Mga Pangutana ug mga Tubag
“Unsay akong buhaton kon bugal-bugalan ko sa eskwelahan sa pagsunod sa mga sumbanan sa Simbahan?”
Kon ikaw bugal-bugalan sa pagsunod sa mga sumbanan sa Simbahan, mahimong imo kining himoong oportunidad sa pagrepresentar ni Jesukristo. Pagmatinahuron ug pagmaloloy-on. Kon giaghat, mahimo nimong ipasabut nganong ikaw nagpuyo nga ingon niana. Ikonsiderar ang paggamit sa Alang sa Kalig-on sa Kabatan-onan sa pagtabang nimo sa paghisgot sa imong mga sumbanan. Dapita ang Espiritu nganha sa imong kinabuhi aron Siya makatandog sa mga kasingkasing sa imong mga kaedad. Ang Espiritu makatabang nimo nga makahibalo unsay isulti.
Makapangayo usab ikaw og tambag sa imong mga ginikanan, sa mga lider sa Simbahan, o sa full-time nga mga misyonaryo. Pangutan-a sila kon giunsa nila pagtubag ang susama nga mga sitwasyon.
Usahay ikaw mobati nga matintal sa pagpakiglalis sa uban mahitungod sa imong pagtuo. Apan hinumdumi nga “siya nga may espiritu sa panagbingkil dili gikan [ni Kristo]” (3 Nephi 11:29).
Usahay, ikaw mobati nga gipugos sa pag-uyon ug paghunong sa pagsunod sa mga sumbanan sa Simbahan. Pagmalig-on. Ang pagbarug nga lig-on dili lamang mopanalangin og kalinaw sa imong kinabuhi, apan kini makapanalangin sa mga kinabuhi sa imong mga kaedad. Ang imong ehemplo makaawhag nila sa paghimo og matarung nga mga desisyon.
Tan-awa ang ehemplo sa Manluluwas alang sa kalig-on. Ang Manluluwas gibiay-biay tungod sa pagbarug sa kamatuoran (tan-awa sa Isaias 53). Nasayud gayud siya unsay imong gibati. Gihimo Niya ang Pag-ula alang kanimo ug nakasinati sa samang mga pagsulay nga imong giatubang. Nag-uban Siya kanimo. Pagtuon pa og dugang mahitungod sa Iyang kinabuhi aron ikaw mahisama Kaniya niini nga mga sitwasyon.
Gunit sa Gunitanan
Kon ang mga tawo magbugal-bugal nako sa eskwelahan, maghunahuna ko sa panan-awon ni Lehi mahitungod sa dako ug lapad nga gambalay: “Kini napuno sa mga katawhan, mga tigulang ug mga batan-on, mga lalaki ug mga babaye, ug ang matang sa ilang panaput hilabihan kaanindot; ug ang ilang mga kinaiya ingon og nagbiay-biay ug nagtulisok sa ilang mga tudlo paingon ngadto kanila kinsa miabut ug mikaon sa bunga” (1 Nephi 8:27). Ako mahisama ni Lehi. Dili gayud ako mamuhi niining gunitanan nga puthaw nga naggiya ngadto sa kinabuhing dayon.
Pierre S., edad 18, Haiti
Ipakigbahin ang Inyong Pagpamatuod
Kon nakahibalo na kamo sa mga panalangin nga mosunod tungod sa pagpuyo sa mga sumbanan, dili na kamo angay nga maulaw kon bugal-bugalan. Makatudlo kamo sa mga sumbanan ug makapaambit sa pagpamatuod sa pagpuyo niini. Ang inyong mga kaedad mahimong makat-on ug mapuno sa Espiritu tungod kay kamo nakigbahin og pagpamatuod sa ebanghelyo.
Emmanuel A., edad 16, Ghana
Pagpakigbahin sa Ebanghelyo:
Samtang usa ka higala ug ako nagkompleto sa hiyas nga proyekto sa mithi alang sa Personal nga Kauswagan, magbasa kami sa Basahon ni Mormon didto sa eskwelahan kon walay klase. Ang among magtutudlo ug ang among mga kauban sa klase nagsugod sa pagbugal-bugal namo. Dihay higayon nga gusto kong mohunong sa pagbasa, apan dili nako ikabilin ang akong mga kasulatan sa balay. Nagpadayon kami sa pagbasa didto sa eskwelahan, ug sa kadugayan wala nay nagbugal-bugal namo. Usa sa among mga higala nainteresado sa ebanghelyo ug sa Personal nga Kauswagan. Gihatagan namo siya sa booklet ug triple combination, ug sukad niadto gihisgutan namo niya ang mahitungod sa ebanghelyo. Ang iyang igsoong lalaki nainteresado usab sa ebanghelyo. Silang duha nagbasa na sa Basahon ni Mormon.
Kimberly A., edad 16, Brazil
Pagpakita og Ehemplo
Sa akong eskwelahan, diyutay ra nga mga estudyante ang pamilyar sa ebanghelyo. Sa akong hunahuna ang labing maayong butang nga inyong mahimo mao ang pagpakita sa mga tawo sa unsa nga paagi nga ang pagpuyo sa ebanghelyo positibong makaapekto kaninyo. Ang pagkamabination ug pagkamatinahuron bisan unsa pay ilang isulti kaninyo, nagpakita kamo og talagsaong ehemplo, ug sila magbaton og dakong pagtahud kaninyo ug sa inyong pagtuo. Makahinumdom sa inyong ehemplo, kadtong mga tawhana mahimong bukas unya sa pagkat-on og dugang mahitungod sa ebanghelyo.
Kelsey P., edad 14, Florida, USA
Hinumdumi Kon Kinsa Kamo
Alang sa mga kalihokan sa eskwelahan, ang akong mga kauban sa klase o bisan ang akong mga higala mosulti nako sa pagsul-ob og mga sinina nga dili makapahimuot sa mga mata sa Dios. Moingon sila, “Kinahanglang cute ka tan-awon. Kinahanglang lahi ka tan-awon.” Usahay moingon sila nga kinahanglang kalimtan nako ang akong mga pagtuo aron mahiangay niini nga kalibutan. Apan ang akong tubag kanunay nga dili. Nasayud ko nga ang akong tinuod nga pagkatawo mao ang pagmatinud-anon ug lahi gikan sa kalibutan. OK ra kon dili sila gusto nako sa akong pagkaako. Dili kini mahitungod sa unsay isulti sa uban; mahitungod kini sa pagsunod sa mga pamaagi sa Langitnong Amahan.
Jazzy C., edad 19, Philippines
Pagkahimong usa ka Misyonaryo
Duna koy daghang mga kasinatian kabahin sa pagpuyo sa mga sumbanan sa ebanghelyo didto sa eskwelahan Nakat-unan nako nga kini usa ka labing maayong higayon alang nato sa paglig-on sa atong mga pagpamatuod ug pag-apil sa misyonaryo nga buhat. Kon akong makita ang akong kaugalingong sa usa ka sitwasyon sama niini ug ipataas ang akong mga sumbanan, gibati nako ang kalipay sa kaugalingon sa pagbuhat unsay gusto sa Dios nga akong buhaton. Ayaw gayud paghambin og pagduha-duha kon kinsa kamo ug unsay inyong gituohan.
Hiram D., edad 18, Brazil