Perisitua ma le Tatalo Patino

Saunia e Peresitene Henry B. Eyring

Fesoasoani Muamua i le Au Peresitene Sili

E mafai e le Atua ona to mai ia i tatou le mana i le perisitua mo soo se tulaga atonu o tatou i ai. E na ona manaomia ai lava o lo tatou ole atu i le lotomaualalo.

Ou te faafetai ona o le faatuatuaga ua ou maua e lauga atu ai i le au perisitua a le Atua i le lalolagi atoa. Ua ou lagonaina le mamafa o lena avanoa aua ou te iloa se mea e uiga i le faatuatuaga ua tuu atu e le Alii ia te outou. Faatasi ai ma lo outou taliaina o le perisitua, ua outou maua ai le aia tatau e tautala atu ai ma galulue i le suafa o le Atua.

O lena aia tatau o le a avea o se mea moni pe a e maua musumusuga mai le Atua. Ua na o iina o le a e mafai ai ona e tautala atu i Lona suafa. Ma e na o iina foi e mafai ai ona e galue i Lona suafa. Atonu na e sese i lou mafaufau, “Se, e le faigata lena mea. E mafai ona ou maua musumusuga pe afai e valaaulia au e faia se lauga pe ou te tuuina atu foi se faamanuiaga faaleperisitua.” Pe le popole foi se tiakono po o se aoao talavou faapea, “A ou matua atu, pe a oo ina valaau au e fai ma faifeautalai, ona ou iloa lea o le mea e finagalo le Atua ou te tautala atu ai ma le mea e finagalo le Atua ou te faia.”

Ae mafaufau i le aso e tatau ai ona e iloa le mea e finagalo le Atua e fai atu ai, ma le mea e finagalo o Ia e fai. Ua uma ona oo mai mo i tatou uma—po o fea lava o e i ai i lou valaauga faaleperisitua. Sa ou ola ae i se eria faamisiona i sasae o le Iunaite Setete i le taimi o le Taua Lona Lua a le Lalolagi. E vavamamao mea sa nonofo ai tagata, ma sa tapulaa le kesi sa mafai ona faatau e tagata. E na o a’u le tiakono i le paranesi. Sa avatu e tagata o le au paia ia teutusi o taulaga anapogi i le peresitene o le paranesi pe a o mai i le sauniga anapogi ma molimau i lo matou fale.

Ina ua 13 o’u tausaga, sa matou masii atu i Iuta e nonofo ai i se uarota tele. Ou te manatua la’u galuega muamua o le savali i aiga e ao mai ia taulaga anapogi. Sa ou tilotilo i le igoa i luga o teutusi ma ou matauina ai le faaiu e tutusa ma se tasi o Molimau e Toatolu o le Tusi a Mamona. Sa ou tuitui i le faitotoa ma le mautinoa. Sa tatala mai e le tamaloa le faitotoa, tilotilo mai ia te au, atigū mai, ona avaavau mai lea ou te alu ese. Sa ou aluese ma le faanoanoa.

Pe toeitiiti atoa le 70 tausaga talu ai, ae ou te manatua pea le lagona sa ou maua i lena aso i le faitotoa lea sa i ai se mea sa tatau ona ou tau atu pe faia. Maimau pe ana ou tatalo i le faatuatua a o ou alu atu i lena aso, semanu e musuia au ou te tu ai pea i le faitotoa, ataata, ma fai atu se mea e pei o le: “Fiafia lava ua ta feiloai. Faafetai atu mo mea na e foaia ma lou aiga i aso ua mavae. Ou te taulai atu fiafia e feiloai ma oe i le isi masina.”

Pe ana faapea na ou fai atu ai ma faia lena mea, semanu ua atili ai lona le fiafia—ma tiga le loto. Ae ou te iloa nei o’u lagona semanu e i ai. Nai lo se lagona o le faanoanoa a o ou savali ese, semanu ou te lagonaina le faamalo lemu i lo’u mafaufau ma lo’u loto: “Ua lelei ia.”

