Iosepha te hi’o

Na Richard E. Turley Jr., Tauturu papa’i aamu e papa’i parau no te Ekalesia, Robin S. Jensen e o Mark Ashurst-McGee, Tuhaa aamu no te Ekalesia

Te haapapû nei te mau papaa parau nahea i ti’a ai i te peropheta Iosepha ia faaoti i to’na piiraa ei hi’o e ia huri i te Buka a Moromona ?

Joseph Smith, parauhia na David Rogers, ho-mai-hia e te Community of Christ Library-Archives, Independence, Missouri

I te 6 no eperera 1830, te mahana i faati’a ai Iosepha Semita i te Ekalesia a te Mesia (tei parauhia i muri a’e ra te Ekalesia a Iesu Mesia i te Feia Mo’a i te mau Mahana Hopea nei),¹ ua faaite maira oia i te mau parau o te hoê heheuraa i te feia tei haaputuputu mai. Te na ô maira te reo o te Atua, « Inaha, e papa’ihia te hoe papaa parau i rotopu ia outou na ; e i roto i te reira e parauhia oe [Iosepha Semita] ei hi’o » (PH&PF 21:1).

Te tapa’o papû roa a’e no te ohipa a Iosepha Semita ei hi’o i roto i te Ekalesia apî i faati’ahia, o te Buka a Moromona ïa, o ta’na i haapapû tamau maite noa e, ua iritihia « na roto i te horo’a e te mana o te Atua ».² E rave rahi te feia piri roa a’e ia Iosepha i te matahiti hou te faati’araahia te Ekalesia, ua ite ratou i te tereraa ohipa i tae mai ai te Buka a Moromona e ua roaa ia ratou te tahi iteraa i te auraa o te parau ra e hi’o.

Te auraa o te hi’o

E aha te auraa no te parau ra e hi’o no te peropheta i to’na apîraa e no te mau taata o to’na ra anotau ? Ua paari o Iosepha i roto i te hoê utuafare o te tai’o i te Bibilia, tei faahiti tamau noa i te parau no te hi’o. Ei hi’oraa, i roto i te 1 Samuela, te faataa ra te taata papa’i e : « I mutaa ihora, ia haere to Iseraela e ui i te parau i te Atua ra, e na ô ïa, Mai haere i te hi’o a’era : e hi’o ho’i to te peropheta nei i’oa i mutaa ihora » (1 Samuela 9:9).

Te faahiti atoa ra te Bibilia i te parau no te mau taata e farii i te mau faaiteraa varua na roto i te tahi mau tao’a mai te auri,³ te ophi veo i ni’a i te hoê pou (tei riro mai ei tapa’o matarohia no te toro’a rapaau ma’i),⁴ hoê ephoda (hoê tuhaa o te ahu autahu’araa tei ni’a iho e piti ofa’i faufaa rahi),⁵ e te urima e te tumima.⁶

Ua riro te « hi’oraa » e te mau « hi’o » ei tuhaa no te ta’ere Marite e te ta’ere o te utuafare i reira Iosepha Semita i te paariraa. No to ratou ite i te reo o te Bibilia e te tahi ano’iraa o te hiro’a Peretane-Europa tei ta’ita’ihia mai i Amerika Apato’erau e teie feia tei haere mai, ua ti’aturi vetahi i te omuaraa o te tenetere 19 ra e, e ti’a i te tahi mau taata tareni rahi ia « ite » e aore râ, ia farii i te mau iteraa varua, na roto i te tahi mau tao’a mai te mau ofa’i hi’o.⁷

Ua farii o Iosepha Semita tamaiti Ua farii o Iosepha Semita i te reira mau peu mâtau no to’na tau, e tae noa’tu i te mana’o no te faaohiparaa i te mau ofa’i hi’o no te hi’o i te mau tao’a mo’e e aore râ, tei hunania. No te mea ho’i e, ua faaite mai te bibilia e, ua faaohipa te Atua i te mau tao’a no te faatutonu i te faaroo o te taata e aore râ no te paraparau i te pae varua i mutaa iho ra, ua feruri o Iosepha e te tahi atu mau taata e mea na reira atoa ïa i to ratou anotau. Ua haapapû roa mai na metua o Iosepha, oia ho’i Joseph Smith Sr. e Lucy Mack Smith i to raua utuafare peeraa i teie ta’ere e to raua utuafare, na reira atoa te faaohiparaa i te mau tao’a mai teie te huru, e e haere roa mai te mau taata no te mau oire no Palmyra e Manchester, i New York, te vahi e ora ra te utuafare Semita, e farerei ia Iosepha no te imi i te mau tao’a mo’e hou a reva’tu ai oia i Pennsylvanie i te pae hopea o te matahiti 182.⁸

