Ang Manluluwas ug ang Sakrament
Ni David L. Beck
Kinatibuk-ang Presidente sa Young Men
Sa inyong pag-ambit sa sakrament, inyong gibag-o ang inyong pakigsaad sa paghinumdom kanunay sa Manluluwas.
Unsay inyong gihunahuna kon kamo mokaon sa pan ug moinom sa tubig sa sakrament o kon kamo nag-andam, nagpanalangin, o nagpaambit sa sakrament? Kadaghanan nato namalandong sa atong mga pakigsaad ug sa unsang paagi kita nagpakabuhi. Naghunahuna kita mahitungod sa atong mga sala ug nag-ampo alang sa kapasayloan ug determinado sa pagbuhat og mas maayo.
Kini mao ang importante nga mga aspeto sa ordinansa sa sakrament. Agig dugang, aduna pay lain nga pamalandungon—butang nga makahuluganon ug piho kaayo nga kini kabahin sa mga pag-ampo sa sakrament mismo. Kini mao ang paghinumdom ni Jesukristo, ang Anak sa Dios, ang Manluluwas sa kalibutan. Kadtong kinsa mokaon sa pan mosaad nga “mokaon agi og handumanan sa lawas [sa] Anak” ug sa “kanunay mohinumdom kaniya” (D&P 20:77). Sa susamang paagi, kadtong kinsa moinom sa tubig mosaad nga moinom “agi og handumanan sa dugo [sa] Anak” ug “nga sila sa kanunay mahinumdom kaniya” (D&P 20:79).
Ang pagpili sa paghinumdom sa Manluluwas ug sa Iyang Pag-ula ug sakripisyo mao ang sukaranan sa ordinansa. Sama sa gitudlo ni Elder Jeffrey R. Holland sa Korum sa Napulog Duha ka mga Apostoles, “Sa yano ug maanindot nga pinulongan sa mga pag-ampo sa sakrament … ang importante nga pulong nga atong madungog ingon og ang hinumdom. … Unsa ang gipasabut sa duha ka pag-ampo mao nga kining tanan gihimo agi og handumanan ni Kristo. Mao nga sa pag-apil kita nagsaksi nga kita mohinumdom kanunay Kaniya, nga kita makabaton kanunay sa iyang Espiritu uban kanato.”1
Gipasabut sa Manluluwas ang sama nga mga punto sa dihang Iyang gipasiugdahan ang sakrament uban sa Iyang mga Apostoles atol sa Pagpalabay didto sa Jerusalem sa katapusang gabii sa Iyang mortal nga pangalagad—ang gabii nga nag-antus Siya alang kanato didto sa Tanaman sa Getsemani sa wala pa mag-antus pag-usab diha sa krus. Sama pananglit, human makahatag nila sa pan nga kaunon, miingon Siya, “Kini mao ang akong lawas nga gihatag alang kaninyo: Buhata ninyo kini sa paghandum kanako” (Lucas 22:19–20; tan-awa usab sa Mateo 26:26–28).
Atol sa unang adlaw sa Manluluwas taliwala sa mga Nephite didto sa Amerika, gitudloan usab Niya sila sa ordinansa sa sakrament. Pag-usab, Iyang gisugo sila sa pag-ambit agi og handumanan sa Iyang lawas ug dugo ug misulti kanila nga kon ilang buhaton, “kini mao ang usa ka pagpamatuod ngadto sa Amahan nga kamo sa kanunay mahinumdom kanako” (3 Nephi 18:7). Dayon Siya misaad kanila, “Kon kamo sa kanunay mahinumdom kanako kamo makaangkon sa akong Espiritu uban kaninyo” (3 Nephi 18:7, 11).
Pagkatalagsaon nga panalangin! Sa usa ka kalibutan nga puno sa mga hagit ug kasamok ug mga tintasyon nga kanunayng naningkamot sa pagpahisalaag kanato, unsa pay mas importante nga gasa nga atong maangkon? Pinaagi sa pagbaton sa Espiritu uban nato, kita “makahibalo sa kamatuoran sa tanan nga mga butang” (Moroni 10:5). Kana makahatag nato sa gahum ug kaalam sa pagpuyo sa paagi nga gusto sa Ginoo nga atong puy-an, sa paghimo og sakto nga mga pagpili, sa pagserbisyo nga matinud-anon, ug sa pagkahimong sama Kaniya.
Samtang kamo moapil sa sakrament matag semana, unsay inyong mahimo sa paghinumdom kaniya? Unsay inyong mahimo aron kanunay nga mahinumdom Kaniya—sa tibuok semana ug sa inyong tibuok kinabuhi?
Imbitaron ko kamo sa pagpamalandong niadto nga mga pangutana ug sa paghimo og pasalig nga sa kanunay mohinumdom sa Manluluwas. Matingala mo kon sa unsang paagi kini makapausab sa inyong kinabuhi.