O mea ua faamamafaina mai i le Konafesi Aoao Faaletausaga Lona 185 o Le Ekalesia a Iesu Keriso o le Au Paia o Aso e Gata Ai

“O mataupu mo lauga mo le konafesi aoao e atofa mai—e le [faia] i se pule faaletagata ae e ala mai i uunaiga a le Agaga,” na faamalamalama mai e Elder Dallin H. Oaks o le Korama a Aposetolo e Toasefululua (itulau e 32). I se konafesi aoao musuia lea na amata i le sauniga aoao a tamaitai ma sa faaiuina i le aso Sa o le Eseta, na aoao atu failauga e uiga i le aiga, o le anapogi, galuega o le malumalu, avea ma soo, le Sapati ma le Togiola a le Faaola, mai le tele o isi mataupu faavae o le talalelei (tagai itulau 3).

O nisi nei o mea ua faamamafaina mai:

• Na fofogaina e Peresitene Thomas S. Monson ni malumalu fou e fausiaina i Abidjan, Ivory Coast; Port-au-Prince, Haiti; ma Bangkok, Taialani. O nei mea, sa ia saunoa mai ai, “E ofoofogia faamanuiaga ua faapolopoloina mo au paia faamaoni i nei nofoaga, ma, e moni lava, i soo se mea o loo i ai malumalu i le lalolagi atoa” (itulau 91).

• Sa lagolagoina e tagata o le Ekalesia ia sui fou o le Korama Muamua o Fitugafulu, se Au Peresitene Aoao fou o Alii Talavou, ma se fesoasoani fou i le au peresitene aoao o le Peraimeri.

• Sa matauina i le lipoti faaletausaga le 15.3 miliona tagata o le Ekalesia i siteki e 3,114 ma itu e 561. Sa faapaiaina malumalu fou e tolu i le tausaga ua tea, ua maua ai se aofaiga o malumalu e 144 o loo faagaoioia.

• Sa faaliliuina le konafesi i gagana e 95. I le mulimuli ai i se faagasologa na amataina ia Oketopa ua tea, e toa tolu failauga sa tuuina atu a latou lauga i gagana e ese mai le faaPeretania.

I le lauga atu i le faaiuga o le vaiaso o le Eseta, sa molimau nai failauga i le Toetu o le Faaola. “O Ia o le Alo o le Atua,” na molimau mai ai Peresitene Thomas S. Monson. “O Ia lea na afio mai i fafo mai le tuugamau i lena taeao muamua o le Eseta, ma aumaia ai faatasi ma Ia le meaalofa o le ola e faavavau mo fanau uma a le Atua” (itulau 93).