No te feia aore i ite e mea nahea te taata no te tenetere 19 i te vahi o Iosepha i te oraraa i ta ratou haapa’oraa faaroo, e nehenehe te mau ofa’i hi’o ia riro ei ohipa mataro-ore-hia, e ua tau’aparau maoro te feia maramarama no ni’a i teie pu’e tau o to’na oraraa. Ei faahopearaa atoa no te Haamaramaramaraa e aore râ te Anotau o te feruriraa ti’a, e tau ho’i tei tura’i i te parau no te ihi e te mea e ite-mata-hia nei i roto i te ao, i ni’a’tu i te parau o te mau mea pae varua, e rave rahi taata i te anotau o Iosepha tei feruri e, e ohipa tupapa’u e aore râ, e ohipa tano ore ia faaohipa i te mau tao’a mai te ofa’i e aore râ, te auri, i roto i te mau ohipa faaroo.

I te mau matahiti i muri mai, a faaite ai Iosepha i to’na aamu faahiahia, ua haapapû oia i ta’na mau orama e i te tahi atu mau iteraa pae varua.⁹ Are’a te tahi mau hoa tahito to’na, ua tutonu ïa ratou i ni’a i ta’na faaohiparaa i te mau ofa’i hi’o no te faaino i to’na roo i roto i te hoê ao e pato’i rahi noa’tura i taua mau peu ra. I roto i ta ratou mau ohipa pororaa evanelia, ua ma’iti o Iosepha e te tahi atu mau melo matamua eiaha e tutonu i ni’a i te faaheporaa a te peu a te taata i roto i ta ratou ohipa pororaa evanelia, a ite ai te mau hoa o te ekalesia e rave rahi i te hoê tauiraa i roto i te huru o to ratou haro’aro’araa i te parau no te haapa’oraa i roto i te Anotau o te feruriraa ti’a. Tera râ, i roto i te mau mea tei riro mai ei mau heheuraa mana, ua tamau noa o Iosepha i te haapii e, te mau ofa’i hi’o e te tahi atu mau tao’a hi’o, e tae noa’tu te aravihi i te faaohiparaa i te reira, e mau horo’a faufaa ïa e te mo’a no ô mai i te Atua ra.¹⁰

Te mau mauhaa tei faaohipahia no te iriti i te Buka a Moromona

E ite-atoa-hia te parau no te ofa’i hi’o i roto i te mau tuatapaparaa no ni’a ia Iosepa Semita e te iritiraa o te Buka a Moromona. I roto i te aamu mana o Iosepha, tei haamata i te matahiti 1838, te faaitehia ra te parau no te fâraa mai te hoê melahi, tei parauhia o Moroni, tei parau mai ia’na no ni’a i te mau api auro tei hunahia i roto i te hoê aivi tapiri mai. Te faati’a ra Iosepha e, a paraparau noa ai oia i te melahi, « ua iritihia mai te orama » ma te maramarama roa ino i roto i to’na feruriraa, e ua ite roa mai oia « i te vahi » i to’na mata iteraa i te reira (Iosepha Semita—Aamu 1:42).

Ua imi te mau melo o te Ekalesia i roto i te taatoaraa o to’na tuaaai ia haro’aro’a i te aamu matamua o Iosepha Semita e i to’na iteraa e te iritiraa i te mau api auro. Te faaite nei teie hoho’a, tei papa’ihia e C. C. A. Christensen i te matahiti 1886 ra, ia Iosepha Semita i te fariiraa i te mau api mai roto mai i te melahi Moroni.

Te melahi Moroni i te horo’araa i te mau api ia Iosepha Semita ra, na C. C. A. Christensen

I roto i te aamu ta Iosepha i haamata i te papa’i i te matahiti 1838, ua faaara mai o Moroni ia’na e « E tamata Satane i te faahema ia’u (no te huru veve o te utuafare o to’u metua), ia rave au i te mau api auro ei rave’a e roaa mai ai te moni ». Te faati’a ra o Iosepha e, ua opani maira te melahi ma te parau e, mai te mea e, « e opuaraa ê atu » ta’na i te paturaa i te basileia o te Atua, « eita ïa taua mau api ra e tuuhia » i roto i to’na rima (Iosepha Semita—Aamu 1:46). I roto i to’na aamu i te omuaraa o te matahiti 1832, te haapapû ra o Iosepha e, « Ua… imi au i te mau api ia noaa mai te moni e aita vau i haapa’o i te faaueraa ia rotahi noa to’u mata i ni’a i te hanahana o te Atua ».¹¹ Na roto i te reira, ua titauhia maira ia’na ia ho’i i te aivi i te mau matahiti atoa e maha matahiti te maoro e tae roa’tu ua ineine oia no te farii i te mau api (a hi’o Iosepha Semita—Aamu 1:53–54).

