Te hoê niuniu i te taime tano
Te ora nei te taata papa’i i Taichung, Taiwan.
A paari noa ai au, aita vau i ti’aturi e, te vai ra hoê Atua. I î roa ho’i to’u oraraa i te mau arepurepuraa, e i roto i to’u mau mahana ino roa a’e, ua nava’i roa te faaturumaraa (dépression) no te faatupu i te hinaaro ia hope to’u oraraa. I taua taime ra, te tae atoa mai nei te mau misionare e ua patoto mai i ni’a i to’u opani. O te evanelia mau te mea i hinaarohia e au ; ua ume mai to’u mana’o mai te hoê auri ovahine (aimant) ra te huru.
Aita to’u mau tamataraa i hope i muri a’e i to’u tomoraa mai i roto i te Ekalesia, tera râ, e ti’araa huru maitai a’e to’u no te pato’i i te faahemaraa a te enemi. No te taime matamua, ua ite a’era vau e aha te huru o te oaoa.
Tera râ, aita te faaturumaraa i faaea ohie noa. I te hoê taime, ua feruri au e faaru’e faahou â. I taua taime ra, ua niuniu maira te tuahine Ting, te vahine a te episekopo. Ua parau maira oia ia’u e, ua tupu mai te mana’o i roto ia’na e pii mai ia’u. Ua ui maira oia e, e aha to’u huru. Ua ninii atu vau i to’u aau i mua ia’na. No’u nei, ua riro oia ei melahi tei tonohia mai e te Atua.
Ua riro taua ohipa ra ei haapuairaa ia’u. Ua puai a’era to’u faaroo. Ua mana’o vau e, e ti’a ia’u ia upootia i ni’a i te pohe. Mai te huru e, ua faaorahia vau, mai tei parauhia i roto i te Alama 36:2–3 :
« Tei roto ho’i ratou i te tîtîraa, e aore e taata i ti’a ia’na ia faaora ia ratou, maori râ… te Atua …
« … O te tiaturi i te Atua ra, e faatiahia ïa ratou i to ratou mau ati, e to ratou ahoaho, e to ratou mau pohe, e e faateiteihia ratou i te mahana hopea ra ».
Te vai noa nei â to’u mau tamataraa, tera râ, eita vau e pohe ohie noa faahou. Ua paturu mai te Atua ia’u i roto i to’u mau tamataraa e to’u mau pe’ape’a atoa. Ua faaora Oia ia’u i te tape’araa varua e i te tîtîraa, e i te pohe atoa. O Oia to’u Faaora.