Elder Kim B. Clark

Korama Muamua a Fitugafulu

O se olaga atoa o aoaoga—o se tagata aoga ma se faiaoga—o le a faamanuiaina ai Elder Kim Bryce Clark i lona tofiga fou i le Korama Muamua a Fitugafulu. Sa lagolagoina o ia i le aso 4 Aperila, 2015, o le a amataina e Elder Clark lana auaunaga i ni nai vaiaso pe a maea lona tofiga o se peresitene o le Iunivesite o Polika Iaga–Idaho.

“Na ou aoga talu mai lou lima tausaga,” o le tala lea a le Fitugafulu faatoa valaauina. “Ou te fiafia i le aoaoina ma aoao atu.”

Sa soifua mai o ia i le aso 20 Mati, 1949, i le Aai o Sate Leki, Iuta, ia Merlin ma Helen Mar Clark, o le ulumatua o le fanau e toatolu. Na ia faaaluina lona olaga faatamaitiiti i le Aai o Sate Leki seia oo i le 11 tausaga, ina ua talia e lona tama se galuega i Spokane, Uosigitone.

E ui ina sa ia fuafua e auai i le Iunivesite o Polika Iaga i Provo, Iuta, ao avea ma se tausaga tolu i le aoga maualuga sa ia lagona le manaomia ona ia suesue i isi vaega ma filifili ai loa e talosaga atu i le Iunivesite i Harvard i Massachusetts—o se nofoaga o le a iu lava ina avea ma ona aiga mo le silia ma le tolusefulu tausaga.

Ina ua mavae lona tausaga muamua o suesuega i Harvard, sa auauna atu Elder Clark i le Misiona a South German mai le 1968 i le 1970. Ina ua ia taliu mai sa ia auai i le BYU, lea e lei umi ae feiloai ai ia Sue Lorraine Hunt i lana uarota. Na la faaipoipo i ni nai masina mulimuli ane i le aso 14 Iuni, 1971. O i laua o ni matua o se fanau e toafitu.

O le taimi lava na uma ai ona la faaipoipo, na siitia atu ai le ulugalii i le eria o Boston, Massachusetts, lea sa toe lesitala ai Elder Clark i Harvard. O iina sa ia maua ai se faailoga o le tagata malaga i le faatufugaga ma le faailoga o le matuaofaiva i le faatufugaga, ma sona faailoga Faafomai—i mea tau tupe uma. Na avea Elder Clark ma se tasi o faiaoga o le Aoga Faapisinisi a Harvard i le 1978 ma mulimuli ane avea ma fautua o le aoga i le 1995. I le 2005 sa avea o ia ma peresitene o le BYU-Idaho, lea na avea ai mo le toeitiiti lava sefulu tausaga.

Na auauna atu Elder Clark o se peresitene o le korama a toeaina, failautusi faapitoa a le uarota, fesoasoani o le epikopo, epikopo, fautua maualuga, fesoasoani o le peresitene o le misiona a le siteki, ma Fitugafulu Eria.