O Le Perisitua-o se Meaalofa Paia

Saunia e Peresitene Thomas S. Monson

Ua taitasi i tatou ma faamatuu mai i ai se tasi o meaalofa aupito taua ua faaee mai i luga o tagata.

O se tasi o mea e sili ona manino lo’u manatuaina, o le auai lea i se sauniga perisitua o se tiakono fou faatoa uma ona faauuina, ma usuina le viiga amata, “O mai alo o le Atua ua i ai perisitua.”¹ O le po nei, ia i latou uma ua aofaga potopoto iinei i le Maota Autu mo Konafesi, faapea foi le lalolagi atoa, ou te toe ta’ua le agaga o lena viiga faapitoa ma fai atu ia te outou: O mai, outou alo o le Atua ua i ai perisitua, sei o tatou mafaufau i o tatou valaauga; sei o tatou toe mafaufau i o tatou tiutetauave; sei o tatou mataituina o tatou tiute; ma sei o tatou mulimuli ia Iesu Keriso lo tatou Alii. E ui atonu e eseese lo tatou matutua, i agaifanua, po o atunuu, ae ua tuufaatasia i tatou ua tasi i o tatou valaauga faaleperisitua.

Ia i tatou taitoatasi, o le toefuataiga o le Perisitua Arona ia Oliva Kaotui ma Iosefa Samita e Ioane le Papatiso, e ese le taua. E faapena foi, o le toefuataiga o le Perisitua Mekisateko, ia Iosefa ma Oliva e Peteru, Iakopo, ma Ioane, o se mea na tupu e pele.

Sei o tatou matua faatauaina o tatou valaauga, o tiutetauave, ma tiute ia e o mai faatasi ma le perisitua o loo tatou umia.

Sa ou lagonaina se tiutetauave tele ina ua tofia au e avea ma failautusi i la’u korama a tiakono. Sa ou matua saunia ma le faaeteete tele ia faamaumauga sa ou tausia, aua sa ou manao e faia le mea silisili sa ou iloa fai i lena valaauga. Sa ou matua mitamita i la’u galuega. O le faia o mea uma ou te mafaia, i le mea aupito sili ou te gafatia, o la’u sini lea i soo se tofiga sa ou umia.

Ou te faamoemoe i alii talavou uma ua faauuina i le Perisitua Arona, ua tuu atu i ai se faailoaga o le paia o lona valaauga ua faauuina ai, faapea foi avanoa e faalauteleina ai lea valaauga. Sa ou mauaina se avanoa a o o’u tiakono, ina ua faatonuina au e le au epikopo ou te alu e ave le faamanatuga i se toeaina matua ua nofofale, e nofo pe tusa o se maila mai le falesa. I lena taeao faapitoa o le Aso Sa, a o ou tuitui atu i le faitotoa o Uso Wright ma faalogoina si ona leo vaivai o valaau mai, “Sau i totonu,” sa ou ulufale atu e le gata i si ona āpi faatauvaa ae faapea foi se potu e tumu i le Agaga o le Alii. Sa ou soso atu i autafa o le moega o Uso Wright ma tuu atu ma le faaeteete se fasi falaoa i ona laugutu. Ona ou tuu atu lea o le ipu vai, ina ia mafai ona inu ai. Ina ua ou savali ese, sa ou vaaia loimata i ona mata a o ia fai mai, “Ia faamanuia le Atua ia te oe, lo’u atalii.” Ma sa faamanuiaina au e le Atua—ma se talisapaia o faatusa paia o le faamanatuga ma mo le perisitua sa ou umia.

E leai se tiakono, aoao, po o se ositaulaga mai le matou uarota o le a galo ia asiasiga e manatua pea sa matou faia ia Clarkston, i Iuta, i le mea o lagomau ai Matini Harisi, o se tasi o Molimau e toatolu o le Tusi a Mamona. A o matou siosioina le poutu maamora umi o loo maka ai lona tuugamau, ma a o faitau mai e se tasi o taitai o le korama ia te i matou na upu mamana mai “Le Mau a Molimau e Toatolu,” o loo maua i le amataga o le Tusi a Mamona, sa matou amatalia se alofa mo lena tusifaamaumau paia ma mo upumoni o loo maua tusia ai.

