Le Au Paia o Aso e Gata Ai, Taumafai Pea

Saunia e Elder Dale G. Renlund

O Le Fitugafulu

A tatou taumafai, tutumau, ma fesoasoani i isi ia faia lea lava mea e tasi, o i tatou la o le Au Paia moni o Aso e Gata Ai.

Ou uso e ma tuafafine pele, ia Tesema 2013 na faanoanoa ai le lalolagi i le maliu o Nelson Mandela. I le mavae ai o tausaga e 27 o faalepuipui ai mo lana matafaioi i le tetee atu i faiga faailogalanu i lena taimi, na avea ai Mandela ma uluai peresitene filifilia o le faatemokalasi o Aferika i Saute. Sa ofoofogia lona faamagaloina o i latou na faafalepuipuiina o ia. Sa viia ma faamamaluina o ia e tagata uma.¹ Sa teena soo lava e Mandela ia viiga i le faapea mai, “E le o au o se tagata paia—ae sei vagana lava ua outou manatu o se tagata paia o se tagata agasala o loo taumafai pea.”²

O lenei saunoaga—“o se tagata paia o se tagata agasala o loo taumafai pea”—e tatau ona toe faamautinoaina ma faamalosiauina ai tagata o le Ekalesia. E ui o loo ta’ua i tatou o le “Au Paia o Aso e Gata Ai,” ae o nisi taimi tatou te le maua ai le toafimalie i lenei faalagiga. O le faaupuga Au Paia e masani ona faaaoga e faailoga ai i latou ua ausiaina se tulaga siitia o le paia po o le atoatoa. Ma ua tatou iloa lelei tatou te le atoatoa.

E ui i lea, o o tatou talitonuga faalelotu ua tatou aoao ai, e mafai ona faaatoatoaina i tatou e ala i le faateleina o le “faalagolago atoa” e le aunoa i le mataupu faavae a Keriso: faatinoina o le faatuatua ia te Ia, salamo, taumamafa ma feinu i le faamanatuga e faafou ai feagaiga ma faamanuiaga o le papatisoga, ma le mauaina o le Agaga Paia e fai ma soa tumau i se tulaga maualuga atu. A tatou faia lea mea, e avea atili i tatou e faapei o Keriso ma ua mafai ona tumau e oo i le iuga, ma mea uma e aofia ai.³ I se faaupuga faigofie, e popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai.⁴ E popole o Ia ina ia tatou taumafai pea.

O le tala malie o le As You Like It, sa tusia e le tusitala Peretania o Viliamu Siekisipia, o loo faaalia ai se suiga tele i se olaga o se tagata. Na taumafai se uso matua ina ia fasiotia lona uso laitiiti. E ui lava i le iloaina o lenei mea, ae na laveai e le uso laitiiti lona uso leaga mai se oti mautinoa. Ina ua iloa e le uso matua le agaalofa o lona uso laitiiti, na matuai suia atoa ma le tumau o ia ma maua ai le mea na ia ta’ua o se “liua.” Mulimuli ane sa o atu nisi tamaitai i le uso matua ma fesili i ai, “E le o oe ea lea sa taupulepule e fasioti [lou uso]?”

Na tali atu le uso matua, “‘Sa ou faapena; ae ou te le o toe faapena: Ou te le mā e tau atu ia te outou lo’u tagata tuai—, ona ua matagofie tele lo’u liua, ua avea ai nei au ma tagata ua i ai nei.”⁵

Mo i tatou, ona o le alofa mutimutivale ma le Togiola a Iesu Keriso, o sea suiga e le o se talafatu tusitusia: E ala mai ia Esekielu, na tautino mai ai le Alii:

“E le pa’ū foi le ua amio leaga i lana amio leaga i le aso e liliu ese ai o ia i lana amio leaga. …

“… Afai e liliu ese ia i lana agasala, ma ua fai e ia le amio tatau ma le amiotonu;

“… Faafoi … le mea e tuu faafaatau, ma toe avane le mea na ia fao, ma ia savali i sauniga e ola ai, ma ua le fai le amio leaga; e ola lava ia. …

“O ana agasala ua ia faia e le ta’uta’ua ia te ia; ua ia fai le amio tatau ma le tonu.”⁶

I Lona alofa mutimutivale, ua folafola mai e le Atua le faamagaloga pe a tatou salamo ma liliu ese ma le amio leaga—o lea tulaga o le a le ta’uta’ua mai ai a tatou agasala ia i tatou. Mo i tatou, ona o le Togiola a Keriso ma lo tatou salamo, e mafai ai ona tatou tepa atu i a tatou amioga o le tuanai ma faapea, “Sa ou faapena, ae ou te le o toe faapena.” Po o le a lava lo tatou amioleaga, e mafai lava ona tatou faapea, “Sa ou faapena. Ae o lena tagata amioleaga i le tuanai ua le o toe avea ai au.”⁷

Sa aoao mai Peresitene Thomas S. Monson, “O se tasi o meaalofa aupito silisili a le Atua mo i tatou o le olioli lea o le taumafai pea lava pea, aua e le manaomia ona faamuta i se toilalo.”⁸ E tusa lava foi pe tatou te faia ma le mautinoa le agasala pe feagai soo foi ma le toilalo ma le le fiafia, ae o le taimi lava tatou te filifili ai e toe taumafai, o le a mafai ona fesoasoani mai le Togiola a Keriso ia i tatou. Ma e ao ona tatou manatuaina e le o le Agaga Paia lena e tau maia ia i tatou ua matua tatou leaga lava ma ua sili ai loa ona tatou faavaivai.

