Jerbal in jipan̄ ilo KABUN̄ IN
Ebwe ke Ijo Ikar Kōm̧m̧ane?
Rijeje eo ej jokwe ilo Utah, USA.
Juon katak kōn sip eo ejebwābwe ekar jipan̄ eō meļeļe ekōjkan aō kakūrm̧ool eddo eo aō.
Kōmeļeļe ilo m̧ōttan ko an pija eo jān Mike Boyland/iStock/Thinkstock im Oleksiy Fedorov/Hemera/Thinkstock
Ke ikar 23 iiō rūtto, ikar bōk kūr in āinwōt juon būreejtōn an Doulul eo an Kōrā ilo ward eo an rijikuuļ ro emōj aer m̧are. Ij keememej wōt mekarta ekar jab em̧m̧an en̄jake eo, ekar wōr aō ikdeleel in kōm̧m̧ane ijo em̧m̧antata. Ikar kōņaan im m̧ōņōņō in jerbal ak ikar pere maron̄ eo ippa āinwōt juon ritōl em̧m̧an.
Ālkin jejjo allōn̄ ko āinwōt būreejtōn eo an Doulul eo an Kōrā, ikar en̄jake ke ekar jab bwe jon̄an eo ij kōm̧m̧ane. Ikar kōņaan bwe in maron̄ jeļā karōk aō ippān sister ro im bwe in maron̄ jeļā aikuj ko aer kajjojo, ak ikar en̄jake bwe ikar jab kōttōbrak menin.
Ikar kōnono ippān bisop eo aō im kwaļo̧k abōņōņō ko aō. Ikar kōmeļeļeiki ewi jon̄an aō jab maron̄ kar jipan̄ aolep sister ro ikar kōņaan. Ikar kōmeļeļeiki wāween aō kōņaan bwe en kar ļalem n̄a bwe in kōttōbrak jerbal eo ilo wāween eo ikar ļōmņake. Ikar kajjieon̄ dāpij im jab kwaļo̧k inepata eo aō im jab lukkuun ļōmņak kake, ak meja ekar obrak kōn dān in kōmjaļaal im ebbweer. Ekar ettōn̄ im letok jet iaan rojan̄ ko rem̧m̧antata an ritōl ikar maron̄ būki.
“Kwojeļā ke kōn bwebwenato in rilale sip eo, eo ekar luuji juon iaan sip ko an, ekar likūt ’ratimjuonn̄oul ratimjuon im pukōtļo̧k eo juon?” ekar kajjitōk (lale Luk 15:4–7). Ikar m̧ōm̧ajidjid.
“Āinwōt eļap māletlet ilo būrabōļ in,” ekar wōnm̧aanļo̧k wōt. “Rilale sip eo ekar jeļā bwe ratimjuonn̄oul im ratimjuon renaaj em̧m̧an aer pād eļan̄n̄e enaaj likūt er im pukōt sip eo ejebwābwe.”
Innām bisop eo aō ekar letok naan in rōjan̄ in:
“Kwoj loe ke, ratimjuonn̄oul im ratimjuon epidodo aer maron̄ lale doon n̄e kwojako. Renaaj rōjan̄ doon im rie doon. Ij ļōmņak bwe kwōn ļōmņak wōt kōn ro me rejako. Ro jet enaaj em̧m̧an aer MOUR.”
Ikar en̄jake juon kam̧ool ekajoor bwe men eo ekar jiron̄ eō ekar m̧ool im bwe ikar jab aikuj in inepata kōn aolepān jarlepju eo ilo juon wōt iien. Jibadbad eo aō ekar pukōt ro rekar jōbwābwe im karuwaineneik tok er n̄an wōrwōr in. Ilo wāween in, jibadbad ko an Jemedwōj Ilan̄ remaron̄ kūrm̧ool, im imaron̄ in erom̧ juon kein jerbal ilo pein.
Ilo aō ron̄jake naan in kōkapilōklōk in an bisop eo, ikar en̄jake juon meļeļe eļap kōn wāween an Irooj naaj kōņaan bwe in jerbal ilo aelōn̄ in kiin̄ in An. Ikar barāinwōt bōk juon kakūrm̧ool in an jetōb kōkajoorļo̧k eō ilo kūr eo aō kōnke ikar jerbal āinwōt an kar Rilo̧mo̧o̧r eo katakin. Jān kajoor eo an Jetōb Kwojarjar, bisop eo aō ekar letok n̄an n̄a juon menin letok eļap n̄an meļeļe im loe.
Ij kam̧ool bwe ilo ad jar im pukōt im̧we jān ritōl ro an priesthood eo, renaaj im̧we kōj im kwaļo̧k n̄an kōj wāween tōl ilo wāween ko rejim̧we.