Ang Tubag sa Tanang Lisud nga mga Pangutana
Kon mag-atubang og lisud nga mga pangutana, usa lang ka butang ang mahinungdanon.
Ang mga pangutana sa kinabuhi nga atong masugatan dili kanunay sayon tubagon. Pipila sa personal natong mga hagit—sama pananglit, kamatayon sa anak, pagluib sa usa ka higala, o walay swerte nga kalisud sa pinansyal—sa kanunay dili sayon masabtan, ug nagkinahanglan ta og maluluy-ong suporta niadtong naglibut nato. Usahay ang pinakalisud niining mga sitwasyona mao ang pag-ila nga ang atong Langitnong Amahan naghigugma kanato ug wala magsilot kanato, bisan tuod ang rason sa pagsulay, kon aduna may rason, wala pa nato masabti.
Ang pipila sa labing lisud nga mga pangutana moabut kon ang atong gituohan wala mahiuyon sa nagkausab nga uso sa kultura o sa bag-ong impormasyon, usahay sayop nga impormasyon, nga isudya kanato sa mga kritiko sa Simbahan. Niining mga panahona, ingon og ang atong mga sukaranan sa doktrina o kasaysayan dili ingon niana kalig-on sama sa atong gihunahuna. Mahimo kitang matintal sa pagduha-duha sa mga kamatuoran nga atong gisayon-sayon lang ug sa espirituhanong mga kasinatian nga nakamugna sa atong pagtuo.
Unsay atong buhaton kon atong bation sa kasingkasing ang pagduha-duha? Aduna ba gyuy tubag niadtong lisud nga mga pangutana?
Oo, aduna. Sa pagkatinuod, tanang mga tubag—tanang sakto nga mga tubag—mag-agad sa tubag sa usa lang ka pangutana: mosalig ba ko sa Dios labaw pa sa tanang butang?
Yano apan Dili Sayon
Kana ba nga pamaagi yano ra kaayo? sayon ra kaayo?
Tingali. Ang tinuod dili kanunay tataw, ilabi na kon kini makigkompetensya sa mga alternatibo nga gipresentar sa nindot kaayong mga putos. Kasagaran usa lang ka bahin sa kamatuoran ang atong nasabtan, samtang ang tibuok niini ato pang kat-unon. Ug sa pagkat-on, mag-atubang kita sa dili komportabling posibilidad nga isalikway ang dili hingpit apan makahupay nga mga pagsabut. Apan ang pagsalig nga ang Dios anaa sa tanang tubag, nga Siya nahigugma kanato, ug Siya motubag sa tanan natong mga pangutana—sa Iyang paagi, sa Iyang panahon—makapasayon sa atong pagsiksik. Dili kini kanunay sayon, apan ang yano nga pagsalig sa tambag sa Dios makatabang nato sa pagbuntog sa pagduha-duha.
Atol sa Oktubre 2013 nga kinatibuk-ang komperensya sa Simbahan, si Presidente Dieter F. Uchtdorf, Ikaduhang Magtatambag sa Unang Kapangulohan, namulong niining makahuluganong obserbasyon:
“Natural lang nga dunay mga pangutana—ang gamayng liso sa matinuorong pangutana sagad mogitib ug mohingkod sa pagkadakong kahoy sa panabut. Dunay pipila ka miyembro sa Simbahan kinsa, sa usa ka higayon, wala makasulay og seryuso o sensitibong mga pangutana. Usa sa mga katuyoan sa Simbahan mao ang pag-alima ug pag-ugmad sa liso sa pagtuo—bisan sa balason nga yuta sa pagduhaduha ug kawalay kasiguroan. Ang hugot nga pagtuo molaum sa mga butang diin dili makita diin mga tinuod.
“Busa, akong mga kaigsoonan—akong mga higala—palihug, duhaduhai una ang imong pagduhaduha sa dili pa mo magduhaduha sa inyong pagtuo. Dili gayud nato tugutan nga himoon kitang binilanggo sa atong pagduhaduha ug ilayo kita sa diosnong gugma, kalinaw, ug gasa nga moabut pinaagi sa pagtuo kang Ginoong Jesukristo.”1
Pipila sa Makatabang nga mga Baruganan
Busa unsaon nato nga matinud-anong magduha-duha sa atong mga pagduha-duha? Unsaon nato pag-angkla sa atong pagtuo diha sa lig-ong bato sa pagpadayag ug dili sa balasnong yuta sa nag-usab-usab nga pagsabut sa tawo? Makatabang nga kanunayng hinumduman ang mosunod nga mga baruganan.
Baruganan 1: Ang Ginoo Walay Kinutuban ang Kahibalo Kay Kanato. Kon mag-atubang og mga pangutana—ma-personal, sosyal, o sa doktrina—kita makasalig sa kamatuoran nga ang Tiglalang sa uniberso mas labawng nasayud kay kanato. Kon Siya mihatag og gibug-aton sa usa ka hilisgutan (ug usahay dili), kita makasalig nga ang Iyang panglantaw mas klaro kay sa atong panglantaw.
“Kay ang akong mga hunahuna dili mao ang inyong mga hunahuna, ni ang inyong mga dalan akong mga dalan, nagaingon ang Ginoo.
“Kay maingon nga ang mga langit hataas kay sa yuta, mao man ang akong mga dalan labi pang hataas kay sa inyong mga dalan, ug ang akong mga hunahuna kay sa inyong mga hunahuna” (Isaias 55:8–9).
