M. Joseph Brough

Fesoasoani Lua i le Au Peresitene Aoao o Alii Talavou

I le taimi o le tolu tausaga lea na auauna atu ai M. Joseph Brough o se peresitene o le Misiona a Guatemala Guatemala City Central (mai le 2011 i le 2014), na maliliu uma ai lona tamā ma lona tamā faaletulafono [tamā o lona faletua].

E ui na mafai ona toe foi lona faletua i le Iunaite Setete mo maliu, sa filifili le ulugalii i vaega uma e lua e tatau ona ia nofo i Kuatemala ma faaauau le la galuega faafaifeautalai. “Sa ma iloaina sa sili atu ona lelei le ma nonofo ma galulue i le mea sili ma te mafaia,” na fai mai ai Uso Brough, lea na valaauina i le aso 4 Aperila, 2015, o se fesoasoani lua i le au peresitene aoao o Alii Talavou. “O le faamoemoega tonu lava lena o lona tama ma lo’u tama ia i ma’ua.”

Na soifua mai Uso Brough i le Aai o Sate Leki, Iuta, i le aso 11 Tesema, 1963, ia Monte J. ma Ada B. Brough. Sa ia faaaluina lona talavou i Farmington, Iuta, ma Robertson, Wyoming. Na siitia atu le aiga i Minesota ina ua valaauina le tamā o Joseph o se peresitene o le misiona, o le na valaauina mulimuli ane o se tasi o Fitugafulu. Sa i ai Joseph i lona tausaga mulimuli i le aoga maualuga i le taimi na maea ai le auaunaga a lona tama o se peresitene o le misiona. Nai lo le toe foi atu i le aoga maualuga, sa sue Joseph i le suega e talitutusa ma le aoga maualuga ma alu sao ai lava i le Iunivesite o le Setete o Weber i Ogden, Iuta.

Peitai, na faamalosia e ona matua lona faauu mai le seminare ma se tusi faamaonia o le fa tausaga. O le taimi lea sa ia auai ai i le seminare i le Aoga Maualuga i Davis sa ia feiloai ai i lona faletua i le lumanai, o Emily Jane Thompson. Sa la faaipoipo i le aso 25 Aperila, 1985, i le Malumalu o Sate Leki; o i laua o ni matua o se fanau e toafa.

A o lei faaipoipo le ulugalii, sa auauna atu Uso Brough o se faifeautalai i le Misiona a Kuatemala Quetzaltenango. Sa avea lona peresitene o le misiona o, Jorge H. Perez, ma se “tagata sili ona taua i lo‘u olaga,” o lana tala lea.

Na faavaeina ma o le pule o Rotational Molding o Iuta, sa ia maua se faailoga o le tagata malaga i mea tau tupe ma se faailoga o le matuaofaiva i pulega faapisinisi mai le Iunivesite o Iuta. I le Ekalesia sa ia auauna atu o se epikopo, peresitene o Alii Talavou a le uarota ma se fautua maualuga.