Juon Kālet eo Em̧m̧an Tata
Kar tōre eo in n̄an an naaj kar ikkure ippān tiim eo e wiin—elmen an naaj kar ba jaab?
“Kwōn Kememej raan in Sabōt, n̄an kokwojarjar e” (Mosaia 13:16).
Miranda ekar kōkaiuriur ļo̧k n̄an kōjam eo im̧aan, em̧ōnōnō bwe m̧weo im̧ōn em̧ōļo ļo̧k jen okmānen in jōm̧ar eo inabōj. Ekar menokadu jān an ikkure soccer keem eo an āliktata ilo iien ikkure in im ekar illu bwe Teal Turbos ekar luuj. Bar juon alen.
Jinō ekar deļo̧n̄tok ilowaan ruum̧ eo im ej ineek juon bato in dān im juon bāāk in bwein jiļait in oran jān keem eo. “Eļap an em̧m̧an am̧ ikkure. Juon ripo̧bo ej juon jerbal epen.”
Miranda ekar em̧m̧an an ikkure—liin ekar lōn̄ alen an baur bo̧o̧l eo im kajoor an ijuuj jān kar m̧okta. Ak enan̄in aolep leddik ro ilo tiim eo an rejan̄in kar ikkure soccer m̧oktaļo̧k, im rainin raar kam̧oole: raar luuji aolepān ikkure ko aer ilo iien ikkure in.
“Ikōņaan bwe in maron̄ kar pād ilo juon tiim eo ejkab baj wiin, kwōjeļā? Jidik dān in kōmjalal jān tōrerein mejān Miranda im ekar wōtlo̧k ioon jiiln̄ij buļū-maroro eo an. Ke ej nukuj mejān bwe en kilōk, taļboon eo ekar jan̄.
Jinō ekar kotak taļboon eo eālkin jidik iien ekar ba, “am̧ taļboon e”
“Iakwe, Miranda? Tom in, kooj eo an Chili Kickers. Ikar alooje ikkure eo am̧ rainin. Kolukkuun kar jejjet ijeņ.”
Miranda ekar ikkūmļo̧k jon̄an emokaj an emenono. Chili Kickers rōkar m̧ōkade tata iaan tiim in soccer ilo iien jiie eo!
“Tiim in am ej etal n̄an juon jiee n̄an kappok nōm̧ba juon allōn̄ in laļ. Ekar em̧m̧an am̧ ikkure rainin im ikōņaan bwe kwōn itok ippām āinwōt juon ripinej jenkwan ribo̧bo e.”
Miranda eaar lukkuun m̧ōņōņō. Ekar en̄in juon iien em̧m̧an n̄an an ikkure ippān tiim eo e win!
“Ikōņaan iwōj!” Miranda eaar ba. Raar bar kōnono jet minit ikkijen kōmeļeļe ko m̧okta jān an likūt taļboon eo im ettōrļo̧k n̄an ruum̧ eo juon im ba n̄an jinen. Raar jim̧or jino jeje raan in kamminene im ikkure ko ilo kōļenta eo an baam̧le eo.
Em̧ōkaj an jinō bōjrak an jeje, peen eo an eudidid ioon juon iaan bo̧o̧k ko ilo kōļanta eo.
“Oo. Miranda, ikkure kein aolep rej kōm̧m̧an ilo raan in Jabōt. En̄ iō, lale.” Ekar jitōn̄ļo̧k iien ikkure ko im oktak ļo̧k n̄an Miranda kōn mejān inepata. “Ta eo kwoj ļōmņak jej aikuj kōm̧m̧ane?”
Miranda ekar lukkuun inepata, im ej kij tien ke ej ļōm̧nake kālet ko an. Jinō em̧aron̄ kōtļo̧k an ikkure eļan̄n̄e ekajjitōk, ak eļak ļōmņake an ikkure ilo raan in Jabōt—im eļaptata jako jān jar—ej en̄jake an nan̄inmej ilo ļo̧jen. Ekar jeļā bwe Jabōt ej iien jar im kabun̄jar n̄an Jemedwōj Ilan̄, im ekar jab maron̄ lukkuun kōm̧m̧ane men kein ilo iien an ikkure soccer.
“Ij ļōm̧nak ij aikuj bar kūri im ba n̄an e ke ijjab maron̄ ikkure,” Miranda ekar ba. Ekar kate bwe en jab jan̄. Men̄e ekar jeļā ke kālet eo ejim̧we eo, ekar pen n̄an kōjekdo̧o̧n juon men eo elukkuun ļap an kar kōņaan.
“Im kwojeļā ta eo ikar ļōm̧nake?” M̧am̧a ekar ba, ej atbakuje. “Ij ļōmņak kwoj juon ajri eo eļap an em̧m̧an.”
Jabōt eo, ke Miranda ekar jijet ilowaan Būraimere, ekar ļōmņake tok kālet eo em̧m̧an ekar kōm̧m̧ane. Kouj eo ekar bwilōn̄ ke Miranda ekar taļboon ļo̧k im ba ejjab maron̄ ikkure soccer ilo raan in Jabōt. Ekar kajjieon̄ kōm̧m̧ane menin n̄an ukōt an ļōm̧ņak, ak eļak kar de pen ilo kālet eo an. Kiiō, ke ej ron̄jake al ko an Būraimere im katak ko, Miranda ekar lukkuun m̧ōņōņō. En̄jake in aenōm̧m̧an ilo būruōn ej leļo̧k n̄an e juon kōjatdikdik bwe ej pād ilo juon jikin em̧m̧an. Aliktata ekar kōm̧m̧ane kālet eo em̧m̧an tata.
Kōmeļeļe jān Brad Teare