Asa Man Ko?
Unsaon sa Pagdiskobre ug Pagpalambo sa Inyong Espirituhanong mga Gasa ug mga Talento
Ni Elder Mervyn B. Arnold
Sa Seventy
Ang Langitnong Amahan mihatag ninyo og espirituhanong mga gasa ug mga talento sa pagtabang ninyo nga mahimo sa gusto Niya nga kamo mamahimo.
Diha sa mga kasulatan atong makita ang daghang mga pangutana nga makahimo nato sa pagpamalandong sa atong mga kinabuhi. Usa sa unang mga pangutana nga gipangutana diha sa Biblia gitumong ngadto ni Adan human siya mokaon sa gidili nga bunga. Modapit ko ninyo sa pagpamalandong sa unsa nga paagi nga kini nga pangutana magamit sa inyong kinabuhi.
“Si Adan ug ang iyang asawa nanagtago gikan sa presensya sa Ginoong Dios sa taliwala sa mga kakahoyan sa tanaman.
“Ug ang Ginoong Dios nagtawag sa tawo, ug nag-ingon kaniya, Hain ka?” (Genesis 3:8–9; emphasis gidugang).
Ang Ginoo nasayud sa tanan, mao nga kita makasiguro nga Siya nasayud asa nagtago si Adan ug Eva. Kon Siya nasayud asa sila, unsa gayud diay ang gipangutana sa Ginoo?
Kini nga pangutana labing siguro nakaaghat ni Adan ug Eva sa paghunahuna bahin sa unsay nahitabo sa ilang mga kinabuhi. Tingali makapangutana kita sa samang mga pangutana. Sama pananglit: Asa na kita sa atong panaw subay sa dalan sa pakigsaad paingon sa kinabuhing dayon? Unsa nga mga gasa ug mga talento ang gihatag sa atong Langitnong Amahan nato didto sa kinabuhi nga wala pa dinhi sa yuta aron sa pagtabang nato subay niini nga dalan? Unsa ang ubang mga gasa ug mga talento ang atong maangkon samtang kita maningkamot nga mahimo unsa ang gusto sa Ginoo nga kita mamahimo?
Si Presidente Joseph F. Smith (1838–1918) namahayag, “Ang tawo, isip usa ka espiritu, gipanamkon ug natawo gikan sa langitnong mga ginikanan, ug gimatuto ngadto sa pagkahingkod didto sa mahangturong mga mansyon sa Amahan sa wala pa moanhi sa yuta diha sa temporal [pisikal] nga lawas.”1 Ang manwal sa Mga Baruganan sa Ebanghelyo nagtudlo nato nga ang “Amahan sa Langit nahibalo kon kinsa kita ug unsa ang atong gibuhat sa wala pa kita moanhi sa yuta. Siya mipili sa panahon ug dapit alang sa matag usa kanato nga ipakatawo aron kita makakat-on sa mga leksyon nga personal natong gikinahanglan ug sa pagbuhat sa atong pinakamaayo uban sa tagsa-tagsa natong mga talento ug mga gawi.”2
Ang Langitnong Amahan mibutang kaninyo sa labing maayong lugar aron magamit ang inyong espirituhanon nga mga gasa ug molig-on sa inyong mga talento. Dili igsapayan asa mo magpuyo o unsa nga sirkumstansya sa inyong kinabuhi, makahimo kamo sa pagpili aron molampos, bisan pa sa inyong mga hagit. Ayaw gayud paghunong. Padayon lang. Ayaw pag-undang. Hinumdumi, ang unsay inyong gibuhat sa unsay anaa ninyo nga nakapahimo kinsa kamo.
Ang ehemplo ni Adan ug Eva makahatag nato og dakong paglaum. Human sila makalapas sa sugo nga dili mokaon sa gidili nga bunga, sila gipapahawa gikan sa matahum nga tanaman, ang yuta gitunglo, mga tunok ug mga sampinit mitungha, ug sila kinahanglang motrabaho ug motikad sa yuta aron makasangkap sa ilang mga kaugalingon. Wala sila mohunong. Mitrabaho sila, sama sa gisugo sa Ginoo kanila (tan-awa sa Moises 5:1). Ang ilang anak nga si Cain mihimo og dautan kaayo nga pagpili, apan sila nagpadayon sa pagpuyo sa matarung nga paagi ug nagpadayon sa pagtudlo sa ilang mga anak.