O i tatou uma lava e tatau ona tautala ma galulue i le suafa o le Atua i taimi e le lava ai lo tatou iloatino e aunoa ma musumusuga. O na taimi e mafai ona oo mai ia i tatou, i le taimi ua le lava ai se sauniuniga. E tele taimi na tupu ai lena mea ia te au. Na tupu i le tele o tausaga talu ai i se falemai lea na fai mai ai se tama ia te a’u ma lau soa, ua ta’u atu e fomai ia te ia o le a toe o ni nai minute ona maliu lea o lona afafine e tolu tausaga sa i ai ni manu’a tuga. A ou tuuina atu o’u lima i luga o le pito e tasi o lona ulu e le o fusia, sa tatau ona ou iloa, i le avea ai o se auauna a le Atua, le mea o le a Ia faia ma fai atu ai.

Na oo mai upu i lo’u mafaufau ma o’u laugutu o le a ola o ia. Sa mapuea aamu le fomai na tu i o’u autafa ona o le inoino ma fai mai ou te aluese. Sa ou savali ese mai lena potu o le falemai ma se lagona o le filemu ma le alofa. Sa ola le teineitiiti ma sa savali mai i le alasavali i le sauniga faamanatuga i lo’u aso mulimuli i lena aai. Ou te manatua pea le olioli ma le lotomalie sa ou lagonaina mai le mea sa ou tautala ai, ma faia i le galuega a le Alii mo lena teineitiiti ma lona aiga.

O le eseesega o o’u lagona i le falemai ma le faanoanoa sa ou lagonaina a o ou savali ese mai lena faitotoa o se tiakono, sa oo mai mai le mea sa ou aoaoina e uiga i le sootaga o le tatalo i le mana o le perisitua. I le avea ai o se tiakono ou te lei iloaina o le mana e tautala ai ma galue i le suafa o le Atua e manaomia ai faaaliga, ma ina ia mauaina pe a tatou manaomiaina, e manaomia ai le tatalo ma le galue i le faatuatua mo le mafutaga a le Agaga Paia.

I le afiafi ae ou te lei alu i lena faitotoa mo taulaga anapogi, sa fai la’u tatalo i le taimi o le a moe ai. Ae mo vaiaso ma masina a o lei oo mai lena telefoni mai le falemai, sa ou mulimuli i se mamanu o le tatalo ma faia le taumafaiga lea na aoao mai e Peresitene Iosefa F. Samita, o le a mafai ai e le Atua ona aumai ia i tatou le musumusuga e tatau ai mo i tatou ia maua le mana i le perisitua. Na ia faaupuina faigofie:

“Tatou te le tau tagi atu ia te ia i ni mau upu. Tatou te le tau faavaivaia o ia i ni tatalo uumi. O le mea e manaomia ona tatou faia, ma le mea e tatau ona tatou faia o ni Au Paia o Aso e Gata Ai, mo lo tatou lava lelei, o le o atu soo i ona luma, e molimau atu ia te ia tatou te manatua o ia ma ua tatou naunau e tauave i o tatou luga lona suafa, tausi ana poloaiga, galueaiina le amiotonu; ma e tatou te mananao i lona Agaga e fesoasoani ia i tatou.”¹

Ona ia fai mai lea o Peresitene Smith ia i matou mea e tatau ona matou tatalo atu ai, o ni ana auauna ua folafola atu e tautatala ma galulue mo le Atua. Fai mai a ia: “O a mea tou te tatalo atu ai? Tou te tatalo ia silafia outou e le Atua, ia faafofoga mai i a outou tatalo, ma ia mafai ona ia faamanuia outou i lona Agaga.”²

