Kalikar
Baan̄ke ke ak MEĻAN?
Rijeje eo ej jokwe ilo Utah, USA.
Jet iien ejjeļo̧k bōd in kālet. Ewōr wōt juon kālet.
Kōmeļeļe jān Carolyn Vibbert
Jema ekar ļo̧kjenan kōn an loe bwe ine in baan̄ke ko ekar katōke iiō eo ļo̧k remaron̄ in juļ ilubwilijin meļan ko kar jōmar in. Meļan ko rekar em̧m̧an aer eddōk—barāinwōt baan̄ke ko. Kōn menin, ilo m̧ool, kar mālijjon̄e jema bwe en wōnm̧aanļo̧k wōt im katōk ine in baan̄ke ko. Aaet ekar jeļā bwe eļan̄n̄e enaaj kōm̧m̧ane, baan̄ke ko renaaj pinej an meļan ko eddōk.
Kōn menin, ekar wōr juon an kālet. Emaron̄ kar tūm̧i baan̄ke ko bwe meļan ko ren maron̄ eddōk ak emaron̄ kar kōtļo̧k an baan̄ke ko eddōk im lali aer kobajļo̧k meļan ko, ko remaron̄ jab ļap aer kalle ine ko jān doon. Baan̄ke ke ak Meļan? Kālet in ekar ikōtaan ruo men ko rem̧m̧an.
Ilo an kōļmenļo̧kjeņ kōn kālet kein ruo, jema ekar ļōmņak in tūm̧i ine in baan̄ke ko remourur. Ekar jab kōnke rekar rum̧wij aer juļ, ak ekar ļōmņak bwe eļapļo̧k an kōņaan ine in meļan ko jān an kōņaan baan̄ke ko.
En̄jake in ekar im̧we eō bwe in ļōmņak kōn kālet ko jej kōm̧m̧ani, eļaptata ilo jem̧jerā ko ad ippān ro jet. Mekarta ippān baam̧le eo ad, ro jerar, rijerbal ro ad, ak ippān ro jej jerāik ak m̧areik er, n̄e jej kōm̧m̧ani kālet ko ad ikōtaan ruo men, kalimjōk eo jim̧we eo ak kālet eo em̧m̧antata epen, eļaptata n̄e jekōņaan bwe jen jab kālet kālet ko rebōd. Mijak in kōm̧m̧ane kālet eo ebōd jet iien ej kakkure kōj, im bwe mijak emaron̄ dāpij kōj jān ad em̧m̧akūt m̧aanļo̧k ilo tōmak. Ak ilo m̧ool, jet iien ejjeļo̧k bōd in kalet. Ewōr wōt juon kālet. Ilo jekjek eo eaar waļo̧k n̄an jema, ekar kōm̧m̧ane kālet eo an jān ta eo eļapļo̧k an kaorōke ippān. Ekar dike an loe an baan̄ke ko mej, ak ekar jeļā bwe enaaj ajļo̧k kōn jorrāān eo enaaj waļo̧k n̄an meļan ko tokālik.
Ilo mour, jet kālet jej jelm̧ai ejjeļo̧k tokjāer, āinwōt, kain m̧ōn̄ā rot eo ij aikuj n̄an jibbon̄? Kōļar rot nuknuk eo ij aikuj kōņake rainin? N̄e jekar jelm̧ae juon jokālet ikōtaan ruo men ko rem̧m̧an, jemaron̄ kōm̧m̧ane āinwōt jema an kar kōm̧m̧ane im baj kajjitōk, “Ta eo eļapļo̧k aō kaorōk ippa?” Innām kōm̧m̧ane juon kālet im em̧m̧akūt m̧aanļo̧k ilo tōmak, lōke Irooj bwe Enaaj kajim̧we kōj eļan̄n̄e jenaaj bōd ilo jet wāween.
Bōtaab jet kālet eļap aer aorōk. Būreejtōn Thomas S. Monson juon iien ekar ba: “Jokālet ko rej itok imaan iien otemjej. N̄an kōm̧m̧ani ilo māletlet, peran ej menin aikuj—peran eo n̄an ba jaab, peran eo n̄an ba aaet. Jokālet ko kōm̧m̧ani rej kwaļo̧k jipadpad eo” (“R ko Jilu an Kālōt,” Liaona, Nob. 2010, 68). N̄e jej jelm̧ae jokālet kein, juon kajjitōk em̧m̧an ej, “Ta eo eaorōkļo̧k ippān Irooj?” Eļan̄n̄e jejeļā uwaak eo an kajjitōk in, men eo jej aikuji ej kajejjet aorōk ko ad Ippān innām ļoor kālet ko an. Enaaj aolep iien kālet eo ejim̧we.