I le aluga o na tausaga, o lo matou faamoemoega o le avea ma atalii o Mosaea. Na tusia e uiga ia te i latou:

“Sa latou matua malolosi i le malamalama o le upumoni; ona o i latou o ni alii mafaufau lelei ma sa latou suesue i tusitusiga paia ma le filiga; ina ia latou iloa le afioga a le Atua.

“Ae sa le ona pau lea; sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o valoaga, ma le agaga o faaaliga, ma a latou aoao atu, sa latou aoao atu ma le mana ma le pule mai le Atua.”²

E le mafai ona ou mafaufau i se sini e sili atu ona agavaa mo se alii talavou ia i ai, nai lo le faamatalaina e faapei o atalii totoa ma le amiotonu o Mosaea.

Ina ua lata ona atoa lo’u 18 tausaga ma ua saunia e ulufale atu i le tautua faamiliteli i le Taua Lona Lua o le Lalolagi, sa fautuaina atu ai au ina ia mauaina le Perisitua Mekisateko, ae sa moomia ona ou telefoni i lo’u peresitene o le siteki, o Paul C. Child, mo se faatalanoaga. O ia o se tagata e fiafia ma malamalama tele i tusitusiga paia, ma o lona faamoemoega le tatau i tagata uma ona faapena le fiafia ma le malamalama i ai. Sa ou iloa mai nisi o a’u uo le auiliili ma le vailiili o ona faatalanoaga, o lea sa ou manao ai i sina faailoa atu itiiti o lo’u malamalama i tusitusiga paia; ma o lea, ina ua ou telefoni atu ia te ia sa ou fautuaina ma te feiloai i le Aso Sa e sosoo ai i se taimi sa ou iloa e na o le tasi le itula ae oo i le taimi o lana sauniga faamanatuga.

O lana tali: “Oi Uso Monson, o le a le lava ai la se taimi e suesue ai tusitusiga paia.” Ona ia fautuaina mai ai lea o se taimi e tolu itula a o lei oo i le sauniga faamanatuga, ma sa ia faatonuina au e avatu la’u lava seti o tusitusiga paia ua uma ona maka lelei.

Ina ua ou taunuu atu i lona maota i le Aso Sa, sa faafeiloaia a’u i le alofa, ona amata ai lea o le faatalanoaga. Sa fai mai Peresitene Child, “Uso Monson, ua e umia le Perisitua Arona. Pe na i ai se agelu na auauna atu ia te oe?” Sa ou tali atu e leai. Ina ua fesili mai pe sa ou iloaina e i ai la’u aia tatau mo lena mea, sa ou toe tali atu foi ou te le iloaina.

Sa ia fai mai, “Uso Monson, tauloto mai levaega e 13 o le Mataupu Faavae ma Feagaiga.”

Sa ou amata, “‘I luga o oulua o‘u uso a auauna e, i le suafa o le Mesia ou te tuuina atu ai le Perisitua o Arona, o loo i ai ki o asiasiga ma galuega a agelu—’”

“Taofi,” sa faatonu mai ai Peresitene Child. Ona ia fautua mai lea i se leo mālū e faapea, “Uso Monson, ia aua lava nei galo o le avea ai ma se tasi e umia le Perisitua Arona, ua e aia foi i asiasiga a agelu.”

Sa toetoe ina pei sa i ai se agelu i totonu o le potu i lena aso. E lei galo lava ia te au le faatalanoaga. O loo ou lagonaina pea le agaga o lena taimi paia a o ma faitauina faatasi ia tiutetauave, o tiute, ma faamanuiaga o le Perisitua Arona ma le Perisitua Mekisateko—o faamanuiaga e oo mai e le gata ia i tatou ae faapena foi i o tatou aiga ma i isi o le a tatou maua le avanoa e auauna i ai.

Sa faauuina au o se toeaina, ma i le aso na ou tuua ai mo le faataunuuina o o’u tiute i le neivi, sa i ai faatasi se sui o le au epikopo o la’u uarota ma lo’u aiga ma uo i le nofoaga e faaee ai nofoaafi e faatofa mai ia te au. I le toe ai o sina taimi aluese le nofoaafi, sa ia tuuina mai i lo’u lima se tamaitusi sa faaigoa o le Tusitaulima a le Faifeautalai. Sa ou ata ma fai atu ou te le o alu i se misiona.

Sa ia tali mai, “Ave pea. Atonu lava e aoga.”

