E aha ho’i te faufaa o te reira ?

Kelly Laing, Washington, Marite

A tere ai au na ni’a i te USS West Virginia, ua tae maira te hoê aniraa no te hoê ofitie ua ite i te reo potiti no te haere i ni’a i te pahi beresilia no te hoê aitauiraa e toru hepetoma te maoro. O vau ana’e te taata i roto i te nuu na raro i te moana o tei ite i te parau potiti.

To’u mana’o matamua, maori râ eiaha e haere. No hope noa mai nei hoê tere to’u e toru ava’e te maoro, e te tia’i ra vau i te taime e haere ai au e hi’o i to’u utuafare, tera râ, aita e rave’a e matara ai taua aitauiraa mai roto i to’u mana’o. Ua fariu atura vau i ni’a i te Metua i te Ao ra na roto i te pure, ua farii au i te hoê pahonoraa puai e, e ti’a ia’u ia haere, e ia farii i te faaueraa.

Aita i ohie te mau faaauraa. I te hoê taime, ua feruri au e faaru’e. Ua feruri au, « E aha ho’i te faufaa o te reira » ? Tera râ, ua faaûru maira te Varua Maitai ia’u ia haere i mua.

Faahoho’araa na Allen Garns

I te pae hopea, i muri a’e i te mau faataereraa e rave rahi, ua tae atura vau i ni’a i te hoê pahi beresilia. I to’u arata’iraahia i te piha tamaaraa na te mau ofitie, te tama’i ra te tapena no te pahi i te hoê ofitie apî ma te faatoro i te rima i ni’a ia’na. Ua ite maira te tapena ia’u, ua faaea a’era, e ua parau maira na roto i te hoê reo Peretane huru ê, « A, ua tae mai to’u hoa marite. Ia ora na. E nehenehe anei au e horo’a’tu i te tahi inu na oe ? »

Pahono atura vau na roto i te reo potiti e, e hinaaro vau i te hoê inu marû tu’iroo no Beresilia aitâ vau i tamata faahou atura mai te tau o ta’u misioni. Ua parau maira oia ia’u e, ua rau te mau ava i ni’a i te pahi, tera râ ua parau atura vau e, aita vau e inu i te ava.

I muri mai, ua patotohia maira i to’u piha. I to’u iritiraa i te opani, te ti’a noa mai nei tera ofitie apî no te piha tamaaraa.

Na ô maira oia e, « E marite oe ». « Aita oe e inu i te ava. E parau oe i te reo potiti. E ere anei e, e Momoni oe ? »

Pahono atura vau e, « E, oia mau ».

Ua tauahi maira oia ia’u e ua ta’i a’era.

Teie ofitie, te Tapa’o piti Mendes, e melo faafariu-apî-hia mai oia, e aita i maoro a’enei to’na haafeti’araahia i roto i te Nuu Haapiiraa Ihitai no Beresilia. I ni’a i te pahi, ua ite oioi a’era oia e, ua hinaaro te tapena ia amui atu oia i roto i te oraraa arearea o te mau ofitie i te taime a tape’a ai ratou i roto i te hoê oire. Tera râ, ia tapae te pahi i te hoê vahi, i te mau taime atoa, e ani te Tapa’o piti Mendes ia haapa’o oia i te mau ohipa i ni’a i te pahi e aita oia e faaô ia’na i roto i te mau ohipa i rapae i te pahi. Ua rava’i roa te tapena i te reira huru. I to’u tomoraa’tu i roto i te piha tamaaraa, te tama’i ra oia i te Tapa’o piti Mendes no te oreraa e amui atu i roto.

Ua faaue oia i te tapa’o piti e, « E haere oe na muri iho i te mau ofitie ia tape’a faahou te pahi ». « E faaite oe i te ofitie marite e mea nahea ia arearea. O te reira ta’na e titau ia tatou ».

E rave rahi ava’e to te Tapa’o piti Mendes pure-noa-raa ia ite e ia farii te tapena i ta’na mau faatureraa. Na roto i to’u taeraa mai, ua riro te aparauraa i te evanelia ei tumu rahi no te mau tau’araa parau i roto i te piha tamaaraa. Ua paraparau maua e te tahi atu mau ofitie no ni’a ia Iosepha Semita, te Faaho’i-faahou-raa mai, te Parau Paari e te ture no te viivii ore. Aita i maoro ua taui te mau mana’o no ni’a i te Tapa’o piti Mendes. Ua tatara te mau ofitie i te mau hoho’a faufau, e ia tapae matou i te hoê oire, e haere paatoa matou e tamaa ma te oaoa i roto i te hoê fare tamaaraa, eiaha râ i roto i te hoê fare arearearaa.

I te pae hopea o ta’u na hepetoma i ni’a i te pahi, e i muri a’e e rave rahi aparauraa i te tapena e i te mau ofitie no ni’a i to maua mau ti’aturiraa, ua tamarû te aau o te mau taata. « I teie nei, te taa nei au », te parau ïa a te tapena i ni’a i te Lt Mendes hou a reva’tu ai au, ma te parau atoa e, eita oia e ani faahou ia’na ia ofati i ta’na mau ture.

E ore roa e mo’ehia ia’u teie ohipa tei tupu. Ua haapii mai maua te Tapa’o piti Mendes e, ua ite to tatou Metua i te ao ra ia tatou tata’ihoê, ua here ia tatou, e te mana’ona’o nei oia i to tatou iho oraraa.