he ʻOtuá.
Naʻe haʻu ki heʻeku fakakaukaú ʻi he taimi pē ko iá ʻa e fakakaukau, “Tuku hoʻo fakakaukau kiate koe peé.”
“Ko e fakapulipulí nai ia?” Ne u fakakaukau ʻi he loto-mamahi. “ʻE tokoni fēfē mai ia ke u manakoa aí?”
Kimui ange ʻi he uike ko iá, ne u lau fekauʻaki mo e ʻofa faka-Kalaisí ʻi he 1 Kolinitō 13. Naʻe tokoni ia ke mahino kiate au ʻoku feinga ʻa e Tamai Hēvaní ke akoʻi au ke maʻu ʻa e ʻofa faka-Kalaisí ki he niʻihi kehé kae ʻoua ʻe tokanga taha pē ki he founga hono talitali aú. Naʻá ku toʻo e ngaahi ʻulungaanga ʻo e ʻofa faka-Kalaisí ʻa ia naʻe hiki aí pea fakaʻaongaʻi ia. ʻI he taimi ne u fai ai ʻení, naʻá ku fakatokangaʻi naʻe liliu kotoa ʻeku aʻusia ʻi he akó. Ko e niʻihi ʻeni ʻo e ngaahi meʻa mahuʻinga ne u akó.
ʻOku Kātaki Fuoloa ʻa e ʻOfa Faka-Kalaisí
Naʻá ku feinga ke u toe faʻa kātaki ange ʻi heʻeku feohi mo e kakai ʻi he akó. Naʻe fakamataliliʻi au ʻe ha tamasiʻi ʻe taha lolotonga e kalasi ʻi he fale vaʻingá, ka naʻá ku feinga ke fakafepakiʻi hono ʻulungaanga koví ʻi he angaʻofa mo e malimalí. Naʻe faifai pē pea ʻikai ke ne toe fakamataliliʻi au. ʻI he fakaʻosinga ʻo e taʻú, naʻá ma kaungāmeʻa lelei.
ʻOku Angalelei ʻa e ʻOfa Faka-Kalaisí
Naʻá ku saiʻia maʻu pē ha taʻahine ʻi heʻeku kalasí ʻa ia naʻe anga fakakaumeʻa ki he tokotaha kotoa pē, tatau ai pē pe naʻe manakoa pe ʻikai. Naʻe kamata ke u muimui ki heʻene sīpingá pea kumi ha ngaahi faingamālie ke fakahaaʻi ai ha angaʻofa ki he niʻihi kehé.
ʻOku ʻIkai Meheka ʻa e ʻOfa Faka-Kalaisí
Naʻá ku meheka mo hoku tokouá ʻi he ngaahi talēniti ʻo ha tokotaha vaʻinga pasiketipolo ʻi homau ʻapiakó, pea naʻá ma faʻa lauʻi koviʻi ia. Ne u fakakaukau ke u kamata ke fiefia ʻi heʻene ngaahi ikuná. Naʻá ku kamata foki ke fakatupulaki hoku ngaahi talēnití. ʻI heʻeku fai e ngaahi meʻa ko ʻení, ne mole ʻeku kavenga mafasia ʻi he loto-mamahí, pea naʻá ku fiefia lahi ange ai.
ʻOku ʻIkai Fakafuofuolahi e ʻOfa Faka-Kalaisí
Naʻá ku faʻa fakakaukau he taimi ʻe niʻihi ne u lelei ange au ʻi ha kakai ʻe niʻihi koeʻuhí he naʻá ku maʻu ha ngaahi tuʻunga ʻulungaanga māʻolunga ʻo e moʻui tāú. ʻI he taimi naʻá ku fakakaukau ai ki he Fakamoʻuí, ʻa ia naʻe angamalū mo ʻofa ki he kakai kotoa pē, naʻá ku fakakaukau ke liliu ʻeku tōʻongá. Naʻe kamata ke feinga e kakaí ke hoko ko hoku kaungāmeʻa, ʻi heʻeku feinga ke u loto-fakatōkilalo mo angaʻofá.
