UNSAY BATION NGA MAHIMONG BAG-O NGA MGA KINABIG?
Makatabang mo sa bag-ong mga miyembro pinaagi sa pagsabut sa ilang mga naagian.
Kon nagtubo kamo sa Simbahan, ang mga butang kalabut sa simbahan normal ra. Naanad kamo sa sagad nga mga miting, sa building nga inyong gitambongan, sa matang sa sinina nga gisul-ob sa mga tawo diha sa simbahan. Mga butang sama sa paghatag og mga pakigpulong sa sakrament miting, pagbayad sa ikapulo ug mga halad sa puasa, ug pagpuasa kausa sa usa ka bulan kabahin lamang sa kinabuhi. Ang pagsunod sa Pulong sa Kaalam, pagdawat sa tawag sa pagserbisyo, ug pagsunod sa balaod sa kaputli tanan kabahin sa unsay inyong makat-unan nga buhaton.
Apan alang sa mga kinabig, kini usa ka dako nga kausaban nga mapamilyar niining tanan. Sa walay duha-duha, ang pag-angkon og pagpamatuod sa mga kamatuoran sa ebanghelyo mao ang unang lakang ngadto sa pagkamiyembro sa Simbahan ni Kristo. Apan ang pagbaton og pagpamatuod wala magpasabut nga ang pag-usab ngadto sa kinabuhi isip usa ka miyembro sa Simbahan sayon.
Ang Simbahan Ingon og Lahi Kaayo
Sama pananglit nako: Duna koy mga higala nga LDS sukad 13 anyos pa ko, ug sa katapusan nagpasakop sa Simbahan sa dihang 19 anyos na ko. Apan bisan pa nga nakat-on og daghan mahitungod sa kultura sa Simbahan niadtong mga tuiga, naglisud gihapon ko sa kausaban. Alang nako, ang kultura ug mga kustombre sa Simbahan lahi kaayo nga ingon og daw katingalahan kini.
Nagtubo ko sa usa ka simbahan nga sa daghang mga paagi dili sama sa inyong nahibaloan o mahibaloan. Sa simbahan ang mga ministro ug ang choir magsul-ob og mga kupo susama sa mga kupo sa gradwasyon sa high school. Atol sa pagsimba—ang katugbang sa sakrament miting—ang mga ministro mohatag sa mga sermon ug mao ra ang moistorya. Kada Dominggo kaming tanan mosubli sa Pag-ampo sa Ginoo nga magdungan ug kanunay manganta sa himno “Praise God from Whom All Blessings Flow.” Ang mga masuso gibunyagan pinaagi sa pagwisik-wisik og tubig sa ilang mga ulo, apan ang kumpirmasyon mahitabo inig ka 14 anyos na.
Mogamit mi og grape juice imbis tubig alang sa sakrament, ug ang kabataan sa high school motambong og Sunday School uban sa mga hamtong sa klase nga naghisgot og mga bag-ong isyu sa katilingban.
Bisan ang among building lahi kay sa LDS nga mga building nga akong nabisitahan. Kami dunay dako nga chapel nga gisunod sa mga simbahan sa Kristiyano sa Europe, nga tag-as og atop ug habog, stained-glass nga mga bintana. Dunay krus sa dapit tinduganan sa choir. Usa ka nindot nga habog nga kampana anaa sa atubangan. Ganahan kong mopabagting sa kampana human sa pagsimba. Bug-at kaayo kini nga mahimong maalsa ang gamay nga bata gikan sa yuta inig saka ug kanaog sa pisi.
Ang among mga kustombre ug sosyal nga mga pagtuo lahi kaayo. Gitudloan mi nga OK ra ang moinom og alkohol o manabako. Ang pagbaton og hinigugma isip tin-edyer OK ra. Gani, gitudloan kami nga kami mahimong dunay sekswal nga mga relasyon sa dili pa magminyo basta nagtuo nga kami nagkahigugmaay sa usag usa. Wala gyud mi maghisgot mahitungod sa pagbaton og pagpamatuod. Ang unang higayon nga ako nakakita og miting sa pagpuasa ug pagpamatuod—natingala ko! Ingon og di ko makatuo kon unsa kadto ka lahi. Walay usa nga mobarug aron mopakigbahin sa ilang mga pagtuo sama niana sa akong simbahan.
