Te feia apî tamaroa e tamahine maere i roto i te mau papa’iraa mo’a
E orometua haapii evanelia te taata papa’i, ua ora i te fenua Helemani e ua pohe i te matahiti 2012.
E nehenehe ta outou e haapii mai e e pee i te mau hi’oraa o te feia apî parau ti’a e rave rahi tei faahereherehia te aamu i roto i te mau papa’iraa mo’a.
Faahoho’araa na Andrew Bosley
Ua here te Fatu i te feia apî o te Ekalesia. E ti’aturi rahi to’na ia outou. I te mau anotau atoa, ua faaûru te Fatu i te feia apî tamaroa e te feia apî tamahine itoito no te arata’i e no te haamaitai i To’na mau taata. Te hinaaro nei Oia i to ratou maramarama, te itoito e te mana’o apî. Mai te reira noa i te mau taime atoa i ma’iri ra ; mai te reira noa’toa a muri a’e.
Mai te taura auro ra te mau hi’oraa e rave rahi o te mau aito feia apî i te tereraa na roto i te mau papa’iraa mo’a. Noa’tu era ê te tau to ratou oraraa, e nehenehe ta outou e pee i to ratou mau hi’oraa e ia faatu’ati i ni’a i to ratou oraraa. Ua fifi to ratou mau utuafare ; ua ora ratou i rotopu i te mau taata parau ti’a ore ; ua farerei ratou i te mau « Toria », tera râ, na to ratou itoito, te haapa’o e te faaroo ia Iesu Mesia i faaupooti’a ia ratou i roto i to ratou mau tamataraa—mai ta te reira mau huru e na reira atoa no outou.
Aberahama
E mea maere te hinaaro tuutuu ore o Aberahama, te itoito e te hinaaro ia faateitei i to’na reo no te pato’i i te ino—hau atu i te maere ia ite ana’e tatou e, ua haamori to’na metua tane i te mau idolo. I to’na apîraa, ua ti’a paari oia no te parau ti’a, e ua fatata oia i te taparahi-pohe-hia ei tusia (A hi’o Aberahama 1:2–7).
Iosepha no Aiphiti
17 matahiti to’na a hoo atu ai to’na mau tuaana ia’na ei tîtî, are’a râ, na roto i te mau haamaitairaa a te Fatu, ua ti’a ia Iosepha ia haamahuta mai i te hoê ohipa maitai i roto i teie huru fifi. Aita oia i pau, no te mea aita roa oia i faaru’e. Ua vai tamau noa to’na ti’aturi i te Fatu. Ua itehia te faito rahi o roto ia Iosepha i te huru no to’na faaoreraa i te ohipa ti’a ore i ravehia i ni’a ia’na (A hi’o Genese 37 ; 45).
Davida
I to’na apîraa e tia’i mamoe ta Davida ohipa, e ua aro oia i te pea e i te liona no te paruru i te mamoe a to’na metua tane. Aita to’na ti’aturi ia’na iho i tupu mai na roto i to’na aravihi i te ohipa tia’i mamoe ; ua tae mai râ na roto i to’na faaroo i te Metua i te ao ra, mai tei faaitehia i roto i ta’na aroraa ia Toria (A hi’o 1 Samuela 17:32–54).
Esetera
Ua faaoti papû roa oia ia tuu i to’na oraraa i roto i te fifi no te faaora i to’na mau taata. E ere na te nehenehe o Esetera, na to’na râ mau huru i te pae varua i faariro ia’na ei taata rahi (A hi’o Esetera 4–5).
Daniela
Faahoho’araa na Andrew Bosley
Ua haapa’o oia i te ture a te Fatu no ni’a i te ea, noa’tu e, aita te mau taata ati a’e ia’na e haapa’o ra. Ua pure oia, noa’tu e, ua riro te pureraa i te Metua i te ao ra ei pato’iraa i te mau ture a te arii. No to’na parau ti’a e to’na aau matara noa i te faaûruraa a te Varua, ua haamaitai te Fatu ia Daniela ma te horo’a ia’na i te horo’a o te tatararaa i te mau taoto e te mau orama. Ua farii oia i te mana e te paari no ô mai i te Metua i te Ao ra ra, ia ti’a ho’i ia’na ia farii i te mau mana o te ra’i i te taime fifi (A hi’o Daniela 1:6).
Nephi
Ua riro o Nephi ei hi’oraa faatupu maere a parau ai oia e, « E haere atu vau, e rave ho’i i te mau mea ta te Fatu i faaue maira » (1 Nephi 3:7). Tei roto ia’na te itoito no te rave i te mea i anihia ia’na ia rave. Ua ora anei oia i roto i te hoê fare maitai ? Aita, ua ora râ oia i roto i te medebara e rave rahi matahiti. Ua maitai anei te mau ohipa no’na ? Aita, pinepine to’na mau taea’e i te riri ia’na, e i te tahi mau taime, ua tamata i te taparahi pohe ia’na. Na roto i te mau mea atoa, ua haapa’o oia i te mau faaueraa a te Fatu.
Na feia apî ati Amoni e piti tauasini
Ua paari teie feia apî tamaroa i piha’i iho i na metua haapa’o maitai, e na to ratou faaroo i te mau parau a to ratou mau metua vahine i haamaitai ia ratou. Ua haapii ratou ia faaroo e ia haapa’o ma te ti’a mau, e i roto i ta ratou mau aroraa aita ratou i feaa e paruru mai to ratou Metua i te ao ra ia ratou (A hi’o Alama 56:45–48).
Moromona
I te 15raa o to’na matahiti, ua farerei mai te Fatu ia’na no te mea e taata haehaa oia, e te mâ, te viivii ore, noa’tu te ino o te taata ati a’e ia’na. I te 15raa o to’na matahiti, ua faarirohia o Moromona ei faatere no te nuu. I muri a’e, ua riro oia ei tiaau no te mau papa’iraa mo’a (A hi’o Moromona 1–2).
Iosepha Semita
I te 14raa o te matahiti ua imi oia i te mau papa’iraa mo’a e ua pure no te ite e, tei hea te ekalesia e amui atu. Ua pii te Fatu ia’na ia faaho’i faahou mai i te evanelia e i te Ekalesia a Iesu Mesia. Ua horo’a Iosepha i to’na oraraa taatoa no te rave faaoti i taua faaueraa ra, noa’tu te mau pato’iraa e te mau fifi. I te 17raa o to’na matahiti, ua farerei mai te melahi Moroni ia’na, tei faaite mai ia’na i te mau api auro. Noa’tu to’na matahiti apî, ua riro o Iosepha Semita ei orometua haapii puai e ei hi’oraa rahi no te feia ati a’e ia’na (A hi’o Iosepha Semita—Aamu 1).
To outou anotau
Ua hope anei te mau mahana o te feia apî tamaroa e te tamahine maere ? Aita ! Ua parau atu te melahi Moroni ia Iosepha Semita e, ua fatata roa te parau tohu a Ioela i te tupu :
« E ninii atu ai au [te Fatu] i tau varua i ni’a i te taata atoa ; e tohu ho’i ta outou mau tamarii tamaroa e te mau tamahine, e taotootoahia mai to outou mau taata paari, e ite to outou mau taata apî i te orama :
« E ninii atu vau i tau Varua i ni’a i te mau tavini tane e i ni’a i te mau tavini vahine, ia tae i taua anotau ra » (Ioela 2:28–29 ; a hi’o Iosepha Semita—Aamu 1:41).