Ang Nadiskobrehan ni Tiyo Ben
Duna koy tiyo nga kanunayng naningkamot sa pagpalambo ug pagdugang sa mga gasa ug mga talento nga iyang nadawat gikan sa Langitnong Amahan. Tuguti ko nga mopakigbahin og usa ka istorya gikan sa iyang kinabuhi nga nakatabang nako nga makakita kon sa unsa nga paagi nga ang espirituhanong mga gasa ug mga talento mapalambo ug mapadako.
Usa ka adlaw sa dihang ang akong tiyo Ben nagtrabaho sa minahan sa copper, nakamatikod siya og daang piraso sa bawog nga metal nga diha sa riles sa tren. Gipangutana niya ang iyang boss kon mahimo ba niya kining kuhaon. Ang iyang boss miingon, “Ben, kanang daang piraso sa metal walay bili. Nag-usik ra ka sa imong panahon bisan sa pagpunit niini.”
Mipahiyom si Tiyo Ben ug miingon, “Akong nakita ang mas sobra pa kay sa daang piraso sa metal lang.”
Uban sa pagtugot sa iyang boss, gidala niya kini sa balay. Sa iyang workshop giinit niya kini nga metal hangtud nga mibaga kini sa kainit. Dayon, uban sa tumang trabaho, iyang naporma ug nabawog hangtud nga natul-id kini.
Sa nabugnaw na, iya kining gidrowingan og dakong kutsilyo. Ginamit ang blowtorch, iyang giporma ang metal og usa ka kutsilyo. Gisugdan dayon ni Tiyo Ben pagdukdok ang sagalsalon nga mga ngilit, nagtrabaho og maayo sa pagputol, pagbaid, pagpasinaw ug pagpahamis niadtong daang piraso sa metal.
Kada adlaw nagtrabaho siya sa unsay gitawag sa iyang boss nga walay bili nga piraso sa metal. Sa hinay-hinay ang suwab naporma ug nahimong maanindot, sinaw nga obra maestra.
Ang kulang na lang niini mao ang pul-an. Miadto si Tiyo Ben sa kakahoyan ug nakakita og sungay sa usa. Balik sa iyang workshop iyang gilimpyohan, giputol ug gipasinawan ang sungay. Sa nahuman na siya, hamis ug maanindot kini. Mainampingon niyang gitaod ang pul-an ngadto sa kutsilyo. Ang daan, tayaon, bawog nga piraso sa metal nahimong maanindot nga kutsilyo nga nakadaog og daghang mga ganti.
Kamo ug ako sama nianang daang piraso sa metal. Nagkinahanglan usab kita nga pormahon, pahamison, ug pasinawon aron makab-ot ang atong hingpit nga potensyal. Kabahin sa proseso mao ang pagdiskobre, paglig-on, ug pagpadaghan sa atong mga talento ug mga gasa.
Nakasabut si Tiyo Ben nga daghan sa atong potensyal dili makita sa gawas ug kinahanglang pangitaon ug palamboon. Ang Ginoo mitudlo nato nga “pangitaa sa matinguhaon nga paagi ang labing maayo nga mga gasa” (D&P 46:8) ug “aron matag tawo unta mouswag, diha sa iyang kahibalo, nga ang matag tawo unta makaangkon og talagsaon nga mga kahibalo, oo, gani sa gatusan ka pilo” (D&P 82:18). Magamit nato ang atong mga talento ug mga gasa sa pag-alagad sa uban, sama sa gipasabut sa sunod nga bersikulo: “Matag tawo nagtinguha sa kaayohan sa iyang silingan, ug nagbuhat sa tanan nga mga butang uban sa usa ka bug-os nga tinguha ngadto sa himaya sa Dios” (D&P 82:19). Ang pag-alagad makaporma nato ngadto sa pagpuyo sa mas Kristohanon nga kinabuhi.
Pagkaplag sa Atong mga Talento
Si Elder Richard G. Scott sa Korum sa Napulog Duha ka mga Apostoles mitudlo kon sa unsa nga paagi nga ang mga pagsulay makaporma nato: “Kon ang tanan ingon og maayo ra, ang nagkadaiyang mga hagit sa kasagaran magdungan og abut. Kon kadtong mga hagit dili mga sangputanan sa inyong pagkamasupakon, kini mga ebidensya nga ang Ginoo mibati nga kamo andam na sa dugang nga kalamboan (tan-awa sa Mga Proverbio 3:11–12). Busa mihatag Siya kaninyo og mga kasinatian nga makapaaghat og paglambo, pagsabut, ug kapuangod [duha ka importante kaayo nga mga gasa] nga mohashas ninyo alang sa inyong walay katapusan nga kaayohan. Aron madala kamo gikan sa inyong nahimutangan ngadto sa dapit nga gusto Niyang inyong adtoan nanginahanglan og taas nga pag-inat, ug kana sa kasagaran nagpasabut og kalisdanan ug kasakit.”3
Pagpalambo sa Atong mga Talento
Ang pagdugang sa atong mga talento nagkinahanglan og trabaho. Dili pa lang dugay, si Elder Scott misulti sa akong asawa, “Devonna, kinahanglan kang mo-paint.”
