Mensahe sa Visiting Teaching
Ang Balaan nga Misyon ni Jesukristo: Prinsipe sa Kalinaw
Tun-i sa mainampuong paagi kini nga materyal ug tinguhaa nga masayran kon unsa ang ipakigbahin. Sa unsang paagi ang pagsabut sa kinabuhi ug misyon sa Manluluwas makadugang sa inyong pagtuo diha Kaniya ug makapanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
“Ang Manluluwas mao ang tinubdan sa tinuod nga kalinaw,” miingon si Elder Quentin L. Cook sa Korum sa Napulog Duha ka mga Apostoles. “Bisan sa pagsulay sa kinabuhi, tungod sa Pag-ula ug grasya sa Manluluwas, ang matarung nga pagpuyo pagagantihan og personal nga kalinaw.”1 Ang pagsabut nga si Jesukristo mao ang Prinsipe sa Kalinaw makatabang kanato sa pagkaplag og kalinaw sa kaugalingon ug paglambo sa atong pagtuo diha Kaniya.
Si Jesukristo miingon: “Gisulti ko kini kaninyo aron nga dinhi kanako makabaton kamo og kalinaw. Dinhi sa kalibutan aduna kamoy kagul-anan: apan sumalig kamo; gidaug ko na ang kalibutan” (Juan 16:33). Nagpamatuod sa kamatuoran, si Linda S. Reeves, ikaduhang magtatambag sa kinatibuk-ang kapangulohan sa Relief Society, miingon: “Ang Ginoo nagmaloloy-on kanako ug mitabang kanako nga mogaan ang akong mga alantuson. Mitabang Siya kanako nga mobati og tumang kalinaw.”2
Si Elder Richard G. Scott sa Korum sa Napulog Duha ka mga Apostoles mitudlo: “Ang nindot nga lugar … niana nga kalinaw mao ang atong kaugalingong panimalay, diin atong gibuhat ang tanan sa paghimo ni Ginoong Jesukristo nga mao ang sentro.”3
Dugang nga mga Kasulatan
Isaias 9:6; Lucas 2:14; Juan 14:27; 1 Nephi 13:37; Doktrina ug mga Pakigsaad 59:23
Gikan sa mga Kasulatan
Si Isaias nanagna sa pagkatawo ni Jesukristo, ang Prinsipe sa Kalinaw (tan-awa sa Isaias 9:6). Sa Amerika, si Samuel ang Lamanite namulong sa mga timailhan nga mahitabo sa pagkatawo ni Kristo iniglabay sa lima ka tuig (tan-awa sa Helaman 14:3, 5). Sa nagkaduol na ang gipanagna nga adlaw, ang mga dili tumutuo mihulga nga patyon ang tanang mga Kristyano kon kining mga timailhan dili mahitabo. Si propetang Nephi “nangamuyo pag-ayo ngadto sa Ginoo sa tibuok adlaw; ug tan-awa, ang tingog sa Ginoo miabut nganha kaniya, nag-ingon: … Pagkaugma moabut ako diha sa kalibutan” (3 Nephi 1:12–13). Ang mga timailhan natuman, ug uban sa pagkatawo ni Kristo, “ang mga katawhan misugod na usab sa pagbaton og kalinaw sa yuta” (bersikulo 23).
Sa Betlehem, si Maria “[nanganak sa] iyang panganay nga usa ka lalaki, ug kini iyang giputos sa mga bakbak, ug gipahigda sa pasungan” (Lucas 2:7).
Detalye gikan sa ANG MANLULUWAS NATAWO, ni Joseph Brickey