Katakin Jodikdik ro Wāween Tōl ilo Wāween eo an Rilo̧mo̧o̧r eo
Jān Carol F. McConkie
Rikakpilōklōk eo Kein Kajuon ilo Būreejtōnji eo Eutiej an Doulul eo an Jiron̄ ro
Jodikdik ro ad rej jab baj ritōl ro ilju im jekļaj. Rej ritōl ro rainin. Jemaron̄ jipan̄ er tōl āinwōt Rilo̧mo̧o̧r eo.
N̄an ro jinen im jemān im ritōl ro an jodikdik ro, Elder David A. Bednar jen Doulul eo an Jon̄oulruo Rijilōk ro ekar kōnono kōn leļo̧k jokin wōt juon eo jej aikuj in pukōte: “Karuwaineneik jodikdik ro n̄an jerbal. Kwoj aikuj in pād ijeņ, ak kwoj aikuj jab kobaj iaļ eo. Kwoj aikuj in leļo̧k tōl ilo am̧ jab bōk eddo eo.”1
Ro jinen im jemān im ritōl ro remaron̄ in jipan̄ likao ro im jiron̄ ro n̄an ekkatak kōn pedped in katak ko rem̧m̧an im renaaj kōpooj er im tōl ilo jim̧we im n̄an kalōk aelōn̄ in kiin̄ eo an Anij ioon laļ in.
Ke ekar 14 aō iiō, ikar ioon jet jiron̄ ro rekar jet ritōl ro rewājabdik. Ilo iien eo, baam̧le eo aō ekar em̧m̧akūt n̄an United States im rekar erom membōr ro an juon ward ekāāl. Ij jab keememej wōn eo ekar jerbal ilo kūlaaj būreejtōnji eo an Mia Maid, ak ilukkuun keememej bwe jiron̄ ro rekar lukkuun jouj n̄an n̄a. Rekar m̧ool ilo aer kautiej juon leddik emijak im eadik āinwōt juon m̧ōttāer jān etto im rekar m̧ōttāiki im karuwaineneki. Itok jān Delaware, juon jikin me ikar make wōt juon leddik in Mormon ilo junior high jikuuļ eo im leddik eo juon ej jokwe juon awa ettoļo̧k jān m̧weo imō, ikar ļōmņak “Menin ej bōlen einļo̧k wōt lan̄!”
Kein kajuon ilo mour eo aō, ewōr juon doulul in ro jera ro rej mour kōn jon̄ak ko ilo er N̄an Kōkajoorļo̧k Jodikdik ro, ro rekar kūrļo̧k eō n̄an bōk koņaaō ilo m̧akūtkūt ko, im kar kwaļo̧k aer naan in kam̧ool kōn gospel eo. Waanjon̄ak ko aer kōn jouj im iakwe rekar kōm̧m̧ane ijo eļap n̄an dāpij wōt eō ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata ilo tōre eo jān an juon kōnono ak katak maron̄ kar kōm̧m̧an. Ilo aer iakwe im meram eo aer āinwōt Kraist, er eo rej boktok naan in gospel eo an Kraist, im rej tōl n̄an wōrwōr eo An.
Ta eo ekar kōm̧m̧an bwe rein jera ren ritōl ro reļļap?
Juon mijenede edik ekar kōmeļeļeik er kōn naan in tōl. Ekar ba: “Jej aikuj in pād ilo jikin eo ejejjet ilo iien eo ejejjet n̄an kōm̧m̧ane anilaan Irooj im jipan̄ armej ro rej aikuji jipan̄ eo am. En̄in ej ta eo ej kōm̧m̧an bwe kōm̧in erom juon ritōl.”2 Jān mālim eo kōn wōn er im Meram eo an Kraist ej rom̧aak ilo er, likao ro retiljek im jiron̄ ro ilo aolepān Kabun̄ ewōr ippāer jon̄ak eo n̄an toļ ilo wāween eo an Irooj im “jipan̄ armej ro jet bwe ren erom rikaļoor ro an … Jisōs Kraist.”3
Ilo am tōl, jineete, im etetal ikōjaan likao ro am im jiron̄ ro. Ak ej kūlaaj eo im būreejtōnji ko an doulul ko rej bōk eddo n̄an tōl im jineete jerbal eo an kūlaaj ko im doulul ko, ekoba kālōt katak ko an Jabōt im karōk m̧akūkut ko an raan ko ilo wiik. Ritōl ro an kūlaaj im doulul ko rej kūr im kōjenolo̧k er ium̧win tōl an ro rej kabwijer kii ko an priesthood eo; aaet ewōr aer mālim n̄an tōl im kōkajoorļo̧k jodikdik ro. Rej ļoor waanjon̄ak eo an Rilo̧mo̧o̧r eo im ekkatak n̄an jerbal āinwōt Ekar jerbal im n̄an kwaļo̧k āinwōt Ekar kōm̧m̧ane.