Te parau ra o Iosepha e, ia farii a’era oia i te mau api mai roto mai ia Moroni i te matahiti 1827, ua farii atoa oia e piti ofa’i o te faaohipa i roto i te iritiraa i te mau api. Ua papa’i oia e tae noa’tu i te tahi mau taata mâtauhia, i te mau parau no ni’a i teie nau ofa’i, ma te parau e, e huru uouo e aore râ, e huru teatea te reira, tei roto i te hoê fana moni e aore râ, mai te titi’amata te huru, e tei taatihia i ni’a i te hoê paruru ouma.¹² Ia au i te faaiteraa, ua riro teie tao’a no te hi’o ei tao’a huru apiapi. Ua parau te metua vahine o Iosepha Semita e, ua tatara oia i te mau ofa’i mai ni’a mai i te paruru ouma ia ohie te faaohiparaa i te reira.¹³

Te parau ra te Buka a Moromona i teie mau ofa’i e, « te mau iriti parau » ma te haapapû e, « ua haapaohia teie nei mau mea mai te matamua mai â, e ua tuuhia mai ho’i i tera ui i tera ui, ei ravea no te iritiraa i te mau reo eê », e « ua haapaohia â te reira ra, e ua tiaihia â ho’i e te rima o te Fatu » (Mosia 28:14‒15, 20).

Te faati’a atoa ra te buka e mea nahea to te Fatu horo’araa « e piti ofa’i » i te taea’e o Iareda, ma te fafau e, e tauturu te reira i te u’i a muri a’e ia ite i ta’na mau parau. Ua haapii atura te Fatu ia’na, « A papa’i i teie nei mau mea e e tapiri maite, e i to’u iho tau mau e faaite atu ai au i te reira i te tamarii a te taata nei ». Ua haapapû mai te Fatu, na teie nau ofa’i, « e haamaramarama i taua mau mea ta oe e papa’i ra i te mata o te taata » (Etera 3:24, 27).

Tuhaa no te hoê api o te Buka a Moromona matamua tei roto i te reira te revaraa o te utuafare o Lehi mai Ierusalema’tu, tei roto i te 1 Nephi pene 2 i teie mahana. Ua auvaha Iosepha Semita i te Buka a Moromona i mua e rave rahi feia papa’i tae noa’tu ia Olive Kaudere, na’na i papa’i i teie mau reni.

Ho-mai-hia e te Fare vairaa buka aamu a te Ekalesia ; UA HAAMARAMARAMAHIA TE HOHO’A

I te taime a hope ai Iosepha Semita i te haapapa’i i ta’na iritiraa o te buka a Moromona i te mau papa’i parau i te afaraa o te matahiti 1829, ua haamaramaramahia ïa i roto i te papa’iraa te auraa o te hi’o. Te vai ra i roto i te Buka a Moromona te hoê parau tohu tei parauhia na Iosepha no Aiphiti, e te na ô ra e, e riro hoê o to’na huaai—oia ho’i Iosepha Semita—« ei hi’o maitai » o te faaite atu i te tahi atu mau huaai « i te mau faufaa » ta te Atua i fafau i to ratou mau metua ra (2 Nephi 3:6, 7).

I roto i te tahi atu aamu o te Buka a Moromona, te horo’a ra Alama tamaiti i te mau iriti parau i ta’na tamaiti o Helamana. Te a’o nei Alama i ta’na tamaiti e, « e ia haapao atoa ho’i oe i teie nei aveia », oia ho’i teie na ofa’i e piti i roto i te fana moni. Ua faahiti atoa râ Alama i te hoê parau tohu, mai te huru ra e te parau nei te reira no te hoê ofa’i : « E ua parau maira te Fatu, e hamani au i te hoê ofa’i na tau tavini ra na Gazelema, o te anaana mai i roto i te poiri ia maramarama » (Alama 37:21, 23).

Oia mau, noa’tu e, ua papa’ihia « te mau iriti parau » (e mea rahi), te parau nei teie parau tohu no ni’a i te horo’araa i te hoê tavini no amuri a’e « hoê ofa’i » (hoê ana’e). o te anaana mai i roto i te poiri ia maramarama ».¹⁴ Ua ti’aturi te feia mo’a no te mau mahana hopea nei e, teie tavini i tohuhia, o Iosepha Semita ïa.¹⁵

Tera râ, te faaite nei te aamu e, taa ê atu na ofa’i hi’o e piti tei parauhia « e iriti parau », ua faaohipa o Iosepha Semita hoê a’e ofa’i hi’o ê atu a iriti ai oia i te Buka a Moromona, ma te tuu pinepine i te reira i roto i te hoê taupoo no te paruru i te maramarama. I te parauraa a te mau taata o to’na tau, ua na reira oia ia ti’a ia’na ia ite maitai a’e i te mau parau i ni’a i te ofa’i.¹⁶

