Yancy

Ni Elder Brent H. Nielson

Sa Seventy

“Ug karon ako manghinaut nga kamo magpaubos, ug magmasinugtanon ug magmalumo” (Alma 7:23).

Ang akong mga igsoon ug ako gusto gyud og kabayo. Sa dihang ako nag-edad og 9 o 10 anyos, ang akong papa mipalit og matahum nga bayeng kabayo. Ginganlan namo siya og Yancy. Nalipay kaayo mi nga nakabaton niining kabayo, apan siya wala mabansay nga dunay mosakay niya. Bata pa kaayo mi nga maoy mohimo sa lisud nga trabaho sa pagbansay sa usa ka kabayo, mao nga ang akong papa mihangyo og usa ka higala nga daghan og nahibaloan mahitungod sa kabayo sa pagtabang sa pagbansay ni Yancy.

Pirme ming moadto sa balilihan aron motan-aw ni Yancy. Dili na mi makahulat sa adlaw nga kami makasakay niya. Apan bisan giunsa na lang ni bisan kinsa, walay makabansay ni Yancy. Dili kini mopatuo. Wala gayud kami makasakay niya.

Usa ka adlaw niana ang higala sa akong papa misulay sa pagsakay niya diha sa usa ka parada. Samtang si Yancy ug ang nagsakay niya nagsubay sa dalan, si Yancy misuki ug mipatid sa nagsakay ug misugod sa pagdagan agi sa siyudad. Nagpataka na lang og dagan si Yancy nga nasamad ang iyang tiil sa usa ka fire hydrant. Akong gigukod si Yancy ug nakit-an siya nga nagbuy-od sa dalan sa kasakit.

Naguol ko. Gimahal namo si Yancy. Kon nagmasulundon lang unta siya sa iyang tigbansay, malipayon unta siya nga kabayo uban sa nindot nga kinabuhi. Apan si Yancy dili maminaw ug mosunod sa iyang agalon. Hinoon karon nasamdan siya ug nagbuy-od sa tunga-tunga sa dalan.

Ang istorya ni Yancy nagtudlo nako sa mga panalangin nga moabut kon kita mosunod sa Agalon, ang atong Manluluwas nga si Jesukristo. Kon kita mabination ug malumo ug mapainubsanon, magmalipayon kita kon atong tugutan ang Manluluwas sa paggiya nato.

Paghulagway pinaagi ni Dan Burr