Faatumu o Tatou Aiga i le Malamalama ma le Upumoni
Saunia e Cheryl A. Esplin
Fesoasoani Lua i le Au Peresitene Aoao o le Peraimeri
Ina ia mafai ona tatou teteeina ma o tatou aiga ia malosiaga o le lalolagi, e tatau la ona faatumulia i tatou i le malamalama ma le upumoni o le talalelei.
Na faatumulia lo’u loto i le Agaga a o ou faalogologo o aoao atu e nei aiga lena upumoni paia, “O le aiga e ou le Atua.”1 O musika musuia o se tasi lea o le anoanoai o auala e mafai ona tatou lagona ai le musumusu mai o le Agaga ia i tatou, ma faatumulia i tatou i le malamalama ma le upumoni.
O le mataupu o le faatumulia i le malamalama ma le upumoni na matuai taua patino lava ia te au ona o se aafiaga sa ou mauaina i le tele o tausaga ua mavae. Sa ou auai i se fonotaga lea na aoao ai uso o le fono faatonu aoao a Tamaitai Talavou e uiga i le fatuina o ni aiga ma auaiga malolosi faaleagaga. Ina ia maimoa i se faatinoga o lenei mea, sa uu ai i luga e se taitai o Tamaitai Talavou ni apa inu se lua. I le tasi lima sa ia uuina ai le atigi apa e leai se mea o i ai ma i le isi lima o se apa inu e lei tatalaina na tumu i le vaiinu. Muamua, sa ia oomiina le atigi apa; na amata ona omia ma manumi i le oomiina. Na sosoo ai ma le oomiina i le isi ona lima o le apa e lei tatalaina. Sa mausali. Sa lei omia pe manumi e pei o le atigi apa—ona sa tumu.
Tatou te faatusaina lenei faataitaiga i o tatou lava olaga faapea ma o tatou aiga ma auaiga. Pe a faatumulia i le Agaga ma le upumoni o le talalelei, tatou te maua le mana e tetee atu ai i malosiaga mai fafo o le lalolagi lea o loo siomia ma fe’omia’i solo ai i tatou. Peitai, afai e le faatumuliaina i tatou faaleagaga, tatou te le maua le malosi i totonu e tetee atu ai i malosiaga mai fafo ma e mafai ona tatou lafotū ai pe a fe’omia’i solo i tatou e nei malosiaga.
Ua iloa e Satani e faapea ina ia mafai ona tatou teteeina ma o tatou aiga ia malosiaga o le lalolagi, e tatau la ona faatumulia i tatou i le malamalama ma le upumoni o le talalelei. O lea na te faia ai mea uma i lona mana e faavaivaia, faafenumia’i, ma faatamaia ai le upumoni o le talalelei ma taumafai e vavaeese i tatou mai lena upumoni.
O le toatele o i tatou ua uma ona papatiso ma maua le meaalofa o le Agaga Paia, o le e ana le matafaioi o le faaali mai ma aoao mai le moni o mea uma lava.2 Faatasi ai ma le faamanuiaga o lena meaalofa ua oo mai ai ma le tiutetauave o le sailia o le upumoni, ia ola i le upumoni ua tatou iloa, ma ia faasoa atu ma puipuia le upumoni.
O se tasi o nofoaga sili tatou te saili atu i ai ina ia faatumulia ai i le malamalama ma le upumoni, o totonu o o tatou lava aiga. O upu o loo i le tali o le pese sa tatou faalogoina ua faamanatu mai ai ia i tatou, “Ua aumai e le Atua ia i tatou ni Aiga e fesoasoani ai ia avea i tatou ma tagata e finagalo i ai o Ia.”3 O aiga o falea’oga ia a le Alii i luga o le fogaeleele e fesoasoani ia i tatou ia aoao ma ola ai i le talalelei. Ua tatou o mai i o tatou aiga ma se tiute paia ina ia fesoasoani e fefaamalosiaua’i i le tasi ma le isi faaleagaga.