E le faapea o le tele o upu e faaaoga, ae o le a manaomia ai sina onosai. O se faalatalata atu i lou Tama Faalelagi ma le faamoemoe ia Ona silafia patino oe. O Ia o le Atua o tagata uma, o le Tama o tagata uma, ae ua naunau e tuuina mai le gauai atoa i se tasi o Ana fanau. Atonu o le mafuaaga lena na faaaoga ai e le Faaola ia upu “Lo matou Tama e o i le lagi, ia paia Lou suafa.”³

E faigofie atu ona maua le lagona e tatau ai o le migao pe a e tootuli pe punou lou ulu, ae e mafai ona e lagonaina o loo e faalatalata atu i lou Tama Faalelagi i se tatalo faasamasamanoa e oo lava i tatalo le leoa, ia o le a tele ina manaomia ona e faia i au auaunaga faaleperisitua. O le a i ai se pisa ma tagata i lou siomaga i le tele o taimi e te ala ai. E faafofogaina e le Atua au tatalo le leoa, ae e ono tatau ona e aoao e tapunia uma mea faalavefau aua o le taimi e te manaomia ai le fesootai atu i le Atua, atonu e le oo mai i ni taimi toafilemu.

Na fautuaina mai e Peresitene Samita o le a manaomia ona e tatalo atu ia silafia ai e le Atua lou valaauga e te auauna atu ia te Ia. Ua uma ona Ia silafia auiliiliga uma o lou valaauga. Sa Ia valaauina oe, ma o le tatalo atu ia te Ia e uiga i lou valaauga, o le a Ia faaali atu ai nisi mea mo oe ia iloa.⁴

O le a ou avatu se faataitaiga o le mea e ono fai e se faiaoga o aiga a o ia tatalo. Atonu ua uma ona e iloa e tatau ona e:

“Asiasi i fale o tagata taitasi, uunaia i latou e tatalo ma le leo ma faalilolilo, ma auai i tiute uma faaleaiga. …

“…Ia leoleo i luga o le ekalesia e le aunoa, ma faatasi ma faamalolosia i latou;

“Ma vaai ia leai se amioletonu i totonu o le ekalesia, po o se feitagai ma le tasi, poo se pepelo, faatuaupua, poo se tautala leaga;

“Ma vaai ia potopoto soo faatasi le ekalesia, ma vaai foi ia fai e tagata uma o le ekalesia o latou tiute.”⁵

Ia, e oo foi lava i le faiaoga o aiga ua i ai le poto masani ma lana soa laitiiti, e matua manino lava le le mafai ona fai e aunoa ma le fesoasoani a le Agaga Paia. Mafaufau i aiga po o tagata taitoatasi, sa tofia oe e auauna i ai. O le faamasinoga a le tagata ma faamoemoega lelei o le a le lava ia.

O le mea lea o le a e tatalo ai mo le ala e iloa ai o latou loto, e iloa ai po o a mea o faaletonu i olaga ma loto o tagata e te lei masani lelei ai ma ē e le naunau ia e iloaina i latou. O le a manaomia ona e iloa le mea e finagalo le Atua e te faia e fesoasoani ai ia te i latou ma faia uma i le mea sili e te mafaia, i le lagonaina o le alofa o le Atua mo i latou.

Talu ai e taua tele ma faigata ou valaauga faaleperisitua, lea na fautua mai ai Peresitene Samita a e tatalo, e te aioi atu pea lava i le Atua ia Ona faamanuia ia te oe i Lona Agaga. O le a e manaomia le Agaga Paia e le faatasi ae i le tele o le a tuu atu ai e le Atua ia te oe mo lau soa tumau. O le mafuaaga lena e tatau ai ona tatou tatalo pea lava ina ia taialaina i tatou e le Atua i la tatou auaunaga mo Ana fanau.

