Iyang Gikinahanglan ang Akong Pagserbisyo Karon

Jean Hedengren Moultrie, Washington, USA

Naglingkod ko sa makina ug nagtahi og tinakdoan sa planela. Ang sumbanan gidesinyo nga pambata ang atubangan, ug mabulukon ang luyo sa habol nga akong gitahi nga para sa masuso.

Ang Relief Society sa among ward naghimo og mga newborn kit para sa mga kabus ug naigo sa kalamidad nga mga dapit. Dili pa ko maayo nga mananahi, apan mapasaligon ko nga miapil. Nalingaw ko sa pagpili og mga panapton para sa proyekto ug paggunting og mga square nga sama kadak-a sa habol.

Akong giabot ang mga tarung nga habig sa panapton, gitahi ang mga kilid, ug wala tahia ang tanan aron sa pagbali sa habol. Dayon akong gitahi ang mga kilid, giklip ang mga suuk niini, gibali ang habol aron ang mabulukon nga bahin maoy anaa sa gawas, ug dayon gitahi ang dapit nga wala pa matahi.

Akong gitahian subay sa ibabaw sa mga kilid aron malig-on ang sinumpayan. Akong gibutang ang panapton sa makina ug gipaspasan sa pagtahi. Samtang gidali-dali nako og human aron makabalik ko sa mga buluhaton sa balay, nakahunahuna ko og kalit: “Unsa kaha kon nagtahi ko niining habol para sa batang Jesus?”

Naghunahuna niini, naghinay-hinay ko ug giampingan nga matul-id ang tinahian. Apan bisan pa sa pag-amping, ang tinahian dili tul-id.

Sunod nagtahi ko og 10 ka pulgada (25 cm) nga square sa tunga-tunga aron masumpay ang atubangan sa likod. Naghimo ko og baga nga papel nga sundanan, gibutang sa tunga sa habol, ug gimarkahan. Akong giplastar ang panapton sa makina, maampingon nga gipahimutang ang dagom, ug hinay-hinay nga mitahi.

Sa dihang nahuman ko, akong giputol ang mga hilo ug gikuha ang nahuman nga habol. Dili kini square—mora kini og trapezoid ug parallelogram.

Akong gipadaplin ang habol, nagkuha og bag-ong planela, ug nagsugod pag-usab—mas naningkamot paghimo og gasa nga angay ihatag sa Dios. Apan bisan pa sa dugang paningkamot, ang resulta mas maayo lang og gamay. Ang kada habol nga akong gihimo dili perpekto.

Mibati ko nga wala koy madala nga habol ngadto sa dapit sa pundukanan, siguro dili karong tuiga. Magpadayon ko og bansay, ug tingali moabut ang adlaw nga makatampo ko.

Dayon nakahunahuna ko og laing ideya: “Kon magpaabut ka nga maperpekto ang imong pagtahi, ang batang Kristo maanaa na sa Ehipto.”

Nasabtan nako. Ang oportunidad sa pagserbisyo mawala na. Ang Manluluwas modawat sa atong mga halad kon atong buhaton ang atong pinakamaayo, bisan dili man kini hingpit. Nasayud ko nga ang bag-ong natawo, giputos sa humok, limpyo nga habol, dili mobalibad nga matulog niini tungod lang nga ang mga suuk dili eskwalado.

Samtang namalandong ko kon ang akong paningkamot aduna bay epekto sa tibuok kalibutan nga panginahanglan, akong nahunahunaan ang tambag ni Kristo: “Maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:40).

Busa nagpadayon ko sa pagtahi og mga habol, naningkamot nga mahimo kining nindot kutob sa akong mahimo. Nasayud ko nga adunay panginahanglan karon, dili sa walay klaro nga panahon sa umaabut nga maayo na kaayo kong motahi.