Na aoga. Sa ou manaomia se mea malo, faatafatolu e tuu faapito i lalo o la’u ato faatagata folau ina ia malo ma lē manuminumi tele o’u lavalava. O le Tusitaulima a le Faifeautalai o le mea tonu lava lea sa ou manaomia, ma sa aoga lelei i la’u ato faatagata folau mo le 12 vaiaso.

O le po a o lumanai le aso matou te malolo ai mo le Kerisimasi, sa matou mafaufau i o matou aiga. Sa le gāsē se mea i le apitaga o le militeli, ae na faateia e la’u uo e i le moega i o’u autafa—o se tama Mamona, o Leland Merril—sa amata ona ōi i le tiga. Sa ou fesili po o le a le mafuaaga, ae sa fai mai ua matua lagona lava le ma’i. Sa lei manao o ia e alu i le fale o togafitiga faafomai a le militeli, aua sa ia iloa afai e alu i ai, o le a le mafai ona alu i lona aiga i le aso e sosoo ai.

Sa foliga ua atili ona tigaina a o gasolo itula. O le iloa ai o au o se toeaina, sa ia talosaga mai ai ou te tuu atu ia te ia se faamanuiaga faaleperisitua.

Ou te lei faia lava muamua se faamanuiaga faaleperisitua, e lei tuuina mai foi lava ia te au se faamanuiaga, ma ou te lei vaai lava foi o tuuina atu se faamanuiaga. A o ou tatalo lemu mo se fesoasoani, sa ou manatuaina le Tusitaulima a le Faifeautalai i le pito i lalo o la’u ato folau. Sa vave ona ou sasaaina i lalo ma aumai le tusi i se sulu itiiti o le po. O iina sa ou faitau ai i le ala e faamanuia ai e se tagata se ma’i. A o toatele le mau seila fiailoa sa tilotilo mai, sa faagasolo le faiga o le faamanuiaga. A o lei mafai ona ou toe teuina mea uma i la’u ato, sa moe Leland Merril e faapei o se tamaitiiti. Sa ala mai o ia i le taeao na sosoo ai ua manuia. Sa maoae le lotofaafetai sa ma taufai lagonaina mo le mana o le perisitua.

E tele nisi mau avanoa na ou maua i tausaga e tuuina atu ai faamanuiaga ia i latou na mafatia, ou te le mafaitauina. O avanoa taitasi ou te maua ai lava le matuā faafetai atu ina ua faamatuu mai ia te au e le Atua lenei meaalofa paia. Ou te matua migao tele i le perisitua. Ua ou molimauina lona mana i lea taimi ma lea taimi. Ua ou vaai i lona malosi. Ua ou maofa i vavega ua tutupu mai ai.

Uso e, ua taitasi i tatou ma faamatuu mai i ai se tasi o meaalofa aupito taua ua faaee mai i luga o tagata. A tatou faamamaluina o tatou perisitua ma ola i o tatou olaga ina ia tatou agavaa i taimi uma, o le a tafe mai faamanuiaga o le perisitua e ala mai ia te i tatou. Ou te fiafia i upu o loo maua i le Mataupu Faavae ma Feagaiga, vaega 121, fuaiupu e 45, lea o loo ta’u mai ai mea e tatau ona tatou faia ina ia agavaa ai: “Ia tuu lou loto … ia tumu i le alofa mama i tagata uma, ma i le auaiga o le faatuatua, ma ia tuu le amiomama e teuteuina ai ou mafaufauga e le aunoa, ona solo malosi ai lea o lou lototele i luma o le Atua, ma o le a to ifo i luga o lou agaga le mataupu faavae o le perisitua e pei o le sau mai le lagi.”

I le avea ai ma e umia le perisitua a le Atua, ua tatou punouai i le galuega a le Alii o Iesu Keriso. Ua tatou tali atu i Lana valaau; ua tatou i ai i Lana feau. Tatou te aoao ia te Ia. Tatou te mulimuli i Ona tulaga aao. Tatou te ola i Ana mataupu. O le faia o na mea, o le a tatou saunia ai mo soo se auaunaga e valaau mai o Ia e faatino. O Lana galuega lenei. O Lana Ekalesia lenei. Ioe, o Ia o lo tatou tautai, o le Tupu o le Mamalu, o le Alo o le Atua. Ou te molimau atu o loo soifua o Ia ma tuuina atu ai lenei molimau i Lona suafa paia, le suafa o Iesu Keriso, amene.