O le finagalo o le Atua ina ia taumafai pea le Au Paia o Aso e Gata Ai ua oo atu foi i tala atu o le faatoilaloina o le agasala. Pe o tatou mafatia ona o faafitauli o mafutaga, luitau faaletamaoaiga, po o faamai po o se taunuuga o agasala a nisi tagata, e mafai lava e le Togiola le i’u a le Faaola ona faamaloloina—ma e masalo aemaise lava—i latou ua mafatia fua. E malamalama atoatoa o Ia i le mea e taua o le mafatia fua ona o se taunuuga o le solitulafono a le isi tagata. E pei ona sa valoia, o le Faaola o le a “fufusi i e loto momomo, … [faa]fiafia i e faanoanoa; … foaiina atu … le matagofie e sui a’i le lefulefu, o le uu o le olioli e sui a’i le faanoanoa, [ma le] ofu e fai a’i viiga e sui a’i le loto faavaivai.”⁹ Po o le a lava le tulaga e i ai, faatasi ai ma Lana fesoasoani, ua faamoemoeina e le Atua le Au Paia o Aso e Gata Ai ina ia taumafai pea.

E pei lava ona olioli le Atua pe a tatou tutumau, e faapena foi ona le fiafia o Ia pe afai tatou te le faamamaluina le taumafai pea o isi. Sa faasoa mai e le ma uo pele o Topa le auala sa ia aoaoina ai lenei lesona mai lona tina, o Iulia. O Iulia ma Topa o nisi ia o uluai tagata uli na liliu mai i Aferika i Saute. Ina ua faamutaina faiga faailogalanu, sa faatagaina loa tagata uli ma papae o le Ekalesia e auai faatasi i le lotu. Mo le toatele, o le tulaga tutusa o fegalegaleaiga i le va o ituaiga ia e lua sa fou ma faigata. I se tasi taimi, a o auai Iulia ma Topa i le lotu, sa la lagonaina e le o taulimaina i laua i le agalelei e nisi o tagata papae o le ekalesia. Ina ua la o ese atu, sa faitio atu Topa ma le le fiafia i lona tina. Sa faalogo ma le totoa Iulia seia oo ina sasaa atu e Topa lona le fiafia. Ona faapea atu lea o Iulia: “Oi, Topa, o le Ekalesia e pei lava o se falemai tele, ma o loo tatou taufai mamai uma i o tatou lava tulaga. Ua tatou o mai i le lotu ina ia maua se fesoasoani.”

O le faamatalaga a Iulia ua atagia mai ai se malamalamaaga taua tele. E le gata e tatau ona tatou onosai a o taumafai isi e foia o latou gasegase faaletagata lava ia; ae e tatau foi ona tatou agalelei atu, faapalepale, lagolago atu, ma ia loto malamalama. E pei ona uunaia i tatou e le Atua ia taumafai pea, ua Ia faamoemoeina foi i tatou ia tuu atu foi i isi le avanoa e faia ai lea lava mea e tasi, i la latou lava fua faatatau. O le a oo mai le Togiola i o tatou olaga i fuataga tetele atu. O le a tatou iloaina ai e faapea po o a lava ni eseesega ua iloagofie, o loo manaomiaina e i tatou uma le Togiola le iu lava e tasi.

I ni nai tausaga ua mavae sa valaauina ai se alii talavou lelei e igoa ia Curtis e auauna atu i se misiona. O ia o se ituaiga o faifeautalai e tatalo uma peresitene o misiona ia latou maua. Sa gauai o ia ma galue malosi. I se tasi taimi, sa tofia ai o ia e soa ma se faifeautalai sa faatamaitiiti lava, faigata ona fegalegaleai ma tagata, ma sa lei naunau patino ia faataunuu le galuega.

I se tasi aso a o la tietie atu i a la uila vilivae, sa tepa atu i tua Curtis ma vaai atu i lana soa ua oso ese mai lana uila e leai ma se tala ma savali. Sa faailoa atu lemu e Curtis lona faanoanoa i le Atua; o se galuega mamafa le tofia i se soa e matua manaomia ona toe tau faamalosi ina ia faataunuu le galuega. I ni nai minute mulimuli ane, sa maua e Curtis se uunaiga loloto, e peiseai na fetalai i ai le Atua, “E te iloa, faatusatusa mai ia te au, o oulua e le telē lava se eseesega.” Sa aoaoina e Curtis e manaomia ona ia onosai i se soa le atoatoa sa taumafai foi i lana lava ala.

O la’u valaaulia ia i tatou uma ia iloilo o tatou olaga, salamo, ma taumafai pea. Afai tatou te le taumafai, ua na o i tatou lava la o le au agasala o aso e gata ai; afai tatou te le tutumau, o i tatou o le au faavaivai o aso e gata ai; ma afai tatou te le faatagaina isi e taumafai, ua nao i tatou o le au pepelo o aso e gata ai.¹⁰ Ae a tatou taumafai, tutumau, ma fesoasoani i isi ia faia lea lava mea e tasi, o i tatou la o le Au Paia moni o Aso e Gata Ai. A tatou suia, o le a tatou iloaina e popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai.¹¹

Ou te matua faafetai lava mo le Faaola, mo Lana Togiola le iu, ma mo perofeta o aso e gata ai o loo uunaia i tatou ia avea ma Au Paia o Aso e Gata Ai, ia taumafai pea.¹² Ou te molimau atu e moni o loo soifua le Faaola, i le suafa o Iesu Keriso, amene.