O Le Sapati o Se Aso Fiafia

Saunia e Elder Russell M. Nelson

O Le Korama a Aposetolo e Toasefululua

E mafai faapefea ona e faamautinoa o ou uiga i le Sapati o le a taitaia oe i le olioli ma le fiafia?

Uso e ma tuafafine pele, ua mamalu lava nei aso e lua o le konafesi. Ua siitiaina i tatou e ala i musika musuia ma tatalo matagofie. Ua faamalosia o tatou agaga e savali o le malamalama ma le upumoni. I lenei Aso Sa o le Eseta, ua tatou toe faafetai faatasi ai ma le faamaoni i le Atua mo se perofeta!

O le fesili mo i tatou taitoatasi o le: ona o mea sa ou faalogoina ma lagonaina i le taimi o lenei konafesi, o le a faapefea ona suia ai a’u? Po o le a lava lau tali, ou te fia valaauliaina foi outou e suesue o outou lagona ma au amioga i le aso Sapati.

Ua lofituina au i upu a Isaia, o le sa ta’ua le Sapati “o le aso fiafia.”¹ Ae ou te fesiligia au lava, pe o le Sapati o se aso fiafia moni lava mo oe ma au?

Sa ou iloaina muamua lava o le Sapati o se aso fiafia i le tele o tausaga ua mavae a o avea ma se fomai tipitipi pisi, na avea le Sapati ma se aso mo le faamalologa faaletagata lava ia. E oo atu i le faaiuga o vaiaso taitasi, ua tiga ou lima mai le olo soo i le fasimoli, vai, ma se palasi e malo nifo. Na ou manaomia foi se malologa mai le mamafa o se galuega faigata. O le Aso Sa la na maua ai lena toomaga sa sili ona manaomia.

O le a le uiga o le fetalaiga a le Faaola ina ua Ia fetalai mai “ua faia le sapati mo tagata, a ua le faia tagata mo le sapati”?² Ou te talitonu na finagalo o Ia ina ia tatou malamalama o le Sapati o Lana meaalofa lea ia i tatou, faatagaina le malologa moni mai faigata o le olaga i aso taitasi ma le avanoa mo le toefaafouina faaleagaga ma faaletino. Na tuuina mai e le Atua ia i tatou lenei aso faapitoa, e le mo mea faafiafia po o galuega o aso taitasi ae mo se malologa mai tiute, faapea foi i le faaletino ma le faaleagaga.

I le faaEperu, o le uiga o le upu Sapati o le “malolo.” Na i ai lava le faamoemoega o le Sapati talu mai le Foafoaga o le lalolagi, ina ua uma aso e ono na galue ai, na malolo le Alii mai le galuega o le foafoaga.³ Ina ua Ia faaali atu Tulafono e Sefulu ia Mose i se taimi mulimuli ane, na poloaiina e le Atua i tatou ia “manatua le aso sapati e… faapaiaina.”⁴ Mulimuli ane, na faamamaluina le Sapati o se faamanatu o le laveaiina o Isaraelu mai lo latou nofopologa i Aikupito.⁵ Masalo o le mea sili ona taua, na tuuina mai le Sapati e avea ma feagaiga e faavavau, o se famanatu faifai pea o le a faapaiaina e le Alii Lona nuu.⁶

E le gata i lea, ua tatou aai ma feinu i le taimi nei i le faamanatuga i le aso Sapati e faamanatu ai le Togiola a Iesu Keriso.⁷ O le faia o lea mea ua tatou osifeagaiga ai ua tatou loto e ave i o tatou luga Lona suafa paia.⁸

Ua faailoa mai e le Faaola o Ia Lava o le Alii o le Sapati.⁹ O Lona aso lea! Ua Ia toe faamanatu mai pea ia i tatou ina ia tausia le Sapati¹⁰ po o le faapaia le aso Sapati.¹¹ Ua tatou osi feagaiga o le a tatou faia lena mea.

E faapefea ona tatou faapaiaina le aso Sapati? A o ou laitiiti, sa ou suesue i lisi na faia e isi e faatatau i mea e fai ma mea e lē faia i le Sapati. O se taimi mulimuli ane sa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi.¹² Faatasi ai ma lena malamalamaaga, sa ou le toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga talafeagai pe leai foi mo le Sapati, e na o lo’u fesili lava ia te au, “O le a le faailoga ou te manao e avatu i le Atua?” O lena fesili e matua ta’u manino mai ai lava a’u filifiliga e uiga i le aso Sapati.

