Elder Hugo Montoya

Korama Muamua a Fitugafulu

Na manino lava le faagaeetia o Elder Hugo Montoya ina ua valaauina o ia i le Korama Muamua a Fitugafulu. Sa ia maua le mafanafana i upu mālū a Peresitene Thomas S. Monson i le taimi o se fonotaga faaleaoaoga mo le Au Pulega Aoao fou: “Ua e i ai iinei aua e te alofa i le Faaola.” Na lagona e Elder Montoya le faagaeetia, i le iloaina o lona valaauga fou ua tuuina atu o ia i le feau a le Alii.

“Ou te alofa i le Faaola, ma o le a ou alu i soo se mea e talosagaina a‘u ou te alu i ai,” o lana tala lea. “O le a ou faia soo se mea e talosagaina a‘u e fai. O le a ou tautala i upu ua talosagaina a’u e tautala ai.”” Sa lagolagoina Elder Montoya i le taimi o le sauniga i le afiafi o le Aso Toonai o le Konafesi Aoao Faaletausaga Lona 185 a le Ekalesia.

Ua maua foi e Elder Montoya le malosi i le talatuu o le faatuatua a lona aiga. O le tamamatua a lona tina o Rafael Monroy o se tagata sili ona taua i le talafaasolopito o le Ekalesia i Mekisiko. I le 1915, sa molia ai Uso Monroy ma se tasi uso, o Vicente Morales, e se vaega o tagata faatupu faalavelave i le taimi o Fetauaiga i Mekisiko. Na ta‘u atu i ia alii e toalua o le a tatalaina i laua pe afai, atoa ai ma isi manaoga, la te teteeina la laua tapuaiga.

Sa mumusu i laua ma na tafanaina i laua ma maliliu ai e le au fanafana.

Na saunoa mai Elder Montoya o le faataitaiga a le tamamatua a lona tina o loo avea pea ma se uunaiga mamana i lona olaga. “Ua ou aoaoina o lagona o le fefe e mafai ona faatoilaloina e ala i lagona o le faatuatua ma le molimau pe a e iloaina o loo e faia le mea sa‘o.”

Na soifua mai Elder Montoya i le aso 2 Aperila, 1960, i Fresno, Kalefonia, ia Abel Montoya ma Maclovia Monroy. Na nofo o ia i Mekisiko mo le tele o lona olaga.

Na ia faaipoipo atu ia Maria del Carmen Balvastro i Hermosillo; sa faamauina i laua i le Malumalu o Mesa Arisona i le aso 6 Aperila, 1983. E toalima le la fanau.

Ina ua uma ona galue o se faifeautalai faamisiona i le Misiona a Mexico City North mai le 1979 i le 1981, sa ia auauna atu o se peresitene o Alii Talavou a le uarota, fautua maualuga, epikopo, peresitene o le siteki, suetusi a le eria, ma Fitugafulu Eria.

Sa ia faauu mai le Iunivesite a le Setete o Sonora i le 1986 ma se faailoga faa-faatoaga faaenisinia ma faigaluega ai i le tele o galuega faalepulega i le Xerox ma o se faiaoga inisitituti o le Ekalesia.