Talu ai e le mafai ona tatou ausia lo tatou gafatia faaleperisitua e aunoa ma lo tatou o faatasi ma le Agaga, o oe o le tulimataiga patino o le fili o le fiafia uma. Afai e mafai ona ia faaosoosoina oe ia fai le agasala, e mafai e ia ona faavaivaia lou mana e taitaia ai e le Agaga ma tuuitiitia ai lou mana i le perisitua. O le mafuaaga lena na saunoa ai Peresitene Samita e ao ona e tatalo e le aunoa ina ia lapataia ma puipuia oe e le Atua mai mea leaga.⁶

Na te lapataia i tatou i le tele o auala. O lapataiga, o se vaega o le faaolataga. O perofeta, aposetolo, peresitene o siteki, epikopo, ma faifeautalai latou te sii uma ae le leo o le lapataiga e sosolaese ai mai mala e ala i le faatuatua ia Iesu Keriso, salamo, ma le osia ma tausia o feagaiga paia.

I le avea ai o se e umia le perisitua, e tatau ona avea oe o se vaega o le leo o le lapataiga a le Alii. Ae e ao ona e ua’i atu oe lava ia i le lapataiga. O le a e le ola faaleagaga e aunoa ma le puipuiga a le mafutaga a le Agaga Paia i lou olaga i aso taitasi.

E tatau ona e tatalo ia maua ma galue ina ia e maua. E na o le faasinoala lena o le a mafai ai ona e maua lou auala i luga o le ala sa’o ma le vaapiapi i puao o mea leaga. O le a avea le Agaga Paia ma ou faasinoala a o Ia faaalia upumoni pe a e suesue i upu a perofeta.

O le mauaina o lena taiala o le a manaomia ai nisi mea e tele nai lo le na o se faalogologo ma faitau faasamasamanoa. O le a manaomia ona e tatalo ma galue i le faatuatua ina ia goto ifo upu o mea moni i le taele o lou loto. E tatau ona e tatalo ia faamanuia oe e le Atua i Lona Agaga, ina ia taitaiina ai e Ia oe i upumoni uma ma faaali atu ia te oe le ala sa’o. O le ala lea o le a Ia lapataia ai ma taiala oe i le ala sa’o i lou olaga ma i lau auaunaga faaleperisitua.

Ua saunia e le konafesi aoao se avanoa sili ina ia faamalosia ai e le Alii ou mana e te auauna atu ai i le perisitua a le Atua. E mafai ona e saunia oe lava, e pei ona ou mautinoa ua e saunia mo lenei konafesi, i le tatalo. E mafai ona e tuufaatasia lou faatuatua ma [le faatuatua] o i latou o le a tatalo. O le a latou tatalo mo faamanuiaga e tele i luga o tagata e toatele.

O le a latou tatalo mo le Agaga ia afio mai i luga o le perofeta o le fofoga taumomoli a le Alii. O le a latou tatalo mo Aposetolo ma auauna uma na tofia e le Atua. E aofia ai iina oe mai lava i le tiakono aupito fou e oo atu i le faitaulaga sili poto masani, ma nisi e matutua ma talavou atonu e le o toe mamao ona o atu lea i le lalolagi o agaga, i le mea o le a latou faalogo ai, “Ua lelei ia, le auauna lelei e ma le faamaoni.”⁷

O le a tuuina atu lena faamamaluga i nisi o le a faateia i lena mea. Atonu latou te lei umia lava se tofi maualuga i le malo o le Atua i le lalolagi. O nisi e manatu e itiiti se taunuuga ua latou vaaia mai i a latou galuega pe faapea foi e lei tuuina atu lava ia te i latou ni avanoa e auauna atu ai. E manatu foi nisi faapea na puupuu lo latou taimi o le auaunaga i lenei olaga nai lo le mea sa latou faamoemoe i ai.

