Imi i te tauturu
Te ora nei te taata papaʻi i Utaha, HAM.
Ua ma’iri te tu’iraa pô, tera râ, ua ite o Tate e, ua tae i te taime no te paraparau.
« E te Metua i te ao ra, te pure nei au i teie nei, a arata’i mai ia’u e a tia’i mai ia’u i te mau mahana atoa » (Children’s Songbook, 19).
Ua tarava noa o Tate i roto i te poiri, ma te amoamo noa te mata no te roimata. Ua pure oia no te ani i te tauturu, tera râ, mai te huru ra e, e anuanua ereere rahi teie e vai noa nei i ni’a a’e ia’na, e te opani ra i te Varua.
Ua mana’ona’o oia e, « Ahiri e, aita vau i haamo’e i taua hoho’a ra i roto i te afata teata ? »
Tau mahana na mua’tu, ua oti ’oi’oi ta’na mau ohipa no te haapiiraa e ua pata i te afata teata. Aita râ oia i mana’o e ite oia i te hoê mea mai te reira i roto i te afata teata. Ua pe’ape’a roa o Tate, mo’ehia a’era ia’na i te tupohe ’oi’oi i te afata teata mai tei titauhia ia’na.
E mea hape noa. Aita oia i opua e hi’o i te hoê hoho’a mai te reira te huru, i teie nei râ, eita te reira e mo’e-faahou-hia ia’na. I te tahi mau taime, e puta mai te reira i roto i to’na upoo i ropu i te haapiiraa, i ni’a i te amuraa maa i te ahiahi—e i te fare pure roa’toa. I te mau taime mai te reira te huru, ua oaoa oia e, aita e ti’a ia mama e ia papa ia tai’o i to’na mana’o. Ua haapii na metua o Tate ia’na eiaha e hi’o i te mau hoho’a o te taata aita e ahu. Ua ite oia e, ua hinaaro atoa raua ia haapae oia i te mau hoho’a teimaha i roto i te afata teata, te teata e te mau hoho’a ha’uti video.
« Ua ite au i teie nei e no te aha », ta Tate ïa parau i ni’a ia’na iho.
Ua pou a’era o Tate i raro i te ro’i e ua tuturi faahou. Eaha ta’na e nehenehe e rave ?
Ua muhumuhu a’era o Tate, « E te Metua i te ao ra », « A tauturu mai oe ia’u ia faaea i te feruri i te mea ta’u i ite ». Ua tamaro a’era oia i te roimata e haamata ra i tahe i roto i to’na mata e ua faaroo a’era. Ua tupa’ipa’i vitiviti to’na mafatu. Ua feruri oia e, te Varua Maitai paha teie e muhumuhu mai nei ia’na, e ere râ te reira te pahonoraa ta’na i hinaaro.
Ua hinaaro oia e faaite i to’na na metua.
« No te aha ? » Ua maere o Tate. E au oia mai te hoê aiu e haere i roto i te piha o to’na na metua i te maororaa pô. E no te faaite ia raua ? Ua huru haamâ oia e ua ma’i-faahou-hia oia.
I muri iho, ua puta maira te hoê mana’o maramarama i roto i to’na feruriraa : Ua hinaaro te Metua i te ao ia oaoa oia. Ua hinaaro te Metua i te ao ia ite faahou oia i te Varua, ia feruri i te mau mea maitai, e ia riro ei taata aau parau ti’a i ni’a i to’na utuafare. Ua hinaaro taa’e Oia ia riro mai o Tate ei taea’e ti’amâ no te Autahu’araa a Aarona ia tae’ahia to’na matahiti i te 12 tau ava’e i mua nei. Ua ite a’era o Tate e, mai te mea e, e tapea noa oia i te mea ta’na i ite, e e huna noa, e vai oaoa ore noa oia no te reira.
Ua ite a’era o Tate e, e ti’a ia’na ia farii i te tauturu—e no parau noa maira te Varua Maitai e, i hea e itehia ai te reira.
Ua hi’o atura o Tate i te hora i piha’i iho i to’na ro’i. Faatata hora 1:00 i te po’ipo’i. Ua ti’a maira oia i ni’a e ua haere atura na roto i te aroa poiri e tae atu ai i te piha o to’na na metua. Ma te horomii vitiviti noa i to’na huare, ua tupa’i atura oia i ni’a i to raua opani.
« Mama ? Papa ? »
Pahono mai nei te mama ma te reo vare’a taoto, « Tate, o oe tera ? »
« Te vaira te fifi ? » Te uiraa ïa a Papa.
Na ô atura o Tate « E », « E nehenehe tatou e paraparau rii ? E penei a’e, e nehenehe anei ta’u e farii i te hoê haamaitairaa ? »
Ua tuama a’era o papa i to’na mori e ua titau maira ia Tate ia tomo mai. No te taime matamua i muri a’e e rave rahi mahana, ua ite a’era o Tate i te mahanahana, te tia’iraa e te maramarama.
Faahoho’araa na Mark Robison