Andam na nga Mopadayon sa Unahan
Pagbalhin gikan sa Primary ngadto sa Young Men o Young Women? Susiha kini nga mga ideya gikan sa pito ka 12 anyos kinsa naghimo niana nga transisyon.
Aïolah ug Evaline V.
Mga litrato sa maayong kabubut-on ni Richard M. Romney, Randall R. Ripplinger, ug Mickey Shimomiya
Kamo hapit na mag-12 anyos. Ang kinabuhi puno sa mga kausaban. Sa simbahan, ikaw mobalhin gikan sa Primary ngadto sa Young Men o Young Women. Kana nagpasabut sa paghimo og mga tumong, paghatag og serbisyo, pag-andam alang sa templo, pagkat-on og dugang mahitungod sa ebanghelyo. Apan ayaw kabalaka! Ang uban nga miagi usab sa samang butang miingon nga nindot kini.
Magtinabangay
Si Aïolah V. sa France 12 anyos nga Beehive. Mao usab ang iyang igsoong babaye nga si Evaline, nga mag-13 anyos human sa sunod bulan. “Nalipay ko nga ang akong igsoong babaye anaa aron sa pagtabang nako sa pagbalhin gikan sa Primary ngadto sa Young Women,” miingon si Aïolah.
Usa sa ilang paborito nga mga butang mao ang Personal nga Kauswagan, apan sa dihang mibasa sila og usa ka tumong, nangatawa sila. “Pagkat-on sa pagpatukar og instrumento sa musika,” miingon kini.
“Nakapatukar na mi sulod sa daghang mga tuig,” miingon si Evaline. Apan sila nakig-istorya sa ilang inahan. Mitabang siya nila nga makakita nga ilang magamit ang musika sa pagtuman sa laing tumong: ang pagserbisyo.
Si Aïolah ug Evaline karon nag-andam sa pagpasundayag diha sa mga sakrament miting ug sa mga gabii sa talento, maghimo og konsyerto alang sa mga bata ug mga senior, ug moduyog sa mga misyonaryo kon sila manganta.
“Ang Personal nga Kauswagan nindot,” miingon si Evaline. “Makapabuhat kini unsay inyong gusto ug mobuhat og bag-ong mga butang usab.”
Pangutana
Brian R.
Ang dose anyos nga si Brian R. sa Arizona, USA, nag-andam sa pagpasa sa sakrament alang sa unang higayon. Dili siya gusto nga masayop, mao nga mihangyo siya sa ubang mga tighupot sa Aaronic Priesthood sa iyang ward aron sa pagpasabut kaniya.
“Maayo kaayo sila,” miingon siya. “Misulti sila nako asa mobarug, asa moadto, ug unsaon sa pagpasa sa mga tray.”
Apan ang mas importante, sila mipahinumdom kaniya nga magpakita og balaang pagtahud. “Kinahanglan tang mahinumdom sa Manluluwas samtang atong ipaambit ang sakrament,” miingon si Brian. “Kon kita dunay balaang pagtahud, makatabang kini sa uban sa paghinumdom usab Kaniya.”
Nakat-on si Brian nga ang uban malipayon sa pagtabang kaniya sa pagpasabut sa iyang mga katungdanan ug sa pagkat-on sa paghimo niini nga maayo. “Pangutana lang,” siya miingon. “Ang pagbalhin gikan sa Primary ngadto sa Young Men mas sayon kay sa imong hunahuna.”
Pakig-amigo og Bag-ong mga Higala
Nodoka T.
“Nakulbaan ko sa dihang ang magtatambag midapit nako nga moadto sa kamping sa Young Women sa stake sa unang higayon,” miingon si Nodoka T. sa Okinawa, Japan. “Ako nakahukom nga mag-ampo. Human sa akong pag-ampo ako mibati og kakomportable, busa mihukom ako sa pag-adto.
“Gikan sa unang adlaw, ako nakaamigo og bag-ong mga higala. Ang batan-ong mga babaye mga buotan kaayo ug mabination kanako; sa wala madugay nawala ang akong kahadlok. Ug ako nakakat-on sa paglimpyo sa tubig, paghigot, paghimog bendahe, pagpahigayon og rescue breathing, ug sa pagpangita og makaon nga mga tanom!”
Mibati nga Giabi-abi
“Ang akong unang adlaw sa Young Women mao ang akong adlawng natawhan,” miingon si Grace S. sa Arizona, USA. “Nagkaguliyang sila mahitungod niini, apan human niana nagmabination na sila. Ila kong gipabati nga giabi-abi ko.”
Ang iyang adviser usab miabi-abi niya. “Siya naghisgot sa mga butang nga iyang gibuhat sa dihang anaa pa siya sa Young Women,” miingon si Grace. “Ug ganiron niya ang booklet sa Personal nga Kauswagan sa matag usa namo, aron sa pagsiguro nga kami nakasabut.”
Pagkat-on, Pagtudlo, ug Pagpakigbahin
Josh W.
Isip usa ka bag-o nga deacon, si Josh W. sa Utah, USA, gihangyo nga motudlo og leksyon kabahin sa pagkahimong disipulo. “Nabasa nako ang kasulatan kabahin ni Pedro ug sa uban nga nangisda. Ilang gisulayan ang usa ka bahin sa sakayan ug walay nakuha,” miingon si Josh. “Dayon ang Manluluwas misulti nila sa pagpangisda sa pikas nga bahin, ug nakakuha sila og daghang mga isda (tan-awa sa Lucas 5:5–11 ug Juan 21:6–11). Mao nga sa akong mga leksyon, gibasa namo kana. Dayon gihisgutan namo kon sa unsa nga paagi mahisama kini alang namo. Kon kita mosalig lang sa atong kaugalingon, magkaproblema kita. Apan kon kita maminaw sa Ginoo, motabang Siya nato.”
Miingon si Josh nga ang pagkat-on, pagtudlo, ug pagpakigbahin importante sa Young Men. “Sa Primary daghan kitag makat-unan ug dunay daghang mga kalihokan, miingon siya. “Karon daghan ang atong nakat-unan ug gipakigbahin. Kana nagpasabut sa pagbuhat og daghan sa unsay atong nakat-unan.” Sama pananglit, human sa usa ka leksyon sa priesthood, giimbitar ni Josh ang usa ka higala kinsa wala na makasimba sa dugayng panahon. “Ang iyang mga ginikanan motrabaho sa mga Dominggo, mao nga dili siya makasimba. Apan giingnan nako siya nga mahimong mokuyog siya nako.”
Nagkat-on si Josh sa katuyoan sa Young Men ug Young Women. “Mao ang pagpakita nato sa unsang paagi nga mahimong mas sama sa Manluluwas,” miingon siya. Nasayud siya nga ang panawagan sa “pagduol ngadto ni Kristo” nagpasabut sa pagsubay sa usa ka dalan nga nagsugod sa bunyag ug kumpirmasyon, mopadayon padulong sa templo, ug mosangpot ngadto sa kinabuhing dayon
“Andam na ako nga mopadayon,” miingon siya.