Malaquias

“[Si Jesus] misugo kanila nga sila kinahanglan nga mosulat sa mga pulong nga gihatag sa Amahan ngadto kang Malaquias” (3 Nephi 24:1).

Ang akong ngalan nagpasabut nga “akong mensahero,” ug tungod niini akong gipamulong ang “palas-anon sa pulong ni Jehova.”¹ Sa akong panahon, mga 450 ka tuig sa wala pa matawo si Kristo,² daghang mga Judeo ang nawad-an og kadasig ug mihunong sa pagpuyo nga matarung.³ Ang Ginoo nagbadlong kanila pinaagi sa akong mga pagtulun-an.

Ang mga pari nga Judeo gikan sa tribo ni Levi sa kasagaran gipahinungod sa pagpahigayon sa mga ordinansa, apan dautan ang mga Levite sa akong panahon. Dili sila mapasalamaton, dili motahud sa Dios, ug mihalad og hugaw nga mga tinapay ug dili hingpit nga mga mananap nga isakripisyo.⁴ Wala na nila sunda ang pakigsaad sa priesthood nga gihimo sa Dios ngadto kang Levi.

Ang mga tawo—dili lang mga pari—mga dautan usab. Sila nagminyo gawas sa pakigsaad, gibuwagan ang ilang mga asawa nga ilang giminyoan dihang batan-on pa sila, ug dili mobayad sa ilang mga ikapulo ug mga halad.⁵

Apan bisan pa sa pamulong sa Ginoo batok niining dautang mga binuhatan, Siya andam sa pagpasaylo tungod kay Iyang gihigugma ang Iyang mga tawo: “Bumalik kamo kanako; ug ako mobalik nganha kaninyo.”⁶ Usa ka paagi nga mobalik ngadto sa Ginoo mao ang pagdala sa “tibuok nga ikapulo ngadto sa balay nga tipiganan.”⁷

Ang mga tawo mireklamo, “Walay kapuslanan ang pag-alagad sa Dios: … ang nanagbuhat sa kadautan ginatukod [sa pagkamauswagon],”⁸ apan akong gitudlo nga ang ngalan niadtong “may kahadlok sa Ginoo … ug nga nanagpalandong sa iyang ngalan” nasulat sa “basahon sa handumanan.”⁹

Nanagna usab ko nga sa Ikaduhang Pag-anhi sa Ginoo, ang dautan “mangahimong tuod sa balili” apan alang niadtong nahadlok sa Iyang ngalan “ang Adlaw sa pagkamatarung mosubang nga adunay kaluwasan sa iyang mga pako.”¹⁰

Ako nanagna nga sa dili pa ang Ikaduhang Pag-anhi, si propeta Elijah mopahiuli sa mga yawe sa priesthood nga “[mopabalik sa] kasingkasing sa mga amahan ngadto sa mga bata, ug ang kasingkasing sa mga bata ngadto sa ilang amahan.”¹¹

Pinaagi sa akong mga pagtulun-an, atong makita nga ang Ginoo naghinumdom sa Iyang katawhan ug nagtuman sa Iyang mga saad ngadto sa Iyang matinud-anong mga anak. Gusto niya nga kita makabaton og pagtuo niining mga saad ug, pinaagi sa paghinulsol, mobalik ngadto Kaniya.¹²

LITRATO SA MGA BATO PINAAGI NI Pavlo Vakrushev/istock/thinkstock, LITRATO SA DATES PINAAGI SA aksphoto/istock/thinkstock