Ang Among Pinakanindot nga Gasa sa Pasko Sukad
Adriana Nava Navarro, Bolivia
Bisperas kadto sa Pasko, ug ang among pamilya nagpundok sama sa among gibuhat kada tuig aron sa pagsaulog. Ang orasan hapit na mobagting sa tungang gabii sa dihang gitawag kaming tanan ni Papa, nag-ingon nga aduna siyay ipakita namo.
Uban sa tanang pagpangandam ug kahinam nga mabati nianang Bisperas sa Pasko, ang akong mga igsoong babaye, inahan, ug ako wala makabantay kon unsay giandam ni Papa para sa okasyon. Sa dihang kaming tanan komportable nang nagpundok, misugod siya sa pagpakita kanamo og pipila ka slide.
Sa iyang slide show, nga nagpakita sa painting sa Manluluwas, mga eksena sa Pasko, ug maayong pagkamugna nga mga pulong, gipadayag ni Papa ang iyang gugma para namo. Ang iyang pasundayag nagpahinumdom usab kanamo sa tinuod nga kahulugan sa Pasko ug sa kalipay ug pasalamat nga angay namong bation para sa pagkatawo sa Manluluwas. Usa ka slide sa mabulukon nga Christmas tree nagpakita sa mga pulong, “Karong Pasko ang gugma ni Jesukristo makahatag nako og bag-ong kinabuhi.”
Ang pinaka espesyal nga bahin sa pasundayag ni Papa misunod sa dihang iyang gigamit ang slide sa painting sa Manluluwas sa pagpahibalo namo og balita. Dili lang kini basta-basta nga balita; kini ang pinakanindot nga balita sukad. Ibabaw sa Manluluwas mabasa ang mga pulong “Nakahukom ko nga magpabunyag sa Ang Simbahan ni Jesukristo sa mga Santos sa Ulahing mga Adlaw.”
Sa katapusan ang among amahan nakahukom nga magpamiyembro sa Simbahan! Kini nga desisyon mahimong sayon para sa uban, apan kini lisud para sa among amahan. Nagtuon siya sa ebanghelyo ug nagkat-on sa Simbahan sulod sa 25 ka tuig. Bisan pa sa among grabeng mga paningkamot ug daghang mga diskusyon uban ang misyonaryo, wala gihapon siya magpabunyag. Wala mi kasabut kon ngano, apan kami nasayud nga dili pa siya andam.
Moangkon ko nga may mga higayon nga mibati ko nga ang akong amahan dili na gyud magpabunyag. Sa akong lalum nga pagbati, hinoon, wala ko mawad-i og paglaum, ug kaming tanan nagpadayon sa pag-ampo para kaniya. Sa Bisperas sa Pasko, gitubag sa Ginoo ang among mga pag-ampo.
Sa dihang gipahibalo na mi sa among papa, kaming tanan nakahilak tungod sa kalipay. Wala mi kasabut sa among gipangbati—kahinam, kasurprisa, ug labaw sa tanan, hilabihan nga kalipay nga lisud ihulagway.
Ang pahibalo ni Papa wala lang makausab sa Bisperas sa Pasko—kini nakausab sa kinabuhi sa among tibuok pamilya. Kinahanglan gihapon kaming maglambo isip indibidwal ug isip pamilya, apan nasayud ko nga ang pagpadayon sa unahan mahimong mas maayo karon tungod kay kami nagkahiusa diha sa Simbahan.
Mapasalamaton kaayo ko sa Ginoo para niining panalangin. Sulod sa pipila ka bulan kami ma-sealed isip pamilya diha sa templo. Ang pagpahibalo ni Papa sigurado mao ang pinakanindot nga gasa sa Pasko sukad.
Ang pinaka espesyal nga bahin sa pasundayag ni Papa nahitabo sa dihang iyang gigamit ang slide sa painting sa Manluluwas sa pagpahibalo namo sa pinakanindot nga balita sukad.