I te matahiti 1833, ua haamata o Iosepha Semita e to’na mau tauturu i te faaohipa i te parau ra « Urima e Tumima » no roto mai i te Bibilia, no te parau i te mau huru ofa’i atoa e faaohipahia no te farii i te mau heheuraa no te ra’i mai, e tae noa’tu i te mau iriti parau a te ati Nephi e te ofa’i hi’o hoê ra.¹⁷ Na teie mau ta’o papû ore i faataupupu i te mau tamataraa ia faati’a faahou i te rave’a ti’a i iriti ai Iosepha Semita i te Buka a Moromona. Taa ê noa’tu te faaohiparaa i te mau iriti parau, ia au i te parau a Martin Harris, ua faaohipa atoa Iosepha i te hoê o ta’na mau ofa’i hi’o no te faaohieraa i te iritiraa i te Buka a Moromona. Te vai atoa râ te tahi atu mau haapapûraa no ni’a i te tauiraa o Iosepha i te mau mauhaa iritiraa parau.¹⁸

I te otiraa te Buka a Moromona i te nene’ihia

I muri mai i te nene’iraahia te Buka a Moromona i te ava’e mati 1830, ua haamata o Iosepha Semita e to’na mau papa’i parau i te rave i te ohipa i ni’a i te mea e parauhia nei i teie nei e, te iritiraa a Iosepha Semita i te Bibilia, e hi’opo’araa ho’i a te peropheta i te iritiraa a te arii Iakobo.¹⁹ Ia au i te faati’araa a Iosepha, eita e nehenehe e faaohipa i te mau iriti parau a te ati Nephi no teie ohipa iritiraa, no te mea, aita te reira e vai faahou ra ia’na ra.

Te haapapû ra te aamu o Iosepha e, « na roto i te paari o te Atua ua vai maitai noa te reira i roto i to’u nei rima, e tae noa’tu ua oti ia’u te ohipa i titauhia i to’u rima ia rave. E i reira, mai te au i tei opuahia ra, ua tii mai te ve’a i te reira e ua faaho’i au i te reira ia’na ; e tei ia’na ra te vairaa e tae noa mai i teie nei â mahana, oia ho’i, i te 2 no Me, 1828 » (Iosepha Semita—Aamu 1:60).

Mai ta te peresideni Brigham Young (1801–77) i haapapû mai, « ua faaho’i o Iosepha i te Urima e te Tumima e te mau api i te otiraa ta’na iritiraa ».²⁰

No te mau melo e rave rahi tauatini i te tau a ora noa ai oia, e no te rahiraa mirioni mai to’na poheraa, ua itehia o Iosepha ei peropheta, ei hi’o e ei heheu parau.

Joseph Smith, parauhia na David Rogers, ho-mai-hia e te Community of Christ Library-Archives, Independence, Missouri

E ofa’i hi’o atu â ta Iosepha, tera râ, ia au i te mau parau a Elder Orson Pratt (1811–81), hoê melo no te Pŭpŭ no te Tino Ahuru Ma Piti Aposetolo e e papa’i aamu ho’i no te Ekalesia i muri a’e, ua roaa te paari o Iosepha i taua taime ra i roto i to’na iteraa pae varua. I roto i te rururaa no te 28 no tiunu 1874, i amui atoa mai te peresideni Brigham Young e e rave rahi atu â mau Hui mana faatere rahi, ua parau atura o Elder Pratt i to te amuiraa no ni’a « i te mau taime e rave rahi tei reira oia » a iriti ai Iosepha « i te Faufaa Apî ». No to’na ite-ore-raa i te mau mauhaa i faaohipahia i te taime iritiraa, ua maere oia no te aha Iosepha « aita i faaohipa i te Urima e te Tumima, mai tei ravehia i roto i te iritiraa i te Buka a Moromona ».

A hi’o noa ai Elder Pratt i te peropheta ia iriti, « Ua hi’o maira Iosepha, mai te huru e, ua tai’o oia i to’na mau mana’o, e ua haapapû maira e, ua horo’a mai te Fatu ia’na i te Urima e te Tumima i te taime aitâ oia i mâtau roa i te Varua o te faaûruraa. I teie nei râ ua mâtau roa oia i te reira, ua taa ia’na te ohiparaa a taua Varua ra, e aita oia e hinaaro faahou i te tauturu a taua mauhaa ra ».²¹

Ua parau o Brigham Young i mua i te tahi atu mau taata i to’na mau mana’o no ni’a i te fariiraa i te hoê ofa’i hi’o. Ua parau oia e, « Aita vau i ite e, i hinaaro a’enei au ia farii i te hoê ».²² Te faaite nei teie faahitiraa parau a Brigham i to’na ite e, aita i titauhia te ofa’i hi’o no te riroraa ei hi’o.