E le o tofi e umia po o le taimi na auauna atu ai o le a taua i le Alii. Ua tatou iloa lenei mea mai le faataoto a le Alii i le au faigaluega i le tovine, lea na tutusa ai le totogi e tusa lava po o le a le umi ae po o fea foi sa latou galulue ai. O le a tauia i latou mo le auala sa latou auauna atu ai.⁸

Ou te iloa se alii, o se uo pele, o lona auaunaga faaletino i le tovine sa faamutaina anapo i le 11:00. Ua tele tausaga o faia ona togafitiga mo le kanesa. I nei tausaga sa faia ai togafitiga, sa ia taliaina se valaauga e faia fonotaga faalevaiaso ma vaaia tagata o lana uarota, ua o ese a latou fanau mai o latou aiga; o nisi o tina ua maliliu tane. O lona valaauga o le fesoasoani ia i latou ia maua le mafanafana o mafutaga ma le aoaoina o le talalelei.

Ina ua ia maua le toe faaiuga vavalo faapea e le o toe umi se taimi e ola ai, sa toesea le epikopo i se malaga faapisinisi. E lua aso mulimuli ane, sa ia auina atu ai se feau i lona epikopo e auala atu i lana taitai vaega o faitaulaga sili. Sa ia ta’ua le mea lenei e uiga i lona tofiga: “Ua ou malamalama o loo malaga le epikopo, o lea la ua ou faia se fuafuaga. Ua ou mafaufau e faia se fonotaga a le matou vaega i le Aso Gafua a sau. E mafai e ni tagata se toalua o le au paia ona ave i matou mo se maimoaga i le Maota Autu mo Konafesi. E mafai ona faaaoga nisi o le au paia e aveina i latou ma ni nai Sikauti e tuleia nofoafaataavale. E fuafua po o ai e saini e o, atonu e lava ni tagata matutua e faia ai e i matou lava, ae e lelei le iloa o loo i ai ni faaleoleo pe a manaomia. E mafai foi ona avea o se po lelei faaleaiga mo le au fesoasoani e aumai ai foi o latou aiga. E ui o lea, faailoa mai a o lei faasalalauina le fuafuaga. … Faafetai.”

Ona ia faateia lea o le epikopo i se telefoni. E aunoa ma se ta’ua o lona lava tulaga po o ana taumafaiga lototoa, sa ia fesili atu, “Epikopo, o i ai se isi mea e mafai ona ou faia mo oe?” E na o le Agaga Paia lava na mafai ai ona ia lagonaina le avega a le epikopo i le taimi o la e matuai mamafatu ai lana foi ia avega. Ma e na o le Agaga foi na mafai ai e ia ona faia se fuafuaga e tautuaina ai ona uso ma tuafafine i le faautautaga lava e tasi lea sa ia faaaogaina e fuafua ai mea fai a le Sikauti a o talavou o ia.

Faatasi ai ma se tatalo o le faatuatua, e mafai ai e le Atua ona to mai ia i tatou le mana i le perisitua mo soo se tulaga atonu o tatou i ai. E na ona manaomia ai lava o lo tatou ole atu i le lotomaulalo mo le Agaga e faaali mai ia i tatou le mea e finagalo le Atua tatou te tautala atu ai ma fai, ma faaauau pea ona ola agavaa mo lena meaalofa.

Ou te tuuina atu la’u molimau o loo soifua le Atua le Tama, e alofa ia i tatou, ma e faafofogaina a tatou tatalo. Ou te molimau atu o Iesu o le Keriso soifua, o Lana Togiola ua mafai ai ona faamamaina i tatou ina ia agavaa mo le mafutaga a le Agaga Paia. Ou te molimau atu faapea, faatasi ai ma lo tatou faatuatua ma le maelega, e i ai le aso o le a mafai ai e i tatou ona faalogo atu i upu o le a aumaia ai le olioli ia i tatou: “Ua lelei ia, le auauna lelei e ma le faamaoni.”⁹ Ou te tatalo ia tatou maua lena faamanuiaga matagofie mai le Matai ua tatou auauna atu i ai. I le suafa o Iesu Keriso, amene.