Si Sister Arnold wala gyud maka-paint sukad sa iyang kinabuhi. Kinahanglan siyang maningkamot niini. Mieskwela siya, mi-paint kada adlaw ug human sa dugay-dugay nga panahon ug paningkamot nakat-on sa pag-paint og maanindot. Akong gibitay sa bong-bong sa akong opisina ang usa sa iyang nindot kaayo nga mga painting sa usa ka talan-awon sa sapa.
Oo, ang pag-angkon og mga talento nagkinahanglan og trabaho, apan pagkadako sa atong kalipay kon kita makadungog sa Ginoo nga mosulti nato nga, “Maayong pagkabuhat. Ang imong mga gasa ug mga talento modaghan tungod sa imong kakugi” (tan-awa sa Mateo 25:14–30).
Ang Inyong Espirituhanong mga Gasa
Ang akong asawa nakadiskobre og talento sa pag-paint. Unsa ang inyong mga gasa ug mga talento? Nasayud ko nga ang atong Langitnong Amahan mihatag ninyo og pipila. Giunsa nako sa pagkahibalo? “Kay adunay daghan nga mga gasa, ug ngadto sa matag tawo gihatag ang usa ka gasa pinaagi sa Espiritu sa Dios” (D&P 46:11). Ang mga gasa ug mga gahum sa Dios anaa alang natong tanan. Atong katungod ug responsibilidad sa pagdawat sa atong espirituhanong mga gasa, pagpadaghan sa atong mga talento, ug pagpakigbahin niini.
Ang mga kasulatan naglista og pipila ka mga gasa nga atong matinguha (tan-awa, sama pananglit, D&P 46), apan sa tinuod adunay gatusan nga mga gasa ug mga talento. Siksika ang Basahon ni Mormon, ilabi na sa 3 Nephi 11–26, ug inyong madiskobrehan ang daghang mga gasa ug mga talento nga alang sa matag usa nato. Sama pananglit, sa 3 Nephi 11 mabasa nato ang mahitungod sa mga katawhan nga nakadungog sa tingog sa Langitnong Amahan apan wala makasabut niini sa sinugdanan:
“Sa ikatulo nga higayon sila nakadungog sa tingog, ug ilang gipaminaw aron madungog kini; ug ang ilang mga mata gitumong ngadto diin nagagikan ang tingog niini. …
“Ug nahinabo, nga ingon nga sila nakasabut sila mipunting sa ilang mga mata pag-usab paingon sa langit; ug tan-awa, sila nakakita og usa ka Tawo [Jesukristo] nga mikunsad gikan sa langit” (verses 5, 8).
Ang pagpaminaw nga klaro ug ang pagtan-aw nga klaro mao lamang ang duha ka mga ehemplo sa espirituhanong mga gasa ug mga talento nga inyong maangkon ug mapadaghan kon kamo andam sa pagtinguha ug pagpaningkamot alang niini.
Moimbitar ko sa matag usa nato sa pagbuhat sama sa gibuhat ni Tiyo Ben: motan-aw sa labing maayo sa tanan samtang kita magtinguha sa espirituhanong mga gasa ug mga talento ug mogamit niini sa pagpanalangin niadtong anaa sa atong palibut. Nasayud ko nga ang atong Langitnong Amahan adunay daghang mga gasa ug mga talento nga gusto Niya nga ihatag kanato, apan “kini dunay kondisyon sa atong pagpangayo niini. Ang mga panalangin nagkinahanglan og trabaho o paningkamot sa atong bahin” (Bible Dictionary, “Prayer”). Hinaut nga atong madiskobrehan, matrabaho, ug mapadaghan ang hinatag sa Dios nga mga gasa ug mga talento nga kauban sa atong pagkatawo, ug hinaut nga kita makaangkon og ubang mga gasa mao ang akong mapainubsanong pag-ampo.