Parau poro’i na te mau tuahine hahaere
Te mau huru hanahana o Iesu Mesia : Ua î i te aroha e te here
A tuatapapa na roto i te pure i teie materia ma te imi ia ite e aha te faa’ite atu. Nahea te maramaramaraa i te huru hanahana o te Faaora e faarahi ai i to outou faaroo Ia’na e e haamaitai ai i te feia ta outou e haapa’o nei na roto i te tere hahaereraa ? No te mau haamaramaramaraa hau atu, a haere i ni’a i te reliefsociety.lds.org.
Te Faaroo, Te Utuafare, Te Totauturu
Te mana o te mau vahine parau-ti’a, na Julie Rogers
Te faaite ra te Buka arata’i no te mau papa’iraa mo’a e, te aroha « o te huru here teitei a’e ïa, te hanahana a’e, te puai a’e » (« Aroha »). O te here mau ïa o Iesu Mesia. A haapii ai tatou no ni’a ia Iesu Mesia e a tautoo ai ia riro mai Ia’na te huru, e haamata ïa tatou i te ite i to’na here mau i roto i to tatou oraraa, e faauruhia tatou ia here ia vetahi ê mai Ta’na e here. « Te aroha o te faaoromairaa ïa i te tahi taata tei faaino ia tatou », te parau ïa a te peresideni Thomas S. Monson. « O te pato’iraa ïa ia inoino ohie noa. O te fariiraa ïa i te mau paruparu e te mau manuïa-ore-raa. O te fariiraa ïa i te taata mai to ratou iho huru mau. O te hioraa ïa i nia’tu i te mau huru rapae i te mau maitai o te ore roa e mohimohi na roto i te tau. O te patoiraa ïa ia tuu ia vetahi ê i roto i te tahi mau faito ».1
I roto i te Buka a Moromona, te haapii nei tatou i te parau mau rahi « e pure atu i te Metua ma te puai hope o te aau ia î [tatou] i teie nei aroha o ta’na i ho mai i te taata atoa e pee mai i ta’na tamaiti ia Iesu Mesia ; ia riro [tatou] ei [mau tamaiti e ei mau tamahine] na te Atua ; e ia fa mai oia ra ua riro tatou mai ia’na ra te huru e ite ho’i tatou ia’na i to’na ra huru mau ; e ia vai maite â teie nei tiairaa i roto ia tatou ; e ia tamâhia ho’i tatou atoa mai ia’na i mâ » (Moroni 7:48).
Te tahi atu mau papa’iraa mo’a
Ioane 13:34–35 ; 1 Korinetia 13:1–13 ; 1 Nephi 11:21–23 ; Etera 12:33–34
No roto mai i to tatou aamu
« Ua mauruuu te hoê tuahine tei riro iho nei ei vahine ivi no te mau tuahine hahaere tei oto e ona e tei tamahanahana ia’na. Ua papa’i oia : ‘Ua hinaaro rahi au i te tahi taata e nehenehe ia’u ia farerei ; te tahi taata o te faaroo mai ia’u. … E ua faaroo raua Ua tamahanahana raua ia’u. Ua ta’i raua e o vau nei. E ua tauahi raua ia’u … [e] ua tauturu ia’u ia haere mai i rapae i te hepohepo e te paruparu o taua mau ava’e matamua ra o te hoê oraraa otahi.’
« Ua haapoto te tahi atu vahine i to’na mau mana’o a farii ai oia i te aroha mau a te hoê tuahine hahaere : ‘Ua ite au e ua hau atu vau i te hoê noa numera i roto i te buka o te mau tuahine ta’na e hahaere. Ua ite au e te mana’ona’o nei oia no’u.’ »2
Mai teie mau tuahine, e rave rahi Feia Mo’a i te mau Mahana Hopea nei na te ao nei e nehenehe e faaite i te parau mau o teie parau a te peresideni Boyd K. Packer (1924–2015), peresideni no te Pŭpŭ no te Tino Ahuru Ma Piti Aposetolo : « Auê te mahanahana ia ite e, noa’tu te vahi e haere atu te [hoê utuafare] e tia’i mai te hoê utuafare no te Ekalesia ia ratou. Mai te mahana e tae atu ai ratou e melo ïa te tane no te hoê pŭpŭ autahuaraa e e riro ïa te vahine ei melo no te Sotaiete Tauturu ».3