E ui na i ai lava i le amataga le aoaoga faavae e faatatau i le aso Sapati, ae ua toe faafouina i nei aso e gata ai e avea o se vaega o se feagaiga fou ma se folafolaga. Faafofoga i le mana o lenei folafolaga paia:

“Ma ina ia mafai ona e tausi atili atoatoa oe lava i le lē pisia mai le lalolagi, ia e alu atu i le fale tatalo ma osi a’e i luga au faamanatuga i lo’u aso paia;

“Aua e moni o se aso lenei ua tofia mo oe e te malolo ai mai au galuega, ma avatu ai au tapuaiga i le Silisili Ese. …

“Ma i le aso lenei … tau lava o le saunia o au meaai ma le manatu tasi o le loto ina ia atoatoa lau anapogi, … ina ia atoatoa lou olioli. …

“Ma o le tulaga e oo i ai la outou faia o nei mea ma le faafetai, ma loto ma mata fiafia, ae lē ma le ata leoleoā, aua o le agasala lea, ae ma le loto ma le mata fiafia, … e a outou le atoatoa o le lalolagi.”¹³

Mafaufau i le maoae o lenei fetalaiga! O le atoatoaga o le lalolagi ua folafola mai ia i latou o e tausia le paia o le aso Sapati.¹⁴ Leitioa a ta’ua e Isaia le Sapati “o le aso fiafia.”

E mafai faapefea ona e faamautinoa o ou uiga i le Sapati o le a taitaia oe i le olioli ma le fiafia? E faaopoopo atu i lou alu i le lotu, ‘ai ma inu i le faamanatuga, ma le filiga i lou valaauga patino e auauna atu, o a nisi gaoioiga o le a fesoasoani ai e avea le Sapati ma se aso fiafia mo oe? O le a se faailoga o le a e avatu i le Alii e faaalia ai lou alofa mo Ia?

O le Sapati e aumaia ai se avanoa matagofie e faamalosia ai mafutaga faaleaiga. O le mea moni lava, e finagalo le Atua ia i tatou uma, o Lana fanau, ina ia toe foi atu ia te Ia o ni Au Paia ua maua faaeega paia, faamauina i le malumalu o ni aiga, i o tatou tuaa, ma i a tatou fanau.¹⁵

Tatou te faia le Sapati o se aso fiafia pe a tatou aoao atu le talalelei i a tatou fanau. O o tatou tiutetauave o ni mātua ua matuā manino lava. Na fetalai mai le Alii, “O le tulaga e oo i ai le i ai o matua e fai fanau i Siona … ae latou te le aoaoina i latou ia malamalama i le mataupu faavae o le salamo, faatuatua ia Keriso le Alo o le Atua soifua, ma e uiga i le papatisoga ma le meaalofa o le Agaga Paia e ala i le faaee o lima, pe a valu tausaga le matutua, ia i ai le agasala i luga o ulu o matua.”¹⁶

I tausaga ua mavae sa faamamafa mai ai e le Au Peresitene Sili le taua o taimi anoa faaleaiga. Sa latou tusia:

“Matou te talosaga atu i matua ina ia tuu atu a latou taumafaiga aupito sili i le aoaoina ma le faafaileleina o a latou fanau i mataupu faavae o le talalelei lea o le a taofia faalatalata mai i latou i le Ekalesia. O le aiga o le faavae lea o se olaga amiotonu, ma e leai se isi mea e mafai ona suitulaga ai pe faataunuuina ona tiute taua i le faatinoina o tiutetauave na tuuina mai e le Atua.

“Matou te fautua atu i matua ma fanau ina ia tuu le faamuamua aupito sili i tatalo faaleaiga, afiafi faaleaiga, suesue ma aoao i le talalelei, ma gaoioiga lelei faaleaiga. Po o le a lava le lelei ma le talafeagai e i ai isi mea e fai po o gaoioiga, e le tatau ona faatagaina e suia ai tiute ua tofia mai le lagi, ia e na o matua ma aiga e mafai ona faataunuu lelei ai.”¹⁷

A o ou mafaufau i lenei fautuaga, sa toeitiiti lava ou moomoo maimau pe ana ou toe avea ma se tamā talavou. Ua maua e matua i le taimi nei ia punaoa matagofie e fesoasoani ia i latou ina ia sili atu ona anoa taimi faaleaiga, i le Sapati ma isi foi aso. Ua latou maua le LDS.org, Mormon.org, ata o le Tusipaia, o le Alaata faaMamona, o le Potutusi o Ata o le Talalelei, le Friend, le New Era, le Ensign, le Liahona, ma le tele—ma le anoanoai. O nei punaoa ua matua aoga i matua i le faataunuuina o a latou tiute paia o le aoao atu o a latou fanau. E leai se isi galuega e sili atu le taua nai lo o tulaga faamatua amiotonu ma le faaeteete!

