Pasko ilawom sa Atop nga Sin
Erwin E. Wirkus, Idaho, USA
Sa dihang na-assign ko sa Manila, Philippines, isip sundalo panahon sa Ikaduhang Gubat sa Kalibutan, kanunay ko nga makigkita sa gamayng grupo sa LDS servicemen aron sa pagpahigayon og miting sa sakrament. Atol sa usa ka miting nakamatikod ko og usa ka Filipina diha sa luyo sa binombahan nga building nga milili namo diha sa dakong lungag nga kanhi pultahan. Naghunahuna ko nga basin ang among pagkanta nakadani niya. Sa dihang among gipiyong ang among mga mata para sa panapos nga pag-ampo, hinay siyang mipahawa.
Panahon sa iyang sunod-sunod nga pagbisita, amo siyang gidapit sa pag-apil namo. Ang iyang ngalan mao si Aniceta Fajardo, ug siya madasigong midawat sa among pakighigala. Samtang nagpadayon siya sa pagtambong sa among mga miting, iyang nakat-unan ang gipahiuli nga ebanghelyo ni Jesukristo.
Kay nagsingabut na ang Pasko, mihukom mi nga hatagan namo si Aniceta ug iyang pamilya og mga regalo sa Pasko. Nagpundok mi og de lata nga gatas, karne, ug mga utanon; duha ka habol; ug medikal kit, nga may penicillin aron matambalan ang masakitong apo ni Aniceta.
Atol sa Bisperas sa Pasko among gipundok ang mga gasa ug miadto sa balay ni Aniceta. Nagpuyo siya uban ang iyang anak nga babaye ug apo ilawom sa atop nga sin nga gipasandig diha sa bong-bong nga beka—salin sa building nga binombohan. Naghunahuna mi kon unsaon nila pagsugakod uban niining gamay nga proteksyon atol sa kusog nga ulan nga nagdagsang nianang tuiga.
Usa sa among kauban miputol og usa ka sanga sa kahoy nga mangga ug giugbok kini sa yuta. Nakakita kami og ginagmayng sinalibay nga maadorno sa sanga.
Si Aniceta ug ang iyang pamilya nagtan-aw nga nahimout ug nahingangha. Sa dihang ilang nakita ang mga gasa nga among gidala, ang ilang kahimout nahimong mga luha sa kalipay ug pagdayeg. Wala pa sila makakita o makakaon niining matang sa pagkaon sa dugayng panahon, ug sila nakahilak pag-ayo nga maglisud sila sa pag-istorya.
Tungod kay Bisperas kadto sa Pasko, nakahunahuna mi sa among panimalay ug mga minahal. Naghunahuna ko sa sulat nga akong nadawat duha ka adlaw lang ang milabay, nagpahibalo nako nga ako usa na ka amahan. Mipakigbahin mi sa among mga pagbati, gitapos uban sa among mga pagpamatuod sa Manluluwas ug sa gipahiuli nga ebanghelyo.
Among gisiguro niining talagsaong pamilya ang gugma sa Manluluwas para kanila. Sila nakakaplag og kahupayan sa among mga pulong, ug mabati ang kalinaw diha sa hangin sa kagabhion. Dayon nanamilit mi sa among mga higala ug mitimbiya kanila og maayong Pasko.
Sa wala madugay nabalhin ko sa laing dapit, ug wala na nako makita pag-usab si Aniceta o ang iyang pamilya. Apan pipila ka tuig ang milabay giablihan nako ang Church Almanac ngadto sa seksyon sa Pilipinas ug nabasahan nga si Aniceta Pabilona Fajardo mao ang unang Filipino nga namiyembro sa Simbahan sa kapuloan.1 Pagkadakong panalangin nga maghunahuna sa mga binhi nga gitanom panahon sa Pasko niadtong 1945.
Among giputol ang usa ka sanga sa kahoy sa mangga ug giugbok kini sa yuta. Si Aniceta ug ang iyang pamilya nagtan-aw nga nahimout ug nahingangha.