Usa ka Tipik sa Pasko Matag Adlaw

Ni Kate Strongin

Gibase sa usa ka tinuod nga istorya

Ang tagsulat nagpuyo sa Utah, USA.

Ang tanang mga regalo giputos ug anaa sa ilawom sa kahoy. O ang tanan ba gyud?

“Malipayong Pasko! Ang kalipay anaa bisan asa!” (Songbook sa mga Bata, 51)

Hapit na gayud ang Pasko. Naghinam-hinam na si Amalie. Sa dili madugay ablihan na niya ang mga regalo ilawom sa kahoy!

Sa family home evening turno ni Mama sa paghatag sa leksyon.

“Nganong mohatag kita og mga regalo sa Pasko?” nangutana si Mama.

“Tungod kay adlawng natawhan ni Jesus!” miingon si Amalie.

“Nan dili ba diay kita mohatag og regalo Kaniya?” miingon si Mama.

Gitabangan ni Papa ang igsoong lalaki ni Amalie nga si Noah sa pagbasa sa usa ka kasulatan. Nag-ingon kini nga kon kita moserbisyo sa ubang mga tawo, kita nagserbisyo sa Dios (tan-awa sa Mosiah 2:17).

“Ang pagserbisyo ba sa uban naghatag og regalo ngadto ni Jesus?” miingon si Mama.

Miyango-yango si Noah.

“Unsa pa?”

“Ang pagsunod sa mga sugo,” miingon si Amalie.

“Ang pagpakabuotan,” miingon si Noah.

“Nindot kaayo nga mga ideya!” miingon si Mama.“Karon magdula ta. Mosulti ko og regalo nga gihatag sa usa ka tawo ngadto ni Jesus. Sultihi ko kon nakaila mo kinsa siya. Sugdan nato. Kini nga tawo mihatag og mga kard sa Pasko didto sa care center.”

Gipataas ni Noah ang iyang kamot. “Si Amalie ang mihimo niana!”

“Kini nga tawo nag-home teaching.”

“Si Papa kana,” miingon si Amalie.

Sa wala madugay ilang nahinganlan ang daghang mga regalo nga ila nang nahatag ngadto sa Manluluwas.

“Makahatag kita og regalo kada adlaw,” miingon si Mama.

Pagkasunod buntag panahon na sa paglimpyo sa balay. “Oh dili,” bagulbol ni Amalie. Apan nahinumdom dayon siya. Ang pagsebisyo sa uban usa ka regalo! Kon motabang siya ni Mama, pareho ra nga nagtabang ni Jesus. Nakakita siya og panapton ug gitrapohan ang mga counter hangtud nga misinaw kini.

Pagkasunod adlaw si Amalie nakakwarta.

“Ang imong ikapulo otso sentimos,” miingon si Mama.

Nahinumdom na usab si Amalie. Ang ikapulo usa ka sugo, mao nga ang pagbayad niini usa ka regalo. Mibutang siya og otso ka sentimos sa iyang sudlanan sa ikapulo.

Ulahing bahin nianang semanaha mitabang si Amalie sa pagpunit sa mga unlan. Gilabay kini sa iyang manghud nga lalaki gikan sa lingkuranan. “Laing regalo alang ni Jesus,” miingon siya.

Sa Gabii sa Pasko, si Mama ug Papa misulti ni Amalie nga sila mapasigarbuhon niya. “Ikaw naghatag og mga regalo ngadto ni Jesus sa tibuok semana,” miingon si Papa. “Susama kana nga dunay tipik sa Pasko kada adlaw.”

Naghigugma, Amalie

Mga paghulagway pinaagi ni Dilleen Marsh