I te 25 no atopa 1831, ua haere atu o Iosepha Semita i te hoê amuiraa i Orange, Ohio. I roto i te reira amuiraa, ua parau to’na taea’e o Hairamu e, te feruri nei oia e, « e mea maitai a’e e, na Iosepha iho e faaite i te parau faaite no ni’a i te taeraa mai o te buka a Moromona i te mau taea’e peresibutero i tae mai, ia ti’a ia ratou paatoa iho ia ite ». Ia au i te mau minuti o te apooraa, ua « parau o Iosepha e, aita i ferurihia e parau i to te ao i te mau mea atoa i tupu no ni’a i te taeraa mai o te buka a Moromona » e « e ere i te mea titauhia no’na ia faaite i teie mau mea ».²³ Ma te î i te paari i roto i ta’na ohipa ei hi’o, e te ti’aturiraa e, e ere te ofa’i hi’o i te mea faufaa no te heheuraa, peneia’e ua haape’ape’a oia e, o te tutonu rahi roa te taata i ni’a i te huru no te taeraa mai te buka, e iti roa i ni’a i te buka iho.

Te mana’o rahi ta Iosepha Semita i faaite no ni’a i te iritiraa o te Buka a Moromona maori râ, ua rave oia i te reira « na roto i te horo’a e te mana o te Atua ».²⁴ Ua haapii oia i te feia faatere o te Ekalesia e, teie buka, « o te buka afaro roa a’e ïa i te mau Buka atoa i ni’a i te fenua nei e te ofa’i tihi no ta tatou haapa’oraa », e na roto i te hapa’oraa i te mau haapiiraa o te reira, e fatata roa’tu ïa te feia tai’o i te Atua… i te tahi atu huru buka ».²⁵

Te mau nota

1. Hi’o Te Parau Haapiiraa e te Mau Parau Fafau 115.

2. Preface to Book of Mormon, ca. atete 1829, i roto Documents, Volume 1 : July 1828–June 1831, buka 1 of the Documents series of The Joseph Smith Papers (2013), 93. Hi’o atoa « Parau Faa’ite a na Ite Tootoru », Buka a Moromona.

3. Hi’o Exodo 4:1‒5, 17, 20‒21 ; 7:8‒21 ; 8:16‒19 ; 9:22‒26 ; 10:12‒15 ; 14:15‒18 ; 17:1‒13 ; Numera 17:1‒10 ; 20:7‒11 ; Hebera 9:4.

4. Hi’o Numera 21:7‒9 ; Ioane 3:14‒15.

5. Hi’o Exodo 28:12 ; 35:9, 27 ; 1 Samuela 23:9‒12 ; 30:7‒8.

6. Hi’o Exodo 28:30 ; Levitiko 8:8 ; Numera 27:21 ; Deuteronomi 33:8 ; 1 Samuela 28:6 ; Ezera 2:63 ; Nehemia 7:65.

7. No te mau haamaramaramaraa hau atu no ni’a i teie ta’ere haapa’oraa faaroo no te tenetere 19, a hi’o Journals, Volume 1 : 1832–1839, buka 1 of the Journals series o te The Joseph Smith Papers (2008), xix ; e Revelations and Translations, Volume 3 : Printer’s Manuscript of the Book of Mormon, buka 3 of the Revelations and Translations series of The Joseph Smith Papers (2015), xv–xvi ; Dallin H. Oaks, « Recent Events Involving Church History and Forged Documents », Ensign, atopa 1987, 68–69.

8. A hi’o i te faahitiraa parau a Joseph Smith Sr., mai tei faahitihia i roto i te Francis W. Kirkham, A New Witness for Christ in America : The Book of Mormon, buka 2 (1959), 366 ; hi’o atoa Lucy Mack Smith, « Lucy Mack Smith, History, 1844–1845 », book 3, api 10, josephsmithpapers.org/paperSummarylucy-mack-smith-history-1844-1845. Te haamana’o ra o Martin Harris i te tamataraa i te aravihi o Iosepha na roto i te aniraa ia’na ia imi i te hoê pine i roto i te ruru aihere (hi’o « Mormonism—No. II », Tiffany’s Monthly, tiurai 1859, 164).

9. Ei hi’oraa, a hi’o, Iosepha Semita—Aamu i roto i te Buka Poe Tao’a Rahi.

10. Hi’o i Te Parau Haapiiraa e te Mau Parau Fafau 130:10‒11. Hi’o atoa i te mau parau matamua o ta tatou e parau nei i teie nei e Te Parau Haapiiraa e te Mau Parau Fafau 8, e parau no Oliver Cowdery no to’na hinaaro ia tauturu ia Iosepha Semita i roto i te iritiraa i te Buka a Moromona (Heheuraa, Eperera 1829–B, i roto Documents, Volume 1 : July 1828–June 1831, 44–47).

11. Joseph Smith, « History, ca. Summer 1832 », i roto Histories, Volume 1 : 1832–1844, buka 1 of the Histories series of The Joseph Smith Papers (2012), 14.

12. Hi’o Iosepha Semita—Aamu 1:35 ; Joseph Smith, « Church History », i roto Histories, Volume 1 : 1832–1844, 495 ; Martin Harris, i roto « Mormonism—No. II », 165–66 ; « Lucy Mack Smith, History, 1844–1845 », buka 5, api 7–8, josephsmithpapers.org.

