Ia Fanafanau, Uluuluola, ma Faato’a le Lalolagi
Saunia e Elder Joseph W. Sitati
O Le Fitugafulu
Ua poloaiina ma faamanuiaina i tatou e le Tama Faalelagi ina ia fanafanau, ia uluola, ma ia faato’a le lalolagi ina ia mafai ai ona avea i tatou e faapei o Ia.
Faafetai lava, i le Aufaipese o le Tapeneko, mo lena faamamalu matagofie i le Faaola o le lalolagi.
I le aso na valaau atu ai le Atua le Tama i Lona Alo e Toatasi na Fanaua ia gaosi le tagata i lo Laua faatusa ma foliga, sa Ia faamanuiaina Lana fanau, i le fetalai atu, “Ia fanafanau, ma uluuluola, ma faatumuina le lalolagi, ma faato’a i ai, ma maua ai le pule i … meaola uma e fegaoioia’i i luga o le fogaeleele.”1 O le mea lea na amata ai la tatou malaga faaletino i se poloaiga ma se faamanuiaga faalelagi. Na tuuina mai e se Tama alofa ia i tatou le poloaiga ma le faamanuiaga ina ia fanafanau ma ia uluuluola ma ia faatumuina ma maua ai le pule ina ia mafai ai ona tatou atiae ma avea e pei o Ia lava.
Uso e ma tuafafine, i lenei aoauli ou te valaaulia ai lo outou faatuatua ma tatalo a o ou faasoa atu ni manatu ia te outou e faatatau i uiga autu e tolu o lo tatou natura paia. O la’u tatalo ia tatou taufai iloaina atoatoa atili ma faataunuu lo tatou tiutetauave paia—le poloaiga a lo tatou Tama—ia atiae lo tatou natura paia ina ia mafai ai ona faamanuiaina atili le faatautaiga o la tatou malaga ma maua ai lo tatou taunuuga paia.
Muamua, Ua Poloaiina i Tatou e le Atua Ia Fanafanau
O se vaega taua o le fanafanau lea e laaloa ai le vaai i nisi taimi, o le aumaia lea o le malo o le Atua i le lalolagi. Sa aoao mai le Faaola:
“O a’u nei o le vine, o la outou: O lē tumau ia te au, ma a’u ia te ia, o ia lava e fua tele mai; aua e le mafaia e outou ona fai o se mea e tasi pe a a’u le i ai. …
“Afai tou te tumau ia te au, a tumau foi a’u upu ia te outou, o mea uma lava tou te manano i ai, tou te ole atu ai, ona faia lea mo outou.
“E viia lo’u Tama i lenei mea, pe a outou fua tele mai; ona fai ai lea outou mo’u soo.”2
Tatou te matua fua tele mai pe a tatou tumau ia Keriso ma pe a tatou “ave i o [tatou] luga [Lona] suafa [ma] … auauna atu ia te ia e oo i le iuga”3 e ala lea i le fesoasoani atu i isi ia o mai ia te Ia.
I o tatou aso, o loo faaauau pea e perofeta ma aposetolo soifua ona siitia o latou siufofoga e valaaulia tatou taitoatasi ia auai atoatoa i le galuega o le faaolataga e tusa ma o tatou tomai ma avanoa.
O le vaega amata o se tali atu lea e fua tele mai ai ni fua, o le “agamalu ma le maualalo i le loto.”4 Ona mafai lea ona tatou o mai atoatoa ia Keriso pe a tatou gauai atu i faatosinaga a le Agaga Paia ma tausia feagaiga uma ua tatou osia.5 E mafai ona tatou sailia ma mauaina le meaalofa o le alofa mama ma maua le mana e valaaulia ai o tatou lava aiga, o tatou tuaa, ma o tatou tagata ma tuaoi ma uo le lolotu ia maua le talalelei a Iesu Keriso.
