ʻOku ʻi ai haʻaku kaungāmeʻa ʻokú ne faʻa tukuhifo maʻu pē ia ki lalo. Te u lava fēfē ʻo tokoniʻi ia ke ne ongoʻi fiemālie ʻiate ia pē?
ʻOku fakatatau hoʻo founga tokoniʻi e palopalema ʻa hoʻo kaungāmeʻá mei hono mafatukitukí. Hangē ko ʻení, mahalo ko ʻene fakaangaʻi pē ia ke hā loto-fakatōkilalo, pe ke maʻu ha ngaahi fakahīkihiki pe maʻu ha fakalotolahi mei he niʻihi kehé. Kapau ʻoku pehē, hokohoko atu hoʻo fakafiemālieʻi iá pea tokoniʻi māmālie ia ke ne tokoniʻi ʻa e niʻihi kehé kae ʻoua ʻe fuʻu nofo taha pē ʻiate iá. Ko e founga ia te ne maʻu ai ha fiemālie lahi ange mo e mahuʻinga fakatāutahá, pea mo ha loto fakatōkilalo moʻoni.
Kuo pehē ʻe Palesiteni Tieta F. ʻUkitofa, Tokoni Ua ʻi he Kau Palesitenisī ʻUluakí: “ʻOku ʻikai maʻu e loto fakatōkilaló he fakaʻofaʻia pē ʻiate kitautolú; ʻoku maʻu e loto fakatōkilaló ʻi hono fakasiʻisiʻi e fakakaukau ʻofekauʻaki pē mo kitautolú.” (“Hīkisiá mo e Lakanga Fakataulaʻeikí, Liahona, Nōvema 2010, 55).
Kapau ʻoku ngalingali ʻoku toe kovi ange ʻa e palopalemá—kapau ʻokú ke mahamahalo ʻokú ne faingataʻaʻia—poupouʻi ia ke ne talanoa mo ʻene ongomātuʻá, fai faleʻi mei he akó, pe ko ʻene pīsopé. Pe ko hoʻo ʻalu ʻa koe kiate kinautolu ʻo fakamatalaʻi ʻa e meʻa ʻoku hokó. Te nau lava ʻo fakapapauʻi ʻokú ne maʻu ʻa e tokoni ʻokú ne fie maʻu, kau ai ha tokoni fakapalofesinale ʻo kapau ʻe fie maʻú.