Ang pagpasakop sa Ang Simbahan ni Jesukristo sa mga Santos sa Ulahing mga Adlaw dili lamang mahitungod sa pagkat-on og bag-ong mga doktrina, sama sa kinabuhi nga wala pa dinhi sa yuta ug bunyag alang sa mga patay, kausaban kini sa kultura ug estilo sa kinabuhi ug mga ekspektasyon. Ang pagresolbar niadto nga mga kalainan lisud buhaton.
Ang unang unom ka bulan human sa akong bunyag lisud gyud kaayo. Hapit wala ko makalahutay. Ang tanan lahi kaayo, ilabi na tungod kay ako nagsimba nga wala ang akong pamilya. Nakigbisog gihapon ako sa ubang mga punto sa doktrina, ingon man usab sa mga pagbati nga nabuwag sa akong kinabuhi niadtong wala pa ang akong bunyag.
Maayo gani, ang akong mga higala sa Simbahan mapailubon, mabination, ug makanunayon. Gidala ko nila ngadto sa mga kalihokan, giimbitar ko ngadto sa ilang mga panimalay alang sa panihapon ug family home evening, ug nag-ampo uban nako. Nakahimo kana og dako nga kalainan dili lamang sa akong pag-apil sa Simbahan apan usab sa akong pagpabilin nga aktibo ug pagkakaplag og kalig-on sa dihang ang akong pagpamatuod nagkahuyang. Dako ko og utang kabubut-on kanila sa pagtabang nako nga makahibalo niining mga butanga.
Sa mosunod nga mga istorya, duha ka batan-ong mga miyembro mipaambit sa ilang kaugalingong mga kasinatian sa pag-apil sa Simbahan ug sa unsa nga paagi sila nakakita og kalig-on aron makapadayon. Samtang magbasa kamo sa ilang mga kasinatian, hunahunaa unsay inyong mahimo sa pagtabang sa bag-ong kinabig o usa ka tawo nga mibalik sa pagka-aktibo nga makakaplag og kalig-on nga mapahiangay sa sosyal ug kultural nga paagi ug sa pagtubo diha sa espiritwal.
Naghulat og Katuigan aron Mabunyagan
Sa high-school pa ko, nakahukom ko nga moapil sa Simbahan human makahimamat sa mga misyonaryo sa mga klase sa Iningles ug pagtuon uban nila. Ang reaksyon sa akong mga ginikanan negatibo kaayo sa dihang giingnan nako sila nga gusto kong magpabunyag. Wala kaayo silay nahibaloan mahitungod sa Simbahan, ug sila nahadlok nga basin malambigit ko sa peligrong mga butang. Nagtuo sila nga ang Simbahan makabalda sa akong edukasyon ug nga tungod sa daghang mga lagda, dili na nako matagamtam ang kinabuhi. Dili sila gusto nga magpabunyag ko sulod sa duha ug tunga pa ka tuig.
Gisulayan ko sukad pa sa sinugdanan. Sa mga tuig nga ako dili pa mabunyagan, nagsige ko og pag-ampo alang sa kalig-on ug sa gikinahanglan nga pagtuo aron magpadayon sa pagtuo. Dili ako makasimba o makahugoy-hugoy sa mga miyembro ug mga misyonaryo. Kinahanglang nakong lig-unon ang akong pagtuo ug akong pagpamatuod uban sa pag-ampo, pagbasa sa kasulatan, ug sa mga pulong sa buhing mga propeta—nga ako ra. Wala ko makatambong sa daghang nindot nga mga programa ug makalingaw nga mga kalihokan.
