O Le Avea o le Konafesi ma Vaega o o Tatou Olaga

Mafaufau e faaaoga nisi o nei gaoioiga ma fesili e fai ma vaega amata mo talanoaga faaleaiga po o mafaufauga loloto faaletagata lava ia.

Mo Tamaiti

Na faasoa mai e Elder David A. Bednar o le Korama a Aposetolo e Toasefululua se tala o le lagonaina o le fefe ina ua uma ona ia tataeina faafuasei se faamalama o se faleoloa e lata ane i lona fale (itulau 46). Ona ia aoaoina mai lea, a tatou vaai ia Iesu Keriso ma mulimuli ia te Ia, e mafai ona tatou lagonaina le filemu nai lo le fefe. O le a se mea e mafai ona e faia i aso taitasi ina ia fesoasoani i lau fanau e vaai atu i le Faaola? E faapefea ona e aoaoina i latou e fetaomi atu i luma ia Keriso e tusa lava pe ua oo i taimi faigata?
Na faamatala e Sister Linda K. Burton, peresitene aoao o Le Aualofa, e uiga i se aiga na masii atu i se fale fou e lei faapaina le fanua (itulau 29). Na faailogaina e le tama tuaoi o le fanua i le manoa ma ta‘u atu i lana fanau latou te saogalemu pe afai latou te nonofo ai i totonu o le laina. Na usiusitai le fanau, na tusa lava pe na fiti atu le polo ma pasia le manoa. E mafai faapefea e matua ona fesoasoani i fanau ia saogalemu? O a faamanuiaga e oo mai mai le faalogo atu i o tatou matua? O a tuaoi e tuuina mai e le Tama Faalelagi ia i tatou?
O Epikopo Gérald Caussé, Fesoasoani Muamua i le Au Epikopo Pulefaamalumalu, na faamatalaina se tala e uiga i ni tagata se toatolu i Aferika o e na savalia i le lua vaiaso ia auala palapala ina ia auai i se fonotaga a le itu (itulau 98)! Na latou nonofo mo se vaiaso ina ia mafai ona latou aai ma feinu i le faamanatuga a o lei toe taliu atu i le aiga. Ona latou aveina lea i luga o latou ulu o atigipusa na tumu i kopi o le Tusi a Mamona e tuuina atu i tagata o lo latou nuu. E te manatu i le talalelei o se mea matagofie tele? O a ni osigataulaga e te naunau e faia e ola ai i le talalelei?

Mo Le Autalavou

O le tele o saunoaga o lenei konafesi na faamamafaina ai le taua o le aiga ma auaiga. Mo se faataitaiga, o Sister Bonnie L. Oscarson, peresitene aoao o Tamaitai Talavou, na talosaga atu i tagata o le Ekalesia ia “puipuia le aiga o se nofoaga e lona lua atu i le malumalu lona paia” (itulau 14). O le a le mea e mafai ona e faia, ina ia puipuia ai le aiga? E mafai faapefea ona e fesoasoani e faia lou aiga ia avea ma se nofoaga paia?
Na aoao mai Elder Russell M. Nelson o le Korama a Aposetolo e Toasefululua e faapea o o tatou uiga ma amioga i le Sapati o se faailoga i le va o le Tama Faalelagi ma i tatou (itulau 129). A o e faitau i le saunoaga a Elder Nelson, e mafai ona e mafaufau e uiga i le Aso Sa a sau ma fesili ifo ia te oe lava, “O a faailoga ou te manao e tuu atu i le Atua?”
O Elder Ulisses Soares o le Fitugafulu na talanoa e uiga i se tiakono na mulimuli i faataitaiga a Kapeteni Moronae (itulau 70). Ina ua vaaia e le alii talavou nisi o tamaiti o le vasega o matamata i ata mataga i luga o a latou telefoni feaveai, sa ia ta‘u atu ia i latou o mea sa latou faia e sese ma e tatau ona tuu. Na tuu e se tasi o uo. E faapefea ona tatou maua le malosi e filifili ai le mea sa‘o? E faapefea ona tatou iloa le mea e saogalemu mo i tatou e olioli ai?
O masini eletonika e mafai ona lagonaina le mamana aua latou te tuuina mai ia avanoa i faamatalaga ma ala o faasalalauga ua toeitiiti le faatuaoia. Ae na i ai se isi lava taimi na e tu ai ma mafaufau pe latou te puleaina oe? Fai mai Elder José A. Teixeira o le Fitugafulu, “O se lagona faafouina le tuu ese o a tatou masini faaeletonika mo se taimi” (itulau 96). Faataitai i ai. Filifili se aso i se taimi lata mai e alu ai e aunoa ma se masini feaveai. Atonu e foliga mai e pei o le mea mulimuli lea e te manao e fai, ae o le a faateia oe i le tele o le taimi o le a e faaaluina e talanoa ai ma faia ni manatuaga ma uo ma aiga.
O le anapogi o se tasi o auala sili e matuia ai e uiga i le mana faaleagaga. O Peresitene Henry B. Eyring, Fesoasoani Muamua i le Au Peresitene Sili, na faamanatu mai ia i tatou o le anapogi ma le tatalo na faamalosia Iesu e tetee atu i faaosoosoga a Satani a o i ai le Faaola i le vao (itulau 22). O le isi Aso Sa anapogi e sosoo ai, taumafai e mulimuli i faataitaiga a Iesu ma anapogi ma se faamoemoega. O le a e maua le fesoasoani faalelagi ma le puipuiga foi.