O le galulue ai i le agaga o le alofa mama e le o se tiute ae o se fiafiaga. O luitau e oo ina avea ma ni avanoa e fausia ai le faatuatua. E oo ina avea i tatou ma “molimau [o le lelei o le] Atua i taimi uma ma i mea uma, ma i nofoaga uma atonu [tatou] te i ai, seia oo lava i le oti.”6
E mafai ma e tatau ia i tatou uma ona auai atoatoa i le galuega o le faaolataga. Ua tuuina mai e le Faaola ia i tatou le tiutetauave lenei faatasi ma se folafolaga: “Ua filifilia outou e a’u; ua ou tuuina atu foi outou, ia outou ō, ma ia outou fua mai ni fua, ma ia tumau o outou fua; ina ia foaiina atu ia te outou e le Tama mea uma lava tou te ole atu ai ia te ia i lo’u igoa.”7
Lua, Ua Poloaiina i Tatou e le Atua Ia Uluola
O ō tatou tino faaletino o se faamanuiaga mai le Atua. Na tatou mauaina mo faamoemoega o le faataunuuina o le galuega a le Tama ina “ia aumai le tino ola pea ma le ola faavavau o le tagata.”8 O le tino o le auala lea e mafai ai ona tatou maua lo tatou gafatia paia.
O le tino ua mafai ai e fanau agaga usiusitai a le Tama Faalelagi ona oo i le olaga i le lalolagi.9 O le fanauina o fanau e maua ai e isi fanau agaga a le Atua le avanoa e olioli ai foi i le olaga i le lalolagi. O e uma e fananau mai i le olaga faaletino e mauaina le avanoa e alualu ai i luma ma ia faaeaina pe afai latou te usiusitai i poloaiga a le Atua.
O le faaipoipoga i le va o se alii ma se tamaitai o le faatulagaga lea na faauuina e le Atua mo le faataunuuina o le poloaiga ia uluola. O se mafutaga a le itupa e tasi e lē uluola.
O se faaipoipoga faaletulafono ma faatagaina ua faamauina i totonu o le malumalu ma ua faamamaluina e feagaiga o le faamauga ua maua ai e matua ma a latou fanau le avanoa mo le aafiaga aupito silisli o le alofa ma le sauniaina mo se olaga uluola. Ua ofoina atu ia i latou se siosiomaga silisili lea e mafai ona latou ola ai e tusa ma a latou feagaiga ua osia ma le Atua.
Ona o Lona alofa mo i tatou, ua tuuina mai ai e le Tama Faalelagi e faapea o Ana fanau faamaoni uma e le o olioli ma e le mafai ona olioli i faamanuiaga o se faaipoipoga faalefeagaiga ma fanau po o se atoaga o na faamanuiaga mo ni mafuaaga e le oo i ai so latou malosi, o le a olioli i nei faamanuiaga i le taimi atofaina a le Alii.10
Ua fautuaina e perofeta ma aposetolo soifua tagata uma ua mauaina le avanoa e ulu atu ai i le feagaiga o le faaipoipoga e faavavau ia fai mea faasolo i le atamai ma le faatuatua. E le tatau ona tatou tolopoina le taimi o lena aso paia ona o le sailiga o mea faalelalolagi po o le tāmau i ni mea ua faamoemoeina mai i se soa talafeagai i se tulaga e le faitaulia ai soo se sui agavaa.
O le folafolaga i tagata uma ua faamauina i le feagaiga o le faaipoipoga e faavavau faapea ma ē e fanafanau e ala i le tausiga o a latou feagaiga e faapea, o le a le maua lava e le fili se mana e faatamaia ai le faavae o lo latou mafutaga e faavavau.
Tolu, Ua Poloaiina i Tatou e le Atua ia Faato’a le Lalolagi
Ina ia faato’a le lalolagi ma maua le pule i meaola uma, o le puleaina lea o nei mea ina ia mafai ai ona latou faataunuuina le finagalo o le Atua11 a o latou faataunuuina faamoemoega o Lana fanau. O le faato’aina e aofia ai le mauaina o le pule aoao i o tatou lava tino.12 E le o aofia ai tagata ua afaina fua i nei mea po o le faaaogaina i se ala ua feteenai ma le finagalo o le Atua.13
O le atiaeina o le tomai e faato’a ai mea o le lalolagi e amata i le lotomaualalo ia iloa o tatou vaivaiga faaletagata ma le mana ua avanoa ia i tatou e ala ia Keriso ma Lana Togiola. Aua “ua fetalai mai Keriso: Afai tou te faatuatua mai ia te au o le a outou maua le mana e fai ai soo se mea e tatau ai ia te au.”14 E avanoa lenei mana ia i tatou pe a tatou filifili e faatino le usiusitai i Ana poloaiga. Tatou te faateleina lo tatou tomai e ala i le sailia o meaalofa a le Agaga ma e ala i le atiaeina o a tatou taleni.