Iien ko Rem̧m̧an n̄an an Jodikdik ro Tōl
Tōl ej ijjino ilo m̧weo. “Kōm̧m̧ane eddo eo n̄an Anij āinwōt ro jinen im jemān im ritōl ro ej ijjino jān waanjon̄ak—aolep iien im tiljek mour kōn pedped in katak ko ilo m̧weo,” kar katakin Elder Robert D. Hales jen Doulul eo an Jon̄oulruo Rijilōk ro. “Menin ebōk kijejeto iien otemjej im tiljek.”4 Ro jinen im jemān rej katakin katak ko an Kraist. Rej katakin jodikdik ro kōm̧m̧an im kōttōbrak kōttōbar ko. Personal Progress eo im Aō Jerbal n̄an Anij rej jipan̄ jodikdik kōkajoorļo̧k naan in kam̧ool ko aer kōn Jisōs Kraist, m̧aanjabpopo n̄an kōm̧m̧an im kōjparok bujen ko rekwojarjar, im kakūrm̧ool eddo ko aer rekwojarjar im eddo ko ilo baam̧le eo, m̧weo, im Kabun̄ eo.
Ilo mōnjar eo, ritōl ro an Priesthood eo an Aron im Doulul eo an Jiron̄ ro remaron̄ jipan̄ jodikdik ro jerbal ilo doulul im kūlaaj būreejtōnji ko meļeļe eddo ko aer rekwojarjar im kōļapļo̧k kūr ko aer n̄an naajdik im kōkajoorļo̧k aolep doulul ko jet im membōr an kūlaaj ko.
Āinwōt ritōl ro rerūtto, jej kōpooj jodikdik ro n̄an kōjjekiiki doulul eo im kweilo̧k ko an kūlaaj eo im m̧akūtkūt in Kōkajoorļo̧k Jodikdik ro. Jej kweilo̧k ippān jodikdik ro ilo kweilo̧k ko an būreejtōnji eo ilo aer ejaake wāween ko n̄an jipan̄ ro rej en̄taan, n̄an kakobaik aolep jodikdik ro ilo katak ko an Jabōt, im n̄an karōk m̧akūkūt ko, jerbal in jipan̄ ko, kāām ko, im kweilo̧k ko reļļap an jodikdik.
Jej rōjan̄ būreejtōnji ko an jodikdik n̄an jipan̄ aolep doulul im membōr ro an kūlaaj ko im raar bōk koņaer ilo aolep wāween ko rejelet jerbal in lo̧mo̧o̧r eo, ekoba jerbal in mijenede n̄an membōr, jerbal in dāpij rioktak ro, jerbal in kōro̧o̧ltok membōr ro rejāniknik, tample im jerbal in menmenbwij an baam̧le, katak kon gospel eo.5 Būreejtōnji ko an jodikdik ro rej jipan̄ aolep likao im jiron̄ ro ekkatak lan̄lōn̄ eo im kōjeraam̧m̧an eo ilo jerbal ilo etan Rilo̧mo̧o̧r eo im naajdik sip ko An.
Jerbal eo an ritōl eo ej jab kōn juon media n̄an leto letak meļeļe ko ak būkļo̧k meļeļe ko. Jerbal eo an ritōl ro ej n̄an jipan̄ likao ro im jiron̄ ro ekkatak im kōjerbal pedped in katak ko me renaaj jipan̄ er tōl ilo wāween eo an Rilo̧mo̧o̧r eo. Laajrak in ej kwaļo̧k emān iaan pedped in katak ko.6
Kōppopo ilo Jetōb
Jipan̄ jodikdik ro meļeļe kajoor eo aer make ilo kōppopo ilo jetōb. Katakin er kōjerbal tōmak ilo bujen ko rej kōm̧m̧ani ilo kain̄i in kwojkwoj eo. Aer m̧ōņōņō n̄an bōk ioer etan Kraist, n̄an keememej E, im n̄an kōjparok kien ko An ej kakōrbab er bwe ren aolep iien bōk jem̧jerā eo an Jetōb Kwojarjar. Er rej jab make iaer ilo jerbal in jipan̄ eo aer n̄e rej maron̄ in bōk, kile, im jerbal ekkar n̄an im̧we ko an Jetōb Kwojarjar.
Er rej kōppopo ilo jetōb jān aer pukōt tōl jān jar ko rej jab jokwōd im etali jeje ko rekwojarjar n̄an uwaak ko. Er rej kajjieon̄ kōjparok kien ko bwe Jetōb Kwojarjar eo en kōnono n̄an er ilo būruwāer im ilo ļōmņak ko aer bwe ren maron̄ en̄jake im jeļā wōn ro rej aikuj jipan̄ eo aer im ta eo remaron̄ in kōm̧m̧ane. Er rej en̄jake iakwe eo erreo an Kraist n̄an kajjojo membōr in kūlaaj eo ak doulul eo.