Mo Tagata Matutua

Sa saunoa nisi o failauga o le konafesi i le taua o le faaipoipoga ma aiga i le lalolagi ma i le ata o le faaolataga. E mafai ona e tali i fesili e lima na fesili ai Sister Burton i le itulau 31 ma ia mafaufau loloto ma le agaga tatalo i le auala e sili atu ona e siitia ma alofa atu ai i e sili ona latalata ia te oe. Faatasi ai o se aiga, ia talanoaina pe faapefea ona e faataulai atili atu lou aiga ia Iesu Keriso ma pe faapefea ona e tuuina atu le lagolago sili i le tasi ma le isi.
Sa faamanatu mai e Peresitene Thomas S. Monson ia faamanuiaga e oo mai i le tapuai i le malumalu, e aofia ai le tulaga faaleagaga, filemu, ma le malosi e faatoilalo ai tofotofoga ma faigata (itulau 91). “A o tatou auai atu i le malumalu,” na ia saunoa ai, “e mafai ona oo mai ia te i tatou se maualuga o le faaleagaga ma se lagona o le filemu lea e sili mamao atu nai lo se isi lava lagona e mafai ona oo mai i le loto o le tagata.” O le a se mea e mafai ona e faia ia atili anoa ai lou auai i le malumalu?
O le faatuatua ia Iesu Keriso o se mataupu faavae o le faatinoga. “O le a le faafuasei lava ona tatou talitonu i le Faaola ma Lana talalelei nai lo le faafuasei ona tatou tatalo pe totogi le sefuluai,” na saunoa ai Elder L. Whitney Clayton o le Au Peresitene o Fitugafulu. “Tatou te filifili ma le manino e talitonu” (itulau 36). A o e faitauina lana saunoaga ma saunoaga a Elder Dallin H. Oaks o le Korama a Aposetolo e Toasefululua (itulau 32); Rosemary M. Wixom, peresitene aoao o le Peraimeri (itulau 93); Epikopo Gérald Caussé (itulau 98); ma Elder Kevin W. Pearson o le Fitugafulu (itulau e 114), mafaufau e fai se lisi o auala e faamalosia ai lou faatuatua ia Iesu Keriso ma Lana talalelei. Ona fai lea o se lisi o faamanuiaga ua folafola mai e oo mai i le faatuatua faateleina.
Na aoao mai e Elder Jeffrey R. Holland o le Korama a Aposetolo e Toasefululua o le Togiola ma le Toetu a le Faaola ua aofia ai “le faaaliga aupito taua o le alofa mama na faatino i le talafaasolopito o lenei lalolagi” (itulau 104). E faapefea e ou mafaufauga, upu, ma gaoioiga ona sili atu ona atagia mai ai lou agaga faafetai mo mea ua faia e le Faaola?
O Peresitene Dieter F. Uchtdorf, Fesoasoani Lua i le Au Peresitene Sili, na faamatalaina mai le meaalofa ofoofogia o le alofa tunoa ma le taua o le usiusitai ma le salamo. “O le taumafai ai ia malamalama i le meaalofa o le alofatunoa o le Atua ma o tatou loto ma mafaufau atoa ua tatou maua ai mafuaaga uma e alolofa atu ai ma usiusitai i lo tatou Tama Faalelagi i le agamalu ma le lotofaafetai,” na ia saunoa ai (itulau 107). Mafaufau e faaauau ai pea au suesuega o le alofa tunoa i le faitauina o le Roma 3:23; 6:1–4; 2 Nifae 25:23, 26; Mosaea 2:21; 5:2; 27:25; Alema 34:10, 15; Eteru 12:27; ma Moronae 10:32.