O aiga faavavau malolosi ma aiga ua faatumulia i le Agaga e le tupu fua. E tele taumafaiga e alu ai, e alu ai le taimi, ma e faia ai e tagata taitoatasi o le aiga lana vaega. E eseese aiga uma, ae o aiga uma lea o loo i ai se tagata se toatasi o loo saili mo le upumoni e mafai lava ona faia se eseesega.
O loo fautuaina pea i tatou ina ia faatele lo tatou malamalama faaleagaga e ala i le tatalo ma e ala atu i le suesue ma le mafaufau loloto i tusitusiga paia ma upu a perofeta soifua. I lana saunoaga o le konafesi aoao e uiga i le mauaina o se molimau o le malamalama ma le upumoni, na saunoa ai Peresitene Dieter F. Uchtdorf:
“O le Atua e Faavavau ma Silisiliese … o le a fetalai mai ia i latou e faalatalata atu ia te Ia ma se loto faamaoni ma le faamoemoega moni.
“O le a Ia fetalai mai ia i latou i miti, faaaliga, mafaufauga, ma lagona.”
Sa faaauau le saunoaga a Peresitene Uchtdorf: “E popole le Atua ia te oe. O le a Ia faafofoga atu ma o le a Ia tali atu i au fesili patino. O tali i au tatalo o le a oo mai i Lana lava ala ma i Lana lava taimi, ma o lea, e manaomia ai ona e aoao ia faalogo atu i Lona siufofoga.”4
Ua faaalia i se tala o le talafaasolopito o aiga lenei fautuaga.
I nai masina ua mavae sa ou faitau ai i le molimau a le tuafafine o le tama o lo’u tamāmatua o Elisapeta Staheli Walker. Sa malaga mai Elisapeta ma lona aiga a o laitiiti i Amerika mai Suitiselani.
Ina ua uma ona faaipoipo Elisapeta, sa latou nonofo ma lona toalua ma lana fanau e latalata i le tuaoi o Nevada, lea sa latou faagaoioia ai se pisinisi tau meli. Sa avea lo latou fale ma se nofoaga e mapu ai tagata femalagaai. Latou te nofo sauni i le aso ma le po atoa e kuka ma laulau atu meaai mo tagata femalagaai. O se galuega faigata ma lē lavā, ma sa laitiiti le taimi e malolo ai. Ae o se mea na sili ona popole i ai Elisapeta o talanoaga a tagata sa latou fegalegaleai.
Fai mai Elisapeta e oo mai lava i lenei taimi sa ia talitonu lava o le Tusi a Mamona e moni, o le Perofeta o Iosefa Samita sa faatagaina e le Atua e faia le mea sa ia faia, ma o lana savali o le fuafuaga o le olaga ma le olataga. Peitai o le olaga sa ia ola ai e le o se olaga o le a faamalosia ai se talitonuga faapena.
O nisi o tagata femalagaai na afe atu e malolo, o ni tagata faitautusi, atamamai, ma popoto ma o le mataupu na talanoaina pea i taimi uma i lana laulau e faapea, o Iosefa Samita o se tagata “pepelo taufaasese” lea na tusia e ia lava le Tusi a Mamona ona tufa atu lea ia maua ai ni tupe. Sa latou amio ai e pei o mafaufau o soo se mea lava e valea, ma fai mai “o le faaMamona e pepelo.”
O nei talanoaga uma na lagona ai e Elisapeta le tuulafoaia ma le tuuatoatasi. Na leai se tasi e talanoa i ai, leai se taimi e tatalo ai—e ui sa ia tatalo a o ia faigaluega. Sa matuai fefe lava o ia e fai atu se tala ia i latou ia na ulagiaina lana tapuaiga. Fai mai a ia sa ia mafaufau pe o latou tauina mai ea le mea moni, ma sa ia lagona le le mafai ona ia puipuia o lona talitonuga pe ana faapea sa ia taumafai.
