Mensahe sa Unang Kapangulohan
Pun-a ang Kalibutan sa Gugma ni Kristo
Ni Presidente Dieter F. Uchtdorf
Ikaduhang Magtatambag sa Unang Kapangulohan
Kon kita maghunahuna kabahin sa Pasko, kita kanunay maghunahuna sa paghatag ug pagdawat og mga gasa. Ang mga gasa mahimong kabahin sa gihambin nga tradisyon, apan kini makapahilayo usab sa yanong kahulugan sa panahon sa Pasko ug makapugong kanato sa pagsaulog sa pagkatawo sa Manluluwas sa makahuluganong paagi.
Nasayud ko gikan sa personal nga kasinatian nga ang labing mahinumduman nga panahon sa Pasko mao kadtong gisaulog sa pinakayano nga paagi. Ang mga gasa panahon sa akong pagkabata siguradong simple lang kon ikompara sa karon. Usahay nakadawat ko og giayo nga sinina o usa ka parisan nga gwantis o medyas. Kahinumdom ko og usa ka espesyal nga Pasko nga gihatagan ko sa akong igsoong lalaki og kahoy nga kutsilyo nga iyang gikulit.
Dili kinahanglan ang mahalong mga gasa aron mahimong makahuluganon ang Pasko. Napahinumduman ko sa istorya ni Elder Glen L. Rudd, kinsa miserbisyo isip sakop sa Seventy gikan 1987 hangtud 1992. Usa ka adlaw sa wala pay Pasko daghang tuig na ang milabay, samtang nagdumala siya sa balay tipiganan sa bishop, iyang nahibaloan gikan sa usa ka eklesyastikanhon nga lider kabahin sa nanginahanglang pamilya nga bag-ohay lang mibalhin sa siyudad. Sa dihang mibisita siya ngadto sa ilang gamayng apartment, iyang nakaplagan ang usa ka batan-ong single mother nga adunay upat ka anak nga wala pay mga 10 anyos.
Dako gyud ang panginahanglan sa pamilya nga ang ilang inahan dili makapalit og mga ikadalit o gasa para sa iyang mga anak niadtong Paskoha—dili gani siya makapalit og Christmas tree. Si Brother Rudd nakig-istorya sa pamilya ug nahibaloan nga ang tulo ka gagmayng mga babaye ganahan kaayo og manika o stuffed toy nga hayop. Sa dihang iyang gipangutana ang sayis anyos nga anak nga lalaki kon unsa iyang gusto, ang gigutom nga bata mitubag, “Ganahan ko og usa ka panaksan nga oatmeal.”
Gisaaran ni Brother Rudd ang batang lalaki og oatmeal ug uban pa. Dayon miadto siya sa balay tipiganan sa bishop ug nanguha og pagkaon ug ubang mga suplay aron matubag ang dinalian nga mga panginahanglan sa pamilya.
Niana gyung buntaga usa ka manggihatagon nga Santos sa Ulahing mga Adlaw mihatag kaniya og 50 dolyares “para sa tawo nga nanginahanglan.” Gamit kadto nga donasyon, gipundok ni Brother Rudd ang tulo sa iyang mga anak ug nag-Christmas shopping—iyang mga anak nagpili og mga duwaan para sa mga bata nga nanginahanglan.
Human gikargahan ang sakyanan og pagkaon, sinina, mga gasa, Christmas tree, ug pipila ka dekorasyon, ang pamilyang Rudd miadto sa apartment sa pamilya. Didto ilang gitabangan ang inahan ug iyang mga anak sa pagpahiluna sa Christmas tree. Dayon ilang gibutang ang mga regalo ubos niini ug gihatagan ang batang lalaki og usa ka dakong putos sa oatmeal.
Nakahilak ang inahan, nalipay ang mga bata, ug silang tanan nanganta og awit sa Pasko. Nianang gabhiona ang pamilyang Rudd nagpundok para panihapon, nagpasalamat nga sila nakahatag og kalipay sa Pasko ngadto sa laing pamilya ug nakatabang sa gamayng bata nga makadawat og usa ka panaksan nga oatmeal.1
Si Kristo ug ang Diwa sa Paghatag
Hunahunaa ang yano apan makahuluganong paagi sa pagpasidungog sa Langitnong Amahan sa pagkatawo sa Iyang Anak. Nianang balaanong gabii, ang mga anghel wala magpakita ngadto sa mga adunahan apan ngadto sa mga tigbalantay og karnero. Ang batang Kristo wala matawo sa usa ka mansyon apan sa usa ka pasungan. Siya wala giputos og panapton nga sida apan giputos sa mga bakbak.
Ang kayano nianang unang Pasko nag-una nga timaan sa kinabuhi sa Manluluwas. Bisan Siya ang naglalang sa yuta, nagpuyo nga harianon ug mahimayaon, ug nagbarug sa tuo nga kamot sa Amahan, Siya nagpakatawo sa kalibutan isip bata nga nagsalig sa uban. Ang Iyang kinabuhi usa ka sundanan sa yanong pagkahamili, ug Siya nakig-uban sa kabus, sa masakiton, sa masulub-on, ug sa nabug-atan.
Bisan tuod Siya usa ka hari, dili importante Kaniya ang pasidungog ni bahandi sa katawhan. Ang Iyang kinabuhi, Iyang mga pulong, ug Iyang matag adlaw nga mga kalihokan mga nindot kaayong ehemplo sa yano apan halawum nga dignidad.
Si Jesus ang Kristo, kinsa hingpit nga nasayud unsaon sa paghatag, nagpakita nato sa sumbanan sa pagkamahinatagon. Para niadtong mga kasingkasing nga napuno sa kamingaw ug kasubo, Siya nagdala og kalooy ug kahupayan. Para niadtong mga lawas ug hunahuna nga nagkasakit ug nag-antus, Siya nagdala og gugma ug pag-alim. Para niadtong mga kalag nga nabug-atan sa sala, Siya nagtanyag og paglaum, pagpasaylo, ug pagtubos.
Kon ang Manluluwas anaa uban nato karon, ato Siyang makaplagan sa dapit kon asa Siya kanunay—nangalagad ngadto sa maaghup, sa masulub-on, sa mapainubsanon, sa nahingawa, ug sa kabus sa espiritu. Niining panahon sa Pasko ug sa kanunay, unta kita mohatag og gasa ngadto Kaniya pinaagi sa paghigugma sama sa Iyang paghigugma. Unta kita mohinumdom sa mapainubsanong dignidad sa Iyang pagkatawo, mga gasa, ug kinabuhi. Ug unta kita, pinaagi sa atong yano nga mga buhat sa pagkamabination, gugmang putli, ug kalooy, mopuno sa kalibutan sa kahayag sa Iyang gugma ug gahum sa pag-alim.
Litrato sa mga bitoon pinaagi sa Alexandrum79/iStock/Thinkstock; SA YUTA PINAAGI SA STOCKBYTE; SA PANAKSAN pinaagi sa seregam/iStock/Thinkstock; sa oatmeal pinaagi sa Lisaison/iStock/Thinkstock; sa kutsara pinaagi sa Okea/iStock/Thinkstock