Likao ro im Jiron̄ ro Rekabwilōn̄lōn̄ ilo Jeje ko Rekwojarjar
Rijeje eo, eo ej juon kar rūkaki in jemenere, ekar jokwe ilo Germany im kar mej ilo 2012.
Kwomaron̄ ekkatak kake im lo̧o̧r waanjon̄ok ko an elōn̄ jodikdik ro me bwebwenato ko aer kar jei ilo jeje ko rekwojarjar.
Kōmeļeļe jān Andrew Bosley
Irooj ej iakwe jodikdik ro an Kabun̄ in. Eļap An leke kom̧. Ilo aolep iien, Irooj ej im̧we likao ro im jiron̄ ro n̄an tōl im kōjeraam̧m̧an armej ro An. Ej aikuji kapeel, peran, im kajoor eo aer. Eaar āindein aolep iien im naaj wōnm̧aanļo̧k wōt.
Elōn̄ waanjon̄ak ko kōn rūm̧m̧an ded ro reperan im rekar bōk jikier ilo jeje ko rekwojarjar. Men̄e raar mour etto, kwomaron̄ ļo̧o̧r waanjon̄ok ko aer im keidi n̄an mour ko aer. Ewōr ippāer lim̧ajņoņo ko an baam̧le; raar mour ilubwiljin armej ro renana; raar jelm̧ae “apan̄ ko,” ak aer peran, pokake, im tōmak ilo Jisōs Kraist kar anjo̧ jān apan̄ ko aer—ejja men kein wōt remaron̄ bar jipan̄ eok.
Ebream
Kōttōbar eo an Ebream, peran, im kōņaan kwaļo̧k ainikien n̄an jum̧ae jerawiwi ko rekar kabwilōn̄lōn̄—eaar ļapļo̧k an kabwilōn̄lōn̄ ilo an jemān kabun̄ n̄an ekjab. Āinwōt juon likao, ekar lukkuun jutak pen kōn mour wānōk jon̄an raar tin katok kake. (Lale Ebream 1:2–7.)
Josep in Ijept
Eaar 17 an iiō ke ļōm̧aro jein raar wia kake n̄an kōm̧akoko, aaet kōn kōjeraam̧m̧an eo an Irooj, Josep eaar maron̄ kōm̧m̧ani men ko rem̧m̧an jān jekjek ko reppen. Eaar jab jowan, kōnke eaar jab ebweer. An leke ilo Irooj eaar jab jem̧ļo̧k. Bōklekōt eo an Josep eaar ļap ilo wāween eo ejejjet n̄an meļo̧kļo̧ki nana ko aer n̄an e. (Lale Jenesis 37; 45.)
Devid
Āinwōt juon rūm̧m̧an ded David eaar juon rilale sip, im eaar ire ippān juon beer im juon ļaion n̄an kōjparok sip ko an jemān. Bōklekōt eo an eaar jab itok kōnke ej juon rilale sip; eaar itok kōn an tōmak ilo Jemedwōj Ilan̄, āinwōt an waļo̧k ilo an kar ire ippān Golaiat. (Lale 1 Samuel 17:32–54.)
Esther
Eaar wōr an kōņaan n̄an likūt mour eo an make ilo uwōta n̄an lo̧mo̧o̧reņ armej ro an. Ejjab kōn aiboojoj eo an Esther ak kōn mour in jetōb eo an ekōm̧m̧an bwe en juon armej em̧m̧an. (Lale Esther 4–5.)
Daniel
Kōmeļeļe jān Andrew Bosley
Eaar pokake kien ko an Irooj kōn ājmour im kōjekdo̧o̧n ro jet me raar jab pokake. Eaar jar, men̄e ekar mo̧ jar n̄an Jemedwōj Ilan̄ ekkar n̄an kakien ko an kiin̄ eo. Kōn an mour wānōk im an bōk im̧we eo an Jetōb, Irooj eaar kōjeraam̧m̧an Daniel kōn juon menin letok eo n̄an ukōt ettōņak ko im visōn ko. Eaar bōk kajoor im māletlet jān Jemedwōj Ilan̄ n̄an leļo̧k im̧aan bwe ilo tōre ko rekauwōtata, emaron̄ kūr n̄an bōk kajoor ko an lan̄. (Lale Daniel 1; 6.)
Nipai
Nipai eaar juon waanjon̄ak eo em̧m̧an ke eaar ba, “Inaaj ilo̧k im kōm̧m̧ani men ko Irooj eaar kain̄” (1 Nipai 3:7). Eaar wōr ippān peran n̄an kōm̧m̧ane ta eo Irooj eaar kain̄. Eaar ke jokwe ilo juon em̧ eo ebolemen? Jaab, eaar jokwe ilo āne jem̧ade elōn̄ iiō ko. Eaar ke em̧m̧an aolep men n̄an e? Jaab, ļōm̧aro jein ekkā aer illu ippān im jet iien raar kajjieon̄ in m̧ane. Kōn aolepān men kein, eaar pokake kien ko an Irooj.
Ruo Taujin RiAmmon ro Em̧m̧an Dettāer
Likao rein raar rūttoļo̧k ippān ro jineer im jemāer retiljek, im tōmak ko aer ilo naan ko an ro jineer eaar kōjeraam̧m̧an er. Raar katak n̄an ron̄jake im pokake ilo jejjet, im ilo aer tariņae raar jab pere bwe Jemeer iLan̄ enaaj kōjparok er. (Lale Alma 56:45–48.)
Mormon
Ke eaar 15 an iiō, Irooj eaar loļo̧k e kōnke eaar ettā būruwōn, erreo, im kwojarjar, kōjekdoon nana ko an armej ro ipeļaakin. Barāinwōt ke eaar 15 an iiō, Mormon eaar erom̧ juon ritōl in tariņae. Tokālik kar leke e bwe en kōjparok jeje ko rekwojarjar. (Lale Mormon 1–2.)
Josep Smith
Ke eaar 14 an iiō, eaar pukōt jeje ko rekwojarjar im kar jar n̄an jeļā ewi wōt kabun̄ eo en kobaļo̧k ie. Irooj eaar kūr e n̄an kōjepļaak tok gospel eo im Kabun̄ eo an Jisōs Kraist. Josep eaar wūjļepļo̧k aolepān mour eo an n̄an kakūrm̧ool eddo eo an, men̄e elōn̄ apan̄ ko im men ko reppen n̄an e. Ke eaar 17 an iiō, enjeļ Moronai eaar loļo̧k e, eo eaar kwaļo̧k pilej ko̧o̧l ko. Men̄e eaar juon jodikdik, Josep Smith ekar juon rūkaki eo ekajoor im juon waanjon̄ak eo em̧m̧an n̄an ro ipeļaakin. (Lale Josep Smith—Bwebwenato 1.)
Raan eo Am̧
Raan ko rakabwilōn̄lōn̄ an likao ro im jiron̄ ro raar ke jako? Jaab! Enjeļ Moronai eaar jiron̄ Josep Smith bwe kanaan eo an Joel enaaj kūrm̧ool:
“N̄a [Irooj] naaj lutōk ļo̧k Aō jetōb ioon kanniōk otemjej, im ro nejemi m̧aan im kōrā renaaj rūkaanij, ļōļļap ro ami renaaj ettōņak tōņak ko; likao ro ami renaaj lo visōn ko.
“Im barāinwōt ioon ro ri karijer m̧aan im kōrā ilo raan ko Inaaj lutōkļo̧k Aō jetōb” (Joel 2:28–29; lale Josep Smith—Bwebwenato 1:41).