Sa ou fanau ma ola ae i ni tulaga faatauvaa ua masani ai le tele o aiga i Aferika. Sa ou mauaina le tomai e siitia ai a’u ia mai na tulaga e ala i le saili ma le mauaina o se aoaoga lelei, faatasi ai ma le fesoasoaniga alofa a ou matua. O le atiaeina o se vaaiga mamao o le tagata e mafai ona avea ai a’u sa taua i lo’u alualu i luma. Mulimuli ane, i le avea ai ma se ulugalii talavou, na ma maua ai ma lo’u toalua le talalelei toefuataiina, lea ua faaauau ai pea ona faamanuiaina ai o ma olaga i le taitaiga faaleagaga. E pei foi o aiga uma, e i ai foi o matou tofotofoga ma luitau. Ae a o matou tepataulai atu i le Alii mo se fesoasoani, ua matou maua ai ni tali e aumaia ai le filemu ma le mafanafana, ma e matou te le lagonaina le lofituina e nei mea.
O luitau o loo feagai ma tagata i nei aso, ua aofia ai le ola lē mama, ponokalafi, fetauaiga faafitafita, faatamaiaga o mea, vailaau oona ma le mativa, ua faateteleina ona ua anoanoai tagata i le lalolagi ua filifili lava e i latou “le loto o le tiapolo faapea ma le tino”15 nai lo le finagalo o le Atua. “Ua latou le sailia le Alii e faatu lana amiotonu, ae ua taitoatasi le tagata ma savali i lona lava ala, ma tusa ai ma le faatusa o lona lava atua, o lona foliga ua tusa ma foliga o le lalolagi.”16
Peitai, ua valaaulia e le Atua Lana fanau uma ia mauaina Lana fesoasoani e faatoilalo ma onosaia ai luitau o lenei olaga i upu nei:
“O A’u o le Atua; o A’u na faia le lalolagi ma tagata ae lei i ai i latou i la le tino.
“… Afai e te liliu mai ia te a’u, ma faalogo mai i lo’u leo, ma talitonu, ma salamo i au solitulafono uma, ma papatiso, i le vai lava, i le suafa o lo’u Atalii e Toatasi na Fanaua … , o le a e maua le meaalofa o le Agaga Paia, ma ole mai i mea uma i lona suafa, ma o soo se mea e te ole mai ai, o le a tuu atu ia te oe.”17
O tagata faamaoni o le Au Paia o Aso e Gata Ai o e malamalama i lo latou gafatia paia ma faalagolago ma le loto atoa i le mana o loo maua e ala mai i le Togiola a le Alii o Iesu Keriso e faamalosia ai lo latou vaivai faanatura ma “mafai ai ona … faia o mea uma.”18 E mafai ona latou faatoilaloina faatosinaga a le tiapolo ia ua nofopologa ai le toatele i le fili. Sa aoao mai Paulo:
“Ua faamaoni le Atua [ma] na te le tuuina atu outou i le tofotofoga e sili i se mea ua outou lavātia, a e sauni foi faatasi ma le tofotofoga se mea e sao ai, ina ia outou lavā oono.”19
“Aua na tigaina o ia ina o tofotofoina, o le mea lea ua mafai ai o ia ona fesoasoani i e ua tofotofoina.”20
Ua poloaiina ma faamanuiaina i tatou e le Tama Faalelagi ina ia fanafanau, ia uluola, ma ia faato’a le lalolagi ina ia mafai ai ona avea i tatou e faapei o Ia. Ua Ia faaavanoaina mai le fesoasoani ina ia mafai ai e i tatou taitoatasi ona ola moni ai, e tusa ma a tatou filifiliga taitoatasi, ia avea ai faapei o Ia. Ou te tatalo ina ia tatou ola uma i o tatou olaga i ia tulaga, ina ia taialaina i tatou e le vaaiga mamao o lo tatou natura paia, maua uma o tatou avanoa faalelagi, ma ausia ai lo tatou taunuuga faalelagi.
Ou te molimau atu i le moni a’ia’i o le Atua le Tama ma Lona Alo pele, lo tatou Faaola o Iesu Keriso; i Lana fuafuaga mamalu o le fiafia; ma i ki ua Ia faaee mai i luga o se perofeta soifua i le lalolagi i aso nei, e oo lava ia Thomas S. Monson, o lē e tatou te alolofa i ai ma lagolagoina. Ou te tatalo ina ia tatou maua le mana e olioli ai i le atoatoa o Ana faamanuiaga i le suafa o Iesu Keriso, amene.