Mga Pamalandong
Usa ka Milagro sa Pasko
Ang tagsulat nagpuyo sa North Carolina, USA.
Nagpitik pa iyang kasingkasing. Dili na sama ka himsog sa wala pa siya giatake sa kasingkasing. Apan nagpitik pa gihapon kini.
Paghulagway pinaagi ni Julie Rogers
Ang akong kasingsing mibati og kainit karong gabhiuna. Sigurado nga nasakitan, nasagmuyo. Apan mainiton sa maayong paagi. Mibati ko og dakong pasalamat—lalum ug masanapon nga pasalamat nga daw adunay bag-ong luna nga gihimo diha sa akong kalag alang niini, pasalamat nga hilabihan ug personal kaayo nga dili mohunong sa pagdagayday ang akong mga luha diha sa aping. Nagginhawa pa gihapon akong bana. Madungog ko kini, lalum ug hinay.
Mga duha lang ka oras ang milabay, mihigda ko sa iyang higdaanan sa ospital, gibaliwala ang mga hinayng patid sa masuso diha sa akong tiyan, ug nakakita og dapit sa iyang dughan taliwala sa mga wire nga gibutang niini diin akong mapahiluna akong ulo. Ang pagpaminaw sa pinitik sa iyang kasingkasing mao ang usa ka kasinatian nga dili gyud nako makalimtan.
Nagpitik pa iyang kasingkasing. Dili na sama ka himsog sa wala pa siya giatake sa kasingkasing. Apan nagpitik pa gihapon kini.
Ang kahayag sa mga suga sa Pasko nga nakalinyang gibitay diha sa kwarto nakahatag nako og kalinaw sa daghang paagi. Ang kahayag niini nakamugna og palibut nga makahupay, apan ang tinuoray nga kalinaw nagagikan sa kasayuran nga ang tinuod nga mga higala andam nga miusab sa ilang mga plano para sa Bisperas sa Pasko aron sa pagpanindot sa kwarto nga balhinan ni Brian gikan sa intensive care unit. Ang tulo ka pye (1m) nga Christmas tree nagbarug sa may bintana isip simbolo sa ilang gugma.
Unsaon nako pagpasalamat sa akong mga higala? Masayud ba sila kon unsa nako sila ka kinahanglan ug unsa kadako sa akong pasalamat? Samtang nagtutok ko sa pag-atiman sa akong bana, sila nag-atiman sa akong mga anak, naglimpyo sa akong balay, nagbutang og pagkaon sa refrigerator, nanlaba, nagputos og regalo para namo sa Pasko, ug mipabati sa ilang gugma ngari nako pinaagi sa ilang mga gakos, panihapon, mga regalo nga kard, kwarta, mga tawag diha sa telepono, mga text, mga email, mga mensahe, mga bag sa cinnamon-scented pine cones, ug maleta nga puno og mga dekorasyon. Sila mihilak uban nako ug nag-ampo ug nagpuasa. Ug sa pagbuhat niining tanan, ilang gihatag kanako ang labing bililhon nga gasa nga ilang mahatag: ilang panahon. Gihiguma ko silang tanan!
Mora og makatulog ko og tarung karong gabhiuna, kay napuno ko sa walay katapusang pasalamat alang kanilang tanan.
Apan dako gyud akong pasalamat ngadto sa Ginoo para sa kinabuhi sa akong bana—iyang lalum nga pagginhawa, iyang nagpitik nga kasingkasing, iyang buhi nga lawas ug kalag. Ang iyang kinabuhi mao ang akong milagro sa Pasko.