ʻOku ʻIkai ke Anga Taʻe Taau e ʻOfa Faka-Kalaisí
Naʻá ku ʻofa ʻi he ʻEikí pea maʻu e ngaahi tuʻunga ʻulungaanga māʻolunga ʻo e moʻui tāú. Ne u fakapapauʻi ko hono maumauʻi e ngaahi tuʻunga ʻulungaanga ko ʻení te u lotomamahi ai.
ʻOku ʻIkai ke ʻItangofua e ʻOfa Faka-Kalaisí
ʻI ha taimi ʻe taha, naʻe fai ai ʻe ha faiako ha lea ne u loto-mamahi ai. Naʻe ʻikai ke u fai ha tali, ka naʻá ku fehuʻi ange ki ai pe naʻe kovi hono ʻahó. Naʻá ne talamai ʻio peá ne kole fakamolemole mai leva. Ne haʻu ʻene ngaahi leá mei heʻene ngaahi palopalema fakatāutahá pea naʻe ʻikai haʻane kaunga kiate au.
ʻOku Fiefia ʻa e ʻOfa Faka-Kalaisí ʻi he Moʻoní
Ko e meʻa ʻe taha naʻe akoʻi ai au ʻe hoku kaungāmeʻa naʻe kau ki he Siasí ʻoku kovi e ngutu laú mo hono fakamafola e loí. Ne u feinga ke fakaʻehiʻehi mei he ngutu laú mo liliu e talanoá ʻi he taimi kotoa pē naʻe kamata ke lea taʻeʻofa ai ha tahá.
ʻOku tui e ʻOfa Faka-Kalaisí ki he Meʻa Kotoa Pē, ʻOku ʻAmanaki Lelei ki he Meʻa Kotoa Pē
Naʻe kamata ke u vakai ki he lelei ʻi he kakaí, pea ke ʻatamai-maama. ʻI he taimi ne u fai ai e liliu ko ʻení, naʻe kamata ke ongoʻi tupulaki e kakai naʻa mau feohí. Naʻe hoko ʻeni ke nau fie feohi lahi ange ai mo au.
ʻOku Kātekina ʻe he ʻOfa Faka-Kalaisí ʻa e Meʻa Kotoa Pē
ʻI he taimi naʻe puke lahi ai hoku taʻoketé pea ʻikai ke ne toe lava ʻo lue fakaleleí, naʻe tokolahi hono kaungāmeʻa ne nau liʻaki iá koeʻuhí ko e fakaoli ʻene lué. Naʻá ku sio ki heʻene loto-mamahí, pea naʻá ku fakatokangaʻi hono mahuʻinga ʻo e kau mo e kakaí ʻi he ngaahi taimi faingataʻá.
ʻOku ʻIkai Fakaʻau ʻo Ngata ʻa e ʻOfá
ʻI heʻeku fakaʻaongaʻi e ʻofa faka-Kalaisí ʻi hoku ngaahi vā fetuʻutakí, naʻá ku fakatupulaki ha anga fakakaungāmeʻa moʻoni mo tuʻuloa. Naʻe puli atu ʻeku tuenoá, pea ne u ʻiloʻi ʻoku taʻe ʻaonga e manakoá ʻi hono fakahoa ki he koloa moʻoni ʻo e anga fakakaungāmeʻá mo e fakaʻapaʻapa ʻoku maʻu mei hono moʻui ʻaki e ngaahi tefitoʻi moʻoni ʻo e ongoongoleleí.
ʻOku ou fakamālō ki ha Tamai Hēvani naʻá Ne tuku ha taimi ke akoʻi ha taha naʻe taʻu ua ʻi he ako māʻolungá ki he fakapulipuli ʻo e maʻu ʻo e ngaahi anga fakakaungāmeʻa ʻe tuʻuloá.
ʻAta ʻi muí ʻa akiyoko/iStock/Thinkstock; pepa kalafí ʻa darksite/iStock/Thinkstock