A o e aoao atu le talalelei, o le a e aoao atili. O le auala lenei a le Alii e fesoasoani ai ia te oe ina ia malamalama i Lana talalelei. Na Ia fetalai mai:

“Ou te tuu atu ia te outou se poloaiga ia outou aoao i le tasi mataupu faavae o le malo.

“Ia outou aoao atu ma le filiga … , ina ia mafai ona aoaoina atoatoa atili outou … i mataupu faavae, i le tulafono o le talalelei, i mea uma tau i le malo o le Atua.”¹⁸

O sea ituaiga o suesuega o le talalelei e avea ai le Sapati ma se aso fiafia. O lenei folafolaga e talafeagai lava e tusa lava po o le a le toatele o le aiga, po o ai o aofia ai, po o fea o i ai.

E le gata i le taimi ma le aiga, e mafai ona e maua se aso fiafia moni i le Sapati i le faia o galuega o talafaasolopito o aiga. O le sailia ma le mauaina o tagata o aiga o e na muamua mai ia te oe i le lalolagi—o i latou o e lei maua se avanoa e talia ai le talalelei a o i ai iinei—e mafai ona aumaia ai le olioli sili.

Sa ou molimauina e au lava ia lenei mea. I ni nai tausaga ua mavae, na naunau ai si ou toalua pele, o Wendy, ia iloa le faiga o sailiga o talafaasolopito o aiga. Na tuai lana faiga i le amataga, ae o sina mea itiiti i lea taimi ma lea taimi, na ia iloa ai le faigofie o le faiga o lenei galuega paia. Ma ou te lei vaai muamua lava ua ia fiafia faapea. E te le tau malaga foi i isi atunuu po o se nofoaga autu o talafaasolopito o aiga. I le fale, faatasi ai ma le fesoasoani o se komepiuta po o se masini feaveai, e mafai ona e iloa ai agaga o e o loo faananau mai mo o latou sauniga. Ia faia le Sapati o se aso fiafia i le sailia o ou tuaa ma faasaoloto i latou mai le falepuipui o agaga!¹⁹

Ia faia le Sapati ma se aso fiafia i le tuuina atu o se auaunaga i isi, aemaise i latou o e le o malolosi po o i latou o e ua tuuatoatasi pe lē tagolima.²⁰ O le siitiaina o o latou agaga o le a siitiaina ai foi oe.

Ina ua ta’ua e Isaia le Sapati o “le aso fiafia,” sa ia aoao mai foi ia i tatou le ala ia avea ai ma se aso fiafia. Na ia fai mai:

“Afai e te liliu ese … a e le faia lou lava loto i lo’u aso sa; ma e ta’ua le sapati, o le aso fiafia, … ma e faamamalu [i le Alii], e le faia au lava amio, o loo le maua ai lou lava fiafia, ma e le tautala ai i au lava upu:

“Ona e fiafia lava lea i le Alii.”²¹

O le le taulai atu i au “lava mea e te fiafia i ai” i le Sapati e manaomia ai le amio-pulea. Atonu e manaomia ai le aloese mai mea e te manao i ai. Afai e te filifili e faafiafia oe lava i le Alii, o le a lē faatagaina e te taulimaina e pei o se isi lava aso. O gaoioiga masani ma faafiafia e mafai ona faia i isi foi taimi.

Mafaufau i le mea lenei: O le totogi o le sefuluai, tatou te faafoi atu ai le tasi vae sefulu o a tatou tupe i le Alii. I le tausia o le paia o le Sapati, tatou te faapolopolo ai se aso se tasi mai le fitu mo Ia. O se faamanuiaga la mo i tatou le faapaiaina o tupe ma taimi ia te Ia, o lē ua tuuina mai le ola mo i tatou i aso taitasi.²²

O le faatuatua i le Atua o se taunuuga o le alofa mo le Sapati; o le faatuatua i le Sapati o se taunuuga o le alofa mo le Atua. O le Sapati paia o se aso fiafia moni lava.

A o tulata atu i le faaiuga o lenei konafesi, ua tatou iloa po o fea lava o tatou nonofo ai o i tatou o ni faataitaiga o e talitonu [ia Keriso] i totonu o tatou aiga, tuaoi, ma uo.²³ O tagata talitonu faamaoni e tausia le paia o le aso Sapati.

Ou te faaiu atu ai i le tatalo faamavae a Moronae, a o ia faaiuina le Tusi a Mamona. Na ia tusia, “O mai ia Keriso, ma faaatoatoaina ia te ia, ma faafiti outou lava mai mea uma e le faaleatua; ma afai tou te faafiti outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona … faapaiaina lea o outou ia Keriso.”²⁴

Faatasi ai ma lou alofa tele ia te outou, ou te tuuina atu ai lau tatalo, molimau, ma faamanuiaga i le suafa paia o Iesu Keriso, amene.