13. Ei hi’oraa, a hi’o, « Lucy Mack Smith, History, 1844–1845 », buka 5, josephsmithpapers.org.

14. Ua haafifi rii teie parau taa ê i te feia matutu. Ei hi’oraa, a hi’o, Bruce R. McConkie, Mormon Doctrine, 2raa o te nene’iraa (1966), 307–8 ; Joseph Fielding McConkie and Robert L. Millet, Doctrinal Commentary on the Book of Mormon, 4 buka (1987–92), 3:278 ; e Matthew B. Brown, All Things Restored : Confirming the Authenticity of LDS Beliefs (2000), 62.

15. Hi’o William W. Phelps, Funeral Sermon of Joseph and Hyrum Smith, Fare Haaputuraa Aamu o te Ekalesia, Roto Miti ; Orson Pratt, « Explanation of Substituted Names in the Covenants », The Seer, mati 1854, 229 ; William W. Phelps, letter to Brigham Young, 10 no eperera 1854, i roto Brigham Young, Office Files, 1832–1878, e Revelations and Translations, Volume 2 : Published Revelations, buka 2 of the Revelations and Translations series of The Joseph Smith Papers (2011), 708–9.

16. No te mau haamaramaramaraa hau atu no ni’a i te iritiraa, a hi’o « Book of Mormon Translation », te vai ra i ni’a i te lds.org/topics/book-of-mormon-translation. Hi’o atoa Russell M. Nelson, « A Treasured Testament », Ensign, tiurai 1993, 61–65 ; Neal A. Maxwell, « By the Gift and Power of God », Ensign, tenuare 1997, 36–41.

17. Ei hi’oraa, ua pii o Wilford Woodruff i te hoê ofa’i hi’o ta’na i ite i Navu, ei Urima e e Tumima (Wilford Woodruff journal, 27 no titema 1841, Fare vairaa buka aamu a te Ekalesia). Hi’o atoa Revelations and Translations, Volume 3 : Printer’s Manuscript of the Book of Mormon, xix.

18. Hi’o Revelations and Translations, Volume 3 : Printer’s Manuscript of the Book of Mormon, xviii–xix.

19. Ei haapotoraa no te mau omuaraa o teie ohipa, a hi’o Documents, Volume 1 : July 1828–June 1831, 150–52.

20. Minuti, 17 no eperera 1853, Fare vairaa buka aamu a te Ekalesia.

21. « E piti mahana putuputuraa i Brigham City, 27 e 28 no tiunu 1874 », Millennial Star, 11 no atete 1874, 498–99.

22. Minuti, 30 no setepa 1855, Fare vairaa buka aamu a te Ekalesia.

23. Minuti, 25–26 no atopa 1831, i roto i Documents, Volume 2 : July 1831–January 1833, buka 2 of the Documents series of The Joseph Smith Papers (2013), 84.

24. Omuaraa parau no te Buka a Moromona, ca. atete 1829, i roto i Documents, Volume 1 : July 1828–June 1831, 93. Hi’o atoa i te « Parau Faa’ite a na Ite Tootoru », Buka a Moromona.

25. Iosepha Semita, i roto i te buka aamu o Wilford Woodruff, 28 no novema 1841, Fare vairaa buka aamu a te Ekalesia ; e aore râ omuaraa no te Buka a Moromona.

26. David Whitmer, An Address to All Believers in Christ (1887), 32.

27. No te mau haamaramaramaraa no ni’a i te ho’i-faahou-raa mai Oliver Cowdery’s i roto i te Ekalesia hou to’na poheraa, a hi’o Scott F. Faulring, « The Return of Oliver Cowdery », i roto John W. Welch e o Larry E. Morris, eds., Oliver Cowdery : Scribe, Elder, Witness (2006), 321–62.

28. Hi’o i te mau minuti, 30 no setepa 1855, Fare vairaa buka aamu a te Ekalesia, Salt Lake City ; « David Whitmer », The Historical Record, atopa 1888, 623 ; Maria L. Cowdery Johnson ia David Whitmer, 24 no tenuare 1887, Community of Christ Library-Archives, Independence, Missouri ; e Franklin D. Richards, Journal, 9 no mati 1882, Fare vairaa buka aamu a te Ekalesia.

29. Minuti, 17 no eperera 1853, Fare vairaa buka aamu a te Ekalesia.

30. Minuti 30 no setepa 1855, Fare vairaa buka aamu a te Ekalesia.

31. Hi’o Zina Young ia Franklin D. Richards, 31 no tiurai 31, 1896, i roto Journal History of The Church of Jesus Christ of Latter-day Saints, 31 no tiurai 1896, 4, Fare vairaa buka aamu a te Ekalesia.