Baruganan 2: Ang Dios Nagpakigbahin sa Pipila sa Iyang Kahibalo. Sumpay sa baruganan 1 nga ang Dios mopakigbahin kanato kutob sa Iyang nasayran nga andam natong dawaton ug andam Niyang ihatag. Kinahanglang andamon lang nato ang atong kaugalingon sa pagdawat niini, ug dayon tinguhaon kini. Ang mga kasulatan nagtubag sa daghang mga pangutana. Usa sa pinakanindot niining kinabuhia mao ang matudloan sa Espiritu Santo samtang Iyang gigamit ang kasulatan sa pagpadayag “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” (2 Nephi 28:30) isip tubag sa atong makugihong pagtuon.
Pipila sa mga pangutana, ilabi na kon may kalabutan sa kasaysayan, adunay balido nga mga pagpasabut, ug kon mas daghang impormasyon ang gipagawas sa matinud-anong pagtuon, mahimong mas klaro ang atong panglantaw.
Kita usab napanalanginan nga adunay buhi nga mga propeta ug mga apostoles nga nagtudlo kanato ubos sa inspirasyon sa langit. Dili na kita “igatuyatuya, ug igaliyokliyok sa tanang hangin sa tuloohan.” Kita makasalig nga ang ilang hiniusang paggiya makatabang “hangtud makakab-ot kitang tanan sa pagkahiniusa sa pagtuo ug sa kahibalo mahitungod sa Anak sa Dios.” (Tan-awa sa Mga Taga-Efeso 4:11–15.)
Baruganan 3: Kita Makasalig sa Gugma sa Dios. Ang Dios nahigugma kanato sobra pa kay sa atong mahunahuna. Kita Iyang mga anak, ug gusto Niya nga kita makabalik ngadto sa Iyang presensya isip hamtong, mahimayaong mga linalang nga mahimong mahisama Kaniya (tan-awa sa Moises 1:39). Ang tanang tambag nga Iyang gihatag kanato gihatag uban sa dakong gugma aron sa pagpanalangin nato sa kahangturan. Kita hingpit nga makasalig niana nga gugma.
“Pagkabililhon sa imong mahigugmaong kalolot, Oh Dios! tungod niana ang mga anak sa mga tawo mingdangop sa ilalum sa landong sa imong mga pako” (Salmo 36:7).
Baruganan 4: Kita Kinahanglang Magtinguha og Espirituhanong Kumpirmasyon. Kon daghan kaayong kaalam sa kalibutan ang sukwahi ngadto sa Dios, dili kita angay nga matingala. Human sa tanan, pinaagi sa balaanong plano, kita nagpuyo sa napukan nga kalibutan diin kita nahilayo sa presensya ug hunahuna sa Dios. Kini nga kahimtang makapalisud sa pagsabut sa mga butang sa Dios, “kay kinsa bang pagkatawhana ang nasayud sa mga hunahuna sa tawo, gawas sa espiritu nga anaa nianang tawhana? Maingon man usab, walay bisan usa nga makasabut sa mga hunahuna sa Dios, gawas sa Espiritu sa Dios. …
“Ang tawo nga kalibutanon dili magadawat sa mga igatudlo sa Espiritu sa Dios: kay alang kaniya kini mga binoang: ug siya dili arang makasabut niini, tungod kay kini ugod kinahanglan mang pagatugkaron sa espirituhanon nga paagi” (1 Mga Taga-Corinto 2:11, 14).
Kon buot natong sabton ang mga butang sa Dios, dili kita makasalig lang sa kaalam sa tawo sa pagbuhat niini. Kinahanglan nato ang Espiritu sa Dios “aron kita managpakasabut sa mga hiyas nga gikahatag kanato sa Dios. … nga gitudlo sa Espiritu; nga kita magahubad sa mga kamatuoran nga espirituhanon ngadto sa mga tawo nga espirituhanon” (1 Mga Taga-Corinto 2:12–13).
Kon kita mabunyagan ug makumpirmahan nga miyembro sa Simbahan ni Kristo, kita mahatagan sa gasa sa Espiritu Santo. Uban niana nga gasa, kita makakat-on gikan sa Espiritu ug makadawat sa Iyang mahupayong kumpirmasyon sa kamatuoran. Ang pagdawat niining espirituhanong kumpirmasyon mas siguradong makapawala sa pagduha-duha kay sa labing makakombinser nga pangatarungan, ug kini anaa sa tanan niadtong nagtinguha sa kamatuoran pinaagi sa kinasingkasing nga pag-ampo, makugihong pagtuon, ug pagsunod sa mga sugo sa Ginoo.
“Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Mateo 7:7).
Baruganan 5: Kita Kinahanglan nga Magpaabut sa Ginoo. Usahay kita walay mahunahunaan samtang kita nanglimbasug sa pagsabut sa atong mga pagsulay ug mga pangutana. Bisan pa sa atong pinakamaayong paningkamot, dili kita makasabut. Ang kalangitan daw sirado. Kana mao ang panahon nga ang atong pagsalig sa Dios makapahimo kanato nga magbaton og pailub sa pagpaabut Kaniya. Dili tanang mga pangutana matubag diha-diha dayon o niining kinabuhia. Dili tanang mga pagsulay matapos sa dili pa magbulag ang lawas ug espiritu. Apan kon atong gihigugma ang Dios labaw sa tanan, kon kita nagsalig sa Iyang gugma para kanato, kita makalahutay uban sa pagtuo hangtud moabut ang panahon nga tangtangon ang tabil ug ang tanan mahimong klaro.
“Itugyan mo sa Ginoo ang imong dalan; sumalig ka usab kaniya; ug siya magabuhat niana.
“Ug siya magapahayag sa imong pagkamatarung ingon sa suga, ug sa imong katul-id ingon sa udto sa adlaw.
“Mopahulay ka sa Ginoo, ug maghulat ka kaniya” (Salmo 37:5–7).