Aita vau i ite e, no te aha tei reira vau
Amber Cheney, Alabama, Marite
Faahoho’araa na Kathleen Petersen
No oti noa maira to maua pure no te pô maua o mama. Ua apa a’era maua te tahi i te tahi ma te parau e, « ua here au ia oe ». I muri iho, ua haere atu vau i roto i to’u piha. A tape’a ai au i te tape’araa o to’u opani, ua tupu maira te hoê mana’o puai i roto i to’u feruriraa e, ananahi, e pohe to’u mama.
Ua tamata to’u roro e to’u mafatu i te aro i te reira mana’o. Eita e nehenehe te hoê ohipa e tupu i ni’a i to’u mama. E maitai te mau mea atoa no’na.
Ia tae a’era vau i roto i to’u piha, ua tuturi au i raro no te pure, e ua parau vau i te Metua i te ao ra e, e ere paha ïa teie mana’o no ni’a i to’u mama i te mea e tupu. Ua ani au Ia’na ia iriti i teie mana’o i rapae, tera râ, aita te reira mana’o i ore. Ua ho’i faahou vau i roto i te piha o to’u na metua e ua parau atu vau i to’u mama e, ua hinaaro vau hoê faahou a’e tauahi e hoê a’e apa hou a haere ai au e taoto. Ua parau faahou a’era maua e, « Ua here au ia oe », e ua ho’i au i roto i to’u piha. E taime roa tei pau a topa ai to’u taoto i taua pô ra.
I to’u ti’araa mai i te po’ipo’i a’e, e mea pe’ape’a rii au. Aua’e râ, te vai ra to’u mama, to’na oaoa e te maitai. Tera râ, i roto i to’u feruriraa, te vai noa ra taua mana’o puai ra e, te vai ra hoê fifi. I roto i te pureraa haapaeraa maa e te iritiraa mana’o i taua mahana ra, ua ti’a o mama i ni’a e ua faaite i te hoê iteraa papû nehenehe.
I muri a’e i te pureraa oro’a ua haere oia e haapii i ta’na piha haapiiraa Paraimere, e ua haere au i te Haapiiraa Sabati. Ua farii faahou vau i te tahi mana’o papû maitai, i teie taime, titauhia ia’u ia ti’a i ni’a e ia faaru’e i te Haapiiraa Sabati. Aita vau i hinaaro ia ite mai te taata ia’u, tera râ, te vai ra hoê mea e huti ra ia’u i rapae i to’u parahiraa e ia haere i rapae i te uputa. Tau minuti i muri iho, te parahi ra vau i roto i te piha haapiiraa Paraimere a to’u mama ma te faaroo i ta’na haapiiraa. Aita vau i ite e, no te aha tei reira vau, ua ite râ vau e, tei reira te vahi i titauhia ia’u ia parahi.
I muri a’e i taua avatea ra i te fare o to’u taea’e, ua hi’o tutonu maira to’u mama i roto i to’u na mata no te taime hopea, e i reira, topa a’e nei i raro e pohe atura, no te hoê fifi i roto i te mahaha. No Ta’na mau tumu e no To’na aroha, ua tono mai te Metua i te ao ra i te Varua Maitai no te faaineine ia’u. Ua horo’a mai taua muhumuhuraa ra i te tahi atu taime no’u i piha’i iho i to’u mama o te ore roa e roaa ia’u ahiri aita vau i tau’a i te reo iti ha’iha’i.
Aita vau i ite papû roa i te here o to’u Metua i te ao ra e tae roa’tu i te taime a tupu ai taua mau ohipa ra i te taime a pohe ai to’u mama. Auê ïa tatou i te haamaitaihia no te hoê Metua i te ao ra o tei here roa ia tatou e ua horo’a mai ia tatou nei te horo’a taa ê o te Varua Maitai.