32. Hi’o B. H. Roberts, A Comprehensive History of the Church, 6:230–31 ; Joseph Fielding Smith, Doctrines of Salvation, comp. Bruce R. McConkie, 3 buka (1954–56), 3:225 ; Bruce R. McConkie, Mormon Doctrine, 2raa o te nene’iraa (1966), 818–19.

E aha tei tupu i ni’a i te ofa’i hi’o ?

Te ofa’i e faahoho’ahia nei i ô nei, o te ofa’i ïa tei apiti-maoro-hia ia Iosepha Semita e te iritiraa o te Buka a Moromona. Te ofa’i ta Iosepha Semita i faaohipa i roto i te iritiraa o te Buka a Moromona, pinepine ïa i te parauhia e, e ofa’i û totora e te hoho’a potaa. Mai ia Iosepha Semita, ua haere atu teie ofa’i ia Oilive Kaudere ra e i muri iho i te Ekalesia ra na roto ia Brigham Young e vetahi ê.

Hoho’a na Welden C. Andersen e o Richard E. Turley Jr.

Ia au i te aamu o Iosepha Semita, ua faaho’i oia i te Urima e te Tumima, e aore râ, te mau « iriti parau » a te ati Nephi, i te melahi ra. Tera râ, e aha tei tupu i ni’a i te tahi atu ofa’i hi’o e aore râ te mau ofa’i ta Iosepha i faaohipa i roto i te iritiraa o te Buka a Moromona ?

Ua papa’i o David Whitmer e « Ia hope te iritiraa o te Buka a Moromona, i te omuaraa o te pu’e tau faatupuraa raau o te matahiti 1830, hou te 6 no eperera, ua horo’a o Iosepha i te ofa’i ia Olive Kaudere ra, e ua parau mai oia ia’u e i te tahi atu e, ua oti ta’na faaohiparaa i te reira, eita oia e faaohipa faahou i te ofa’i ».²⁶

Ua vai o Olive Kaudere i rapae i te Ekalesia hoê ahuru matahiti te maoro e ua bapetizo-faahou-hia i te matahiti 1848. Ua opua oia e haere i te pae tooa o te râ i piha’i iho i te Feia Mo’a i Utaha, tera râ ua pohe oia i te matahiti 1850 i Richmond, Missouri, hou a reva ai.²⁷ Ua farii o Phineas Young, oia tei tauturu i te faaho’iraa mai ia Olive Kaudere i roto i te Ekalesia, i te ofa’i hi’o mai roto mai i te vahine ivi a Olive, e tuahine no David Whitmer, o Elizabeth Ann Whitmer Cowdery. E ua horo’a o Phineas i te reira i to’na taea’e o Brigham Young.²⁸

Phineas Young, o te parahi nei i ropu i te mau taea’e Young e i te pae aui o Brigham Young, ua farii oia i te hoê ofa’i hi’o tei faaohipahia i roto i te iritiraa o te Buka a Moromona, mai roto mai ia Olive Kaudere, e ua horoa’tu i te reira i to’na taea’e Brigham.

Hoho’a circa 1866, tei ho-mai-hia e te Fare Aamu o te Ekalesia

« Tei ia’u nei te ofa’i hi’o matamua a Iosepha tei roaa mai ia’u mai roto mai ia Olive Kaudere », te faaiteraa ïa a te Peresideni Young i te matahiti 1853. Te vai faahou ra te tahi atu. Ua parau atoa oia e, « E 3 ofa’i ta Iosepha tei ia Emma ra, e 2 mea na’ina’i e 1 ofa’i rahi ».²⁹ E piti matahiti i muri mai, ua parau o Brigham Young i te hoê pupu feia faatere o te Ekalesia tei haaputuputu mai e, « ua hapono mai o Olive ia’u nei i te ofa’i hi’o matamua a Iosepha, ta Olive i tape’a noa e tae roa’tu i te taime a hapono mai ai oia ia’u nei ».³⁰

I muri a’e i te poheraa o Brigham Young, ua farii hoê o ta’na mau vahine, o Zina D. H. Young, tei riro mai i muri a’e ra, te toru o te peresideni rahi o te Sotaiete Tauturu, i te hoê ofa’i hi’o û totora tei fatuhia e a’na, e tei hoho’a roa i te ofa’i i faaohipahia e Iosepha no te iriti i te Buka a Moromona, e ua horo’a oia i te reira i te Ekalesia ra.³¹ Mai taua taime ra, ua farii te tahi atu mau ti’a faatere o te Ekalesia e, o te Ekalesia te fatu mau o te reira ofa’i hi’o.³²

Faahoho’araa i te faanahoraa o te iritiraa parau

A tere noa ai te tau, ua tamata te mau rima’ihi ia hamani i te hoho’a o te ohipa iritiraa i te Buka a Moromona, ma te faaite i te mau taata ohipa i roto i te mau hoho’a rau e te mau tauhaa taa ê. Ua faatumuhia te mau faahoho’araa rima’ihi tata’itahi i ni’a i te hi’oraa, te ma’imiraa e te feruriraa o te rima’ihi tata’ihoê, ma te tauturuhia i te tahi taime na te mau mana’o e te arata’iraa a te tahi atu mau taata. Teie te tahi pae o te reira mau hoho’a tei hamanihia i te roaraa o te mau matahiti.

