Elder Von G. Keetch

Korama Muamua a Fitugafulu

Na oo mai se taimi taua tele o le olaga o Elder Von G. Keetch a o ia faamaeaina se vaega faataitai o le avea ma se fesoasoani i le Faamasino Sili o Warren E. Burger ma Faamasino Antonin Scalia o le Ofisa o le Faamasinoga Maualuga a le Iunaite Setete ma sauniuni ai e avea ma se loia maoi.

Na mafai lava ona ia galue i soo se aai i le Iunaite Setete mo le anoanoai o kamupani loia tetele. Nai lo lena, sa la tatalo ma lona faletua o, Bernice Pymm Keetch, mo se musumusuga ia iloa le mea e tatau ona la faia. Ina ua mavae se vaitaimi o sailiiliga, sa toe foi atu le ulugalii i le Aai o Sate Leki, Iuta, lea sa ia galue ai mo le ofisa loia a Kirton McConkie.

I lena taimi, na manatu Elder Keetch atonu o loo ia ositaulagaina lona tomai e galue ai i ni mataupu faaletulafono fou ina ia mafai ai ona ia latalata i le aiga. Ae, i le avea ai ma loia sili tutoatasi mo le Ekalesia, na finauina e Elder Keetch ni mataupu faaletulafono ma ni mataupu e faatatau i le saolotoga o tapuaiga lea ua uma ona faataatia ia faavae. Na ia tu mo le toeitiiti lava o tapuaiga tetele uma faalelotu i le atunuu. “Sa ou fiafia i le mafai ai ona galue mo se faalapotopotoga maoae ma mafai ona galue i ia faafitauli maoae,” o lana tala lea.

Na soifua mai i le aso 17 Mati, 1960, i Provo, Iuta, ia Gary ma Deanne Keetch, o Elder Keetch o le ulumatua o le fanau e toafa. Sa nonofo lona aiga i Orem, Iuta, a o le‘i siitia atu i Pleasant Grove, Iuta—lea o le a la galulue faatasi ai ma lona faletua i le lumanai i le aufono o le seminare a la latou aoga maualuga.

Na auauna atu Elder Keetch i le Misiona a Siamani Dusseldorf ma sa ia alofa i tagata Siamani. Ina ua foi mai le misiona, na faaipoipo o ia ia Bernice Pymm i le Malumalu o Sate Leki i le aso 21 Novema, 1981; e toaona le la fanau. Na faauu Elder Keetch mai le Iunivesite o Polika Iaga i le 1984, ma se faailoga o le tagata malaga i le saienisi faaupufai ma maua se faailoga faaloia mai le iunivesite i le 1987.

I le aluga o tausaga, o Elder Keetch, o le na lagolagoina i le aso 4 Aperila, 2015, i le Korama Muamua a Fitugafulu, na galue i le au epikopo, i le au fautua maualuga, o se peresitene o le siteki, ma o se Fitugafulu Eria.