Ikar Jab Jeļā Etke Ikar Pād Ijo

Amber Cheney, Alabama, USA

Ej kab mōj ļo̧k am̧ro jinō jar in jota. Kōm̧ro kar bakuj doon im ba, “Ij iakwe eok.” Innām ikar etal n̄an ruum̧ eo aō. Ke ikar leļo̧k peiū im jibwe ejjor in kōjam eo aō, juon en̄jake ekajoor ekar im̧we ļōmņak eo aō ke jinō enaaj mej raan eo juon.

Būruwō im kōļmenļo̧kjeņ eo aō rekar jum̧ae ļōmņak eo. Ejjeļo̧k juon men enaaj waļo̧k n̄an jinō. Men otemjej renaaj em̧m̧an ippān jinō.

Ke ij pād ilowaan ruum̧ eo aō, ikar bukwelōlō im ba n̄an Jemedwōj Ilan̄ en̄jake eo aō kōn jinō ke ej m̧ool. Ikar kajjitōk Ippān bwen jouj im jolok ļōmņak eo ippa, ak ekar jab maron̄ jako. Ikar ro̧o̧lļo̧k n̄an ruum̧ eo an jinō im jema im kajjitōk ippān jinō ne imaron̄ in kar atabakwoje bar juon katin im mejān maki m̧okta jān aō kiki. Kōm̧ kar bar ba n̄an doon, “Ij iakwe eok,” im ikar ro̧o̧l n̄an ruum̧ eo aō. Ekar bōk jidik iien bwe in mejki bon̄ōn eo.

Ke ikar jerkak jibbon̄ eo, ikar ikūm̧kūm̧. Ikar lukkuun kam̧m̧oolol, jinō ekar mour wōt, ekar m̧ōņōņō ilo an em̧m̧an an mour. Ak ilo ļōmņak eo aō, ikar en̄jake wōt ke ewōr juon men ejab jimwe. Ilo kweilo̧k in jitlo̧k im kwaļo̧k naan in kam̧ool eo, jinō ekar jutak im kwaļo̧k juon naan in kam̧ool ekajoor.

Ālkin kweilo̧k in kwojkwoj eo, ekar etal wōt im katakin kūlaaj in Būraimere eo an, im ikar etal wōt n̄an kūlaaj in Jabōt Jikuuļ eo. Ikar bar en̄jake im̧we in, bwe iien eo ij aikuj jutak im etal jān kūlaaj in Jabōt Jikuuļ eo. Ikar jab kōņaan ļōmņak kōn wāween eo, ak juon men ekar kajutak eō jān jea eo aō im ikar diwōj ļo̧k ilo kōjem̧ eo. Ilowaan wōt jejjo minit ko, ikar lo aō make jijet ilowaan kūlaaj in Būraimere eo an jinō im ron̄jake an katakin. Ikar jab jeļā etke ikar pād ijeņ, ak ikar jeļā bwe ikar pād ijo kōnke ikar aikuj in pād ie.

Tokālik, ālkin rālepān eo ilo m̧weo imōn ļeo jieū, jino ekar kalimjōktok meja bar juon alen ke ekar okjak im mej kōn juon nan̄inmej in pulmonary embolism. Kōn un ko An im ilo An tiriam̧o̧, Jemedwōj Ilan̄ ekar jilkintok Jetōb Kwojarjar n̄an kōpooj eō. Im̧we kein rekar letok n̄an n̄a bar jet iien ko aō ippān jinō me imaron̄ kar jab m̧ōņōņō kaki eļan̄n̄e in kar kaarmejete ainikien eo edik, im emera.

Iakwe eo an Jemedwōj Ilan̄ ekar jab lukkuun kam̧ool n̄an n̄a m̧ae iien m̧akūtkūt ko rekar bōk jikier ilo jako eo an jinō. Ewi jon̄an ad jeraam̧m̧an bwe emaron̄ wōr juon Jemād ilo Lan̄ eo eļap An iakwe im Ej letok menin letok eo ejenolo̧k an Jetōb Kwojarjar.