Mulimuli ane, sa masii ese atu Elisapeta ma lona aiga. Fai mai Elisapeta sa tele atu le taimi e mafaufau loloto ai ma sa le tele ni mea faasalavei i taimi uma. E masani ona ia alu i le potu i lalo ma tatalo i le Tama Faalelagi i mea sa ia atugalu ai—e uiga i tala ia na tau atu e na tagata atamamai e uiga i le le moni o le talalelei ma e uiga ia Iosefa Samita ma le Tusi a Mamona.
I se tasi po sa fai ai se miti a Elisapeta. Fai mai a ia: “Na foliga mai sa tu o ia i se auala vaapiapi o taavale toso, lea na faataamilo i le auvae o se mauga maualalo, o le afa o le mauga sa ou vaai ai i se tagata o tilotilo mai i lalo a o tautala, na foliga mai sa talanoa atu i se alii talavou lea sa tootuli; ma punou atu i luga o se lua i le eleele. Na faaloaloa atu ona lima ma na foliga mai o loo ia aapa atu i se mea o i totonu o le lua. Sa ou vaaia le ufiufi maa na aveese mai le lua lea na punou ai le alii talavou. Na toatele tagata i luga o le auala, ae sa foliga mai e leai ma se tasi na amanaiaina ia alii e toalua i luga o le mauga. Na i ai se mea na o mai faatasi ma le miti lea na matuai ese lava le uunaia ai o au lea na ou ala ai i luga; … sa le mafai ona ou ta’u atua la’u miti i soo se tasi ae sa ou fiafia lava i lona uiga, o le Agelu o Moronae o loo faatonutonuina le taulealea o Iosefa i le taimi sa ia maua ai papatusi.”
I le tautotogo o le 1893, na alu ai Elisapeta i le Aai o Sate Leki mo le faapaiaga o le malumalu. Sa ia faamatalaina le mea sa oo ia te ia: “Sa ou vaai ai iina i le ata lava e tasi lea sa ou vaaia i la’u miti, ou te matea o se faamalama tioata lanu. Sa ou mautinoa faapea afai na ou vaai i le Mauga o Kumora, sa matua foliga moni lava. Sa ou lagona le faamalieina aua sa faaali mai ia te au i se miti se ata o le Agelu o Moronae o tuuina atu ia Iosefa Samita ia papatusi auro.”
Ina ua mavae le tele o tausaga talu ona faia lenei miti ma i le tele o masina a o lei maliu o ia i le lata i le 88 o ona tausaga, sa maua ai e Elisapeta se uunaiga malosi. Fai mai, “Na oo mai ma le manino se manatu ia te au … e pei o fai mai se tasi ia te au, … ‘Aua le tanuina lau molimau i le palapala.’”5
I augatupulaga mulimuli ane, sa faaauau ai ona mauaina e fanau a Elisapeta le malosi mai lana molimau. E pei o Elisapeta, o loo tatou ola foi i se lalolagi e anoanoai tagata masalosalo ma faitio o e ulagia ma tetee i upumoni tatou te faapelepele i ai. Atonu tatou te faalogo i tala le mautonu ma savali feteenai. E pei foi o Elisapeta, o le a tatou faia le mea sili tatou te mafaia ia pipiimau ai i soo se malamalama ma le upumoni ua tatou mauaina, aemaise lava i tulaga faigata. Atonu o le a le vave ona oo mai tali o a tatou tatalo, ae e tatau ona tatou saili ni taimi filemu ia maua ai le malamalama sili atu ma le upumoni. Ma pe a tatou mauaina, o lo tatou tiute o le ola ai, faasoa atu, ma ia puipuia.
Ou te tuuina atu lau molimau ou te iloa a tatou faatumulia o tatou loto ma aiga i le malamalama ma le upumoni a le Faaola, o le a tatou maua le malosi i totonu e onosaia ai soo se tulaga. I le suafa o Iesu Keriso, amene.