Te faahoho’araa a te rima’ihi ia Iosepna Semita te tuatapapa ra i te mau api. Ua haamana’o o Iosepha e, ua « papa’i oia e rave rahi » mau parau mai roto mai i te mau api. Ia hope ta’na iritiraa i teie mau parau « na roto i te Urima e te Tumima », ua afa’i o Martin Harris i te mau parau ia Charles Anthon ra e i te tahi atu mau aivanaa no te haapapû i te iritiraa (Iosepha Semita—Aamu 1:62–64).

Na roto i te horo’a e te mana o te Atua, na Simon Dewey, ho-mai-hia e te Altus Fine Arts

Te hoho’a a te hoê rima’ihi no Iosepha Semita e o Olive Kaudere te rave ra i te ohipa i roto i te iritiraa i te Buka a Moromona. Taa ê atu i tei faahoho’ahia i ô nei, ua parau o Olive Kaudere e, aita oia i ite i te mau api e tae roa’tu i te taime ua oti te iritiraa. Ua faaite te mau ite o teie ohipa e, i roto i te taime iritiraa, ua paruruhia te mau api eiaha te taata ia ite, mai te huru e, ua tapo’ihia i te hoê ahu.

Te iriti nei Iosepha Semita i te Buka a Moromona na Del Parson

Te faahoho’araa a te rima’ihi ia Iosepha Semita te iriti ra ma te paruru ouma e te mau iriti parau e aore râ te mau titi’a mata, tei parauhia i muri a’e ra te Urima e te Tumima.

Faahoho’araa na Robert T. Barrett

Te faahoho’araa a te rima’ihi ia Iosepha Semita e te hoê papa’i parau te iriti ra ma te tuuhia hoê ahu taoto i ropu ia raua. Noa’tu e, aita hoê faahitiraa no ni’a i te ahu taoto i roto i te rahiraa o te mau faaiteraa o te ohipa iritiraa, mai te mea ra e, ua faaohipahia te hoê ahu taoto i te omuaraa no te paruru i te mau api, te mau titi’a mata e aore râ, te paruru ouma, eiaha te taata ia ite. I te pae hopea o te ohipa iritiraa, e riro e, ua faaohipahia te hoê ahu taoto no te paruru i te taata iriti e i te taata papa’i eiaha te taata ia haere mai e hi’ohi’o i te iritiraa.

Iritiraa o te mau api, na Earl Jones, ho-mai-hia e te Fare Manaha no te Aamu o te Ekalesia

Ua ora o Iosepha e ta’na vahine, Emma Hale Smith, i roto i teie tuhaa otahi o teie fare i te hoê pae o te iritiraa o te Buka a Moromona. Na tuhaa e piti i te pae atau o te fare, no muri a’e ïa i te hamaniraahia mai.

Ho-mai-hia e te Fare vairaa buka aamu a te Ekalesia

Tuhaa no te hoê api o te Buka a Moromona matamua tei roto i te reira te revaraa o te utuafare o Lehi mai Ierusalema’tu, tei roto i te 1 Nephi pene 2 i teie mahana. Ua auvaha Iosepha Semita i te Buka a Moromona i mua e rave rahi feia papa’i tae noa’tu ia Olive Kaudere, na’na i papa’i i teie mau reni.

Ho-mai-hia e te Fare vairaa buka aamu a te Ekalesia ; UA HAAMARAMARAMAHIA TE HOHO’A

Ua imi te mau melo o te Ekalesia i roto i te taatoaraa o to’na tuaaai ia haro’aro’a i te aamu matamua o Iosepha Semita e i to’na iteraa e te iritiraa i te mau api auro. Te faaite nei teie hoho’a, tei papa’ihia e C. C. A. Christensen i te matahiti 1886 ra, ia Iosepha Semita i te fariiraa i te mau api mai roto mai i te melahi Moroni.

Te melahi Moroni i te horo’araa i te mau api ia Iosepha Semita ra, na C. C. A. Christensen

I te matahiti 1883, ua faaite papû Te Contributor, te hoê ve’a nene’ihia e te Ekalesia, i na ite tootoru o te Buka a Moromona. Ua haafaufaa maoro te Feia Mo’a i te mau Mahana Hopea nei i te ohipa faufaa ta te taata tata’itahi i rave no te tauturu ia Iosepha Semita i te iritiraa e i te nene’iraa i te Buka a Moromona.

Ho-mai-hia e te Fare vairaa buka aamu a te Ekalesia