Sa dihang mibalhin ko ngadto sa Rome alang sa kolehiyo, ang akong bishop nahimong tinuod nako nga higala kinsa nakig-unong nako sa dihang ang akong mga ginikanan nasuko pag-ayo. Mitudlo siya nako nga importante nga higugmaon nako ang akong mga ginikanan bisan unsa pa ilang buhaton.
Sa katapusan ako nabunyagan, daghang mga miyembro sa ward miduol ug misuporta nako. Miapil ko sa choir ug nakahigala og daghan didto. Ang ilang pakighigala ug kamabination nakapakomportable nako.
Kon kita magmatinud-anon sa mga pagtulun-an ni Jesukristo ug magsunod sa Iyang ehemplo sa paghigugma ug pag-amuma sa uban, ang bag-ong mga kinabig ug mga investigator makakita nga kita nagsunod sa mga pulong nga atong gitudlo.
Si Ottavio Caruso gikan sa Italy ug nagserbisyo karon og full-time nga misyon.
Wala Mahiangay
Miapil ko sa Simbahan sa dihang ako 13 anyos. Duna koy pagpamatuod sa ebanghelyo, apan gibati kog kahasol nga ako morag wala mahisakop sa simbahan. Ang tanan nakahibalo sa kanta ug sa mga istorya sa kasulatan, ako wala. Ang tanan dunay mga handumanan sa mga kalihokan sa Primary o mga leksyon sa family home evening; wala gyud ko makabuhat niining mga butanga.
Apan dugang niana, ang tanan ingon og dunay pareho og tinguha ug opinyon—usahay lig-on nga mga opinyon nga lahi sa akoa—mahitungod sa tanan gikan sa mga sine ug mga politika ngadto sa paghubad sa piho nga mga kasulatan. Motan-aw ko sa nagyango-yango nga mga tawo sa palibot ug naghunahuna, “Maayo mo nga mga tawo ug ako maayo nga tawo. Apan lahi ra gayud kita. Dili ako angay dinhi.”
Nakigbisog ako niadto nga mga pagbati sulod sa daghang mga tuig. Dayon nakahinumdom ko ug mibasa pag-usab sa istorya gikan sa Lucas 19 mahitungod ni Zaqueo. Tungod kay siya usa ka publikano, dili siya ilado ug giisip nga makasasala. Apan sa dihang si Jesus miagi sa iyang siyudad, si Zaqueo mikat-kat sa kahoy aron makakita kaniya. Wala siya manumbaling unsay hunahuna sa uban kaniya. Niini nga buhat sa pagkat-kat sa kahoy—mibuwag sa iyang kaugalingon gikan sa mga tawo—nga nakahimo kaniya nga makabaton og maanindot kaayo ug personal nga kasinatian uban sa Manluluwas. Samtang ako nagbasa, akong naamgohan nga ang akong mga pagbati nga wala mahiangay dili gikan ni Kristo. Si Jesus malukpanon ug mapasayloon. Aktibo Niyang gipangita kadtong gihukman ug gisalikway—kadtong kinsa ingon og lahi.
Dili ko makasulti nga wala na gayud ko mobati nga wala mahilakip. Ako mibati gihapon. Apan akong nakat-unan nga ang mga butang nga nakahimo nako nga lahi—sa paagi nga ako tan-awon, sa paagi ang uban mitan-aw nako, sa mga butang nga akong ganahan, sa paagi nga ako maghunahuna mahitungod sa kalibutan—dili kini mga rason nga mopahilayo. Mao kini ang mga rason nga ang Simbahan nagkinahanglan natong tanan, uban sa tanan nato nga lain-lain nga mga talento, mga kalig-on, ug mga panan-aw
Elaine Vickers nagpuyo sa Utah, USA.
Mga Leksyon sa Dominggo
Ang Hilisgutan Niining Bulana: Pagtukod sa Gingharian sa Dios
Si Zaqueo mikat-kat sa kahoy aron makakita ni Jesus sa dihang Siya miagi sa iyang siyudad.
Zaqueo, Pagdali, Kanaog, ni Gary L. Kapp