Kōppopo ilo Jetōb ej leļo̧k n̄an jodikdik lōke eo me er rej rikarejar ro an Irooj im bwe er rej pād ilo ijjilōk eo An (lale K&B 64:29).
Bōk Kuņaer ilo Koonjeļ ko
Katakin jodikdik ro pedped in kōlaajrak eo im kajoor in revelesōn an ko̧o̧njeļ ko ilo aer bōk koņaer ilo wāween jerbal in ekwojarjar jān Kabun̄ eo an Irooj eo ej leļo̧k kien im kajjojo armej im baam̧le ko rej jeraam̧m̧an.7 Kamitii in jodikdik eo an Bisoprik im doulul im kweilo̧k ko an kūlaaj būreejtōnji ko rej ko̧o̧njeļ ijo jodikdik ro rej ekkatak eddo ko aer im bōk eddo im bōk jerbal ko n̄an kōm̧m̧ani jerbal ko n̄an ro jet.
Membōr in Ko̧o̧njeļ ko:
-
Rej ippān doon im ļoor ritōl ro an priesthood eo, ro rej kabwijer kii ko an priesthood.
-
Kwaļo̧k ļōmņak ko aer im meļeļe ko ilo jitbōn ewāppen, kwojarjar, wānōk, kijenmej, tōmak, iakwe em̧ool, im jouj n̄an doon.
-
Jerbal ippān doon, āinwōt ekar tōl jān Jetōb Kwojarjar eo, n̄an karōk ta eo renaaj kōm̧m̧ane n̄an jipan̄ ro rej pād ilo aikuj.
Kwaļo̧k n̄an Ro Jet
Jodikdik ro rej tōl ilo wāween eo an Rilo̧mo̧o̧r eo n̄e rej kwaļo̧k ilo iakwe im jouj. Josep Smith ekar katakin: “Ejjeļo̧k juon men eļapļo̧k an naaj jipan̄ tōl armej ro n̄an meļo̧kļo̧k jerawiwi eo aer ijjeļo̧kin ad jibwe peir, im lale er ilo iakwe. N̄e armej ro rej kwaļo̧k diktata jouj im iakwe n̄an eō, O ewi jon̄an kajoor in eo ej pād ilo ļōmņak eo aō.”8
Rilo̧mo̧o̧r eo ekar katakin aiboojoj im aorōk eo an aolep jetōb (lale K&B 18:10–15). Jipan̄ jodikdik ro ad meļeļe m̧ool eo eaiboojoj bwe Jisōs Kraist ekar likūt mour eo An im kar kōppeļļo̧k iaļ eo bwe aolep ren maron̄ itok n̄an E. Ilo kam̧m̧oolol kōn ta eo Ekar kōm̧m̧ane, rikarejar ro rem̧ool an Irooj rej pukōt ļo̧k im jerbal ilo iakwe im jouj n̄an aolep likao im aolep jiron̄ ro, kōnke Rilo̧mo̧o̧r eo ekar wūjlepļo̧k men otemjej.
Katakin kōn Gospel eo an Jisōs Kraist
Jipan̄ likao ro im jiron̄ ro kile iien ko rem̧m̧an n̄an katakin gospel eo im meļeļe bwe men eo eaorōktata ilo aer katakin enaaj waanjon̄ak eo aer. Ilo an jodikdik ro mour ekkar n̄an naan ko an rikanaan ro im kōjparok jon̄ak ko ilo N̄an Kōkajoorļo̧k Jodikdik ro, rej tōl ilo wāween eo an Irooj. Jān m̧ool in naan ko aer im m̧akūtkūt ko, er rej kwaļo̧k ta meļeļein n̄an erom juon rikaļoor em̧ool an Jisōs Kraist. Er rej jutak āinwōt rikam̧ool ro An kōn ejjeļo̧k moņ. Innām, n̄e rej kwaļo̧k naan in kam̧ool, rej jipan̄ katakin juon katak an Jabōt, ak kwaļo̧k m̧ool ko an gospel eo ippān ro m̧ōttāer, er renaaj obrak kōn Jetōb eo im naan ko aer renaaj wōr aer kajoor n̄an ukōt armej ro.
Tōl ilo Wāween eo an Rilo̧mo̧o̧r eo
N̄an tōl ilo wāween eo an Rilo̧mo̧o̧r eo ej juon jeraam̧m̧an ekwojarjar eo enaaj kōm̧m̧an bwe jodikdik ro ren leļo̧k ijo em̧m̧antata ilo aer jerbal n̄an Irooj ilo m̧weo, ilo Kabun̄ eo, im ilo jukjukinpād eo. Likao ro im jiron̄ ro rej tōl ilo wāween eo an Rilo̧mo̧o̧r eo rej erom ennaan eo an gospel eo an Kraist, im uwaak n̄an jar an juon armej, enjeļ ro rej kwaļo̧k n̄an ro rej pād ilo aikuj, im meram eo an Kraist n̄an laļ in.