Hoê faaotiraa rê
E taime tano teie no’na no te ha’uti i roto i te pupu upooti’a—nahea e ti’a ai ia’na ia pato’i ?
« E haamana’o i te mahana Sabati ia haamo’ahia ïa » (Mosia 13:16).
Ua horo atura o Miranda na te uputa no mua, ma te mauruuru i te mea e, e mea haumarû a’e to’na fare i te anuvera ve’ave’a no te pu’e tau mahanahana i rapae. Ua rari ho’i oia i te hou no to’na ha’utiraa i te ha’utiraa hopea o te tu’eraa popo o te reira pu’e tau, e te oto atoa i te mea e, ua pau te pupu Teal Turbos. Faahou â.
Ua tomo mai o mama i roto i te piha e te hoê mohina pape e te hoê pute e mau tapû anani to roto no ô mai i te ha’utiraa popo. « Ua hauti maitai roa oe. E ere te ohipa ha’uti te tia’iraa i te tapa’o ».
Ua ha’uti maitai o Miranda—e rave rahi titoraa ta’na i tape’a e ua tu’e puai a’e i tei matarohia. Tera râ, te rahiraa o te tahi atu mau tamahine i roto i ta’na pupu aitâ i ha’uti a’enei i te tu’e popo, e ua riro teie mahana ei haapapûraa : ua pau ratou i te mau ha’utiraa atoa o teie pu’e tau.
« Ua hinaaro vau ia ha’uti i roto i te hoê pupu o tei upooti’a hoê a’e taime, te taa ra oe ? » Ua tahe maira te tahi roimata iti i te hiti mata o Miranda e ua faatopa’tura ia’na i ni’a i to’na ro’i. A tapiri ai oia i tona na mata, ua ta’i maira te niuniu.
Ua rave maira o mama i te niuniu, e tau taime rii i muri iho, na ô maira, « na oe ».
« Ia ora na e Miranda. O Tom teie, te taata faaineine no te mau Chili Kickers. Ua mata’ita’i au i ta oe ha’utiraa i teie mahana. E mea maitai roa ta oe hautiraa ».
Ua haamata a’era te mafatu o Miranda i te tupa’ipa’i vitiviti a’e. Te Chili Kickers te pupu tu’e popo maitai a’e i roto i te taatiraa !
« E haere ta matou pupu i roto i te ha’utiraa aito retioni i te ava’e i muri nei. Mea maitai roa ta oe ha’utiraa i teie mahana, no reira, te hinaaro nei au ia haere mai oe na muri iho ia matou ei mono tia’i tapa’o ».
I taua taime ra, ua fatata roa te mafatu o Miranda i te pee mai i rapae i to’na ouma. Teie te taime no’na ia ha’uti i roto i te hoê pupu upooti’a !
« E oaoa roa vau ia haere mai ! » Te reo ïa o Miranda. Ua paraparau rii raua no te tahi mau mea hou a tupohe ai i te niuniu, e ua horo atura i roto i te tahi piha no te faaite ia mama. Ua haamata ihora raua i te tapa’o i te mau mahana faaineineraa e te ha’utiraa i ni’a i te tarena.
I reira iho, ua faaea o Mama i te papa’i, ua vai noa ta’na peni tara i ni’a a’e i te hoê vahi o te tarena.
« ’Ai. Miranda, e Sabati te mau mahana ha’utiraa. A hi’o na ». Ua faatoro oia i ni’a i te tarena ha’utiraa e ua fariu maira i ni’a ia Miranda ma te mata tu’atu’a. « I to oe mana’o, e aha ta taua e rave ? »
Ua oto roa o Miranda, ua iiti oia i to’na utu a feruri ai i te mau rave’a. E faati’a paha o Mama ia’na ia ha’uti mai te mea e, e ani oia, tera râ, ia feruri oia e ha’uti i te Sabati—no ni’a ihoa râ i te ma’iriraa i te pureraa—ua taviriviri roa ïa to’na opu. Ua ite oia e, te Sabati, e mahana haereraa ïa i te pureraa e te haamoriraa i te Metua i te ao ra, e eita roa’tu e ti’a ia’na ia rave i te reira mau ohipa a ha’uti ai i te tu’eraa popo.
Ua parau a’era o Miranda, « Ia’u i mana’o, e ti’a paha ia’u ia niuniu faahou ia’na no te parau e, eita ta’u e nehenehe e ha’uti ». Ua imi oia i te mau rave’a atoa eiaha ia ta’i. Noa’tu e, ua ite oia e, o te reira mau te ma’itiraa ti’a, e mea fifi mau ia faaru’e i te hoê mea hinaaro-roa-hia e a’na.
« E ua ite oe e aha to’u mana’o ? » Te parau ïa a Mama ma te tauahi ia’na. « Te mana’o nei au e, e tamarii faahiahia roa oe ».
I taua Sabati ra, a parahi ai o Miranda i roto i te Paraimere, ua feruri oia i te faaotiraa maitai ta’na i rave. Ua maere te taata faaineine i te taime a niuniu atu ai o Miranda ma te parau e, eita ta’na e nehenehe e tu’e i te popo i te Sabati. Ua tamata oia ia faataui i to’na mana’o, tera râ, ua tape’a noa oia i ta’na faaotiraa. I teie nei, a faaroo ai oia i te mau himene e te mau haapiiraa i te Paraimere, ua ataata o Miranda. Ua parau mai te mana’o hau i roto i to’na aau e, tei te vahi ti’a oia. Inaha, e faaotiraa re ta’na i rave.
Faahoho’araa na Brad Teare