Unsa ang Atong Gituohan
Ang Ikapulo Nakatabang sa Pagtukod sa Gingharian sa Dios
Kita nagtuo sa paghatag sa ikapulo sa atong kinitaan ngadto sa Ginoo aron sa pagtabang og tukod sa Iyang gingharian. Ang balaod sa ikapulo nagmando nga kita mosakripisyo sa pipila sa atong materyal nga mga butang aron makatagamtam og mas dakong espirituhanong panalangin.
Ang baruganan sa ikapulo gibuhat na sukad ang ebanghelyo unang gitudlo dinhi sa kalibutan. Sama pananglit, si Abraham mibayad og ikapulo ngadto ni Melchizedek nga high priest (tan-awa sa Genesis 14:18–20). Ang Ginoo mimando kang Moises sa pagtudlo sa mga tawo kabahin sa ikapulo (tan-awa sa Levitico 27:30–34). Sa wala madugay, sa dihang ang Manluluwas mibisita sa mga Nephite, Iyang gihatag kanila ang balaod sa ikapulo (tan-awa sa 3 Nephi 24). Ug sa atong panahon, Iyang gipahiuli kini nga sugo pinaagi ni Propeta Joseph Smith (tan-awa sa D&P 119).
Sa pagtuman niining sugo, atong ihatag ang ikapulo sa atong kinitaan ngadto sa Ginoo pinaagi sa lokal nga mga lider sa priesthood. Ang mga pundo ipadala ngadto sa punoang buhatan sa Simbahan, diin ang konseho nga gilangkuban sa Unang Kapangulohan, Korum sa Napulog Duha ka mga Apostoles, ug ang Presiding Bishopric motino kon unsaon paggamit ang sagradong pundo (tan-awa sa D&P 120).
Ang ikapulo makapahimo sa Simbahan sa pagtukod ug pagmentinar sa mga templo ug meetinghouse, pagsuporta sa mga seminary ug institue, pagsangkap og mga materyal para sa mga miyembro sa Simbahan, ug sa pagmintinar sa misyonaryo, templo, ug buhat sa family history.
Kita nagtuo sa kinasingkasing nga pagbayad sa ikapulo, “kay ang Dios nagahigugma sa malipayong maghahatag” (2 Mga Taga-Corinto 9:7). Ang pagbayad sa ikapulo usa ka paagi nga kita makatabang sa pagtukod sa gingharian sa Dios dinhi sa kalibutan ug sa pagpakita og pasalamat sa Langitnong Amahan sa pagpanalangin sa unsay anaa kanato. Apan ang pagbayad sa ikapulo makahatag og mas daghang panalangin sa atong kinabuhi. Sama sa gitudlo ni Malaquias: “Dad-a ninyo ang tibuok nga ikapulo ngadto sa balay nga tipiganan, aron nga adunay kalan-on diha sa akong balay ug pinaagi niini sulayi ninyo ako karon, nagaingon ang Ginoo sa mga panon, kon dili ba buksan ko kaninyo ang mga tamboanan sa langit, ug bu-boan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini” (Malaquias 3:10). Maangkon ang espiritwal ug temporal nga mga panalangin niadtong mobayad og matinuorong ikapulo, bisan gamay og kantidad.
Ang ikapulo ug ubang mga donasyon ihatag ngadto sa Ginoo pinaagi sa usa ka sakop sa inyong bishopric o kapangulohan sa branch.
Ang mga pundo sa ikapulo ipadala gikan sa mga ward ug branch ngadto sa punoang buhatan sa Simbahan, diin usa ka konseho nga naglakip sa Unang Kapangulohan motino kon unsaon sa paggamit kining sagradong mga pundo.
Ang ikapulo gamiton sa pagtukod ug pagmentinar sa mga templo ug mga meetinghouse.
Ang ikapulo gamiton para sa paghubad ug pagmantala sa mga kasulatan ug mga materyales sa leksyon.
Ang ikapulo makatabang sa pagbayad alang sa pag-edukar sa mga batan-ong miyembro sa mga eskwelahan nga gipanag-iya sa Simbahan, sa seminaries, ug institutes of religion.
Mga paghulagway pinaagi ni David Habben