Te mau mana’o no te pureraa pô utuafare

I roto i teie ve’a te vai nei te mau parau papa’i e te mau ohiparaa o te nehenehe e faaohipahia no te pureraa pô utuafare. Teie e piti hi’oraa

« Te faahanahanaraa i te pô utuafare », api 26 : noa’tu e, aore hoê hepetoma i mo’ehia ia outou, e aore ra o teie ta outou tamataraa matamua, a feruri ia faatupu i te hoê pô utuafare taa’e ei faahanahanaraa i te pô utuafare ! E nehenehe ta outou e tai’o i te papa’iraa no te hi’o i te huru o te oaoa o te mau utuafare na te ao nei ia rave i te taime no te parahi i piha’i iho i te tahi e te tahi, a haapii ai i te evanelia. A feruri ia aparau e nahea outou i te faaoti i ta outou opuaraa no te faatupu i te pô utuafare. Nahea e ti’a ai ia outou ia faaau i te reira i te mau hinaaro o te utuafare ? E ti’a ia outou ei utuafare ia fafau faahou ia faariro i teie peu 100 matahiti ei ohipa matamua i roto i to outou iho utuafare, noa’tu te huru o to outou oraraa.

Faahoho’araa na Mark Robison

« Imiraa i te tauturu », api 72 : A feruri ia tai’o amui te utuafare i te papa’iraa e i muri iho a aparau i te mau uiraa i muri nei :(1) Eaha te huru hoho’a e aore ra, te haaparareraa a te ve’a e ti’a i te mau tamarii ia mataitai ? (2) Eaha te mau hoho’a e ere i mea maitai no tatou ia hi’o e aore ra, ia faatumu i ni’a iho ? (3) Eaha te ti’a i te taata tata’itahi ia rave mai te mea e, te hi’o ra e aore ra te faaroo ra ratou i te hoê mea ta ratou i ite e, eita e ti’a ia ratou ia na reira ? A aparau i te mau rave’a no roto mai i te « Oh aita ! I teie nei eaha ? » i ni’a i te api 74 mai te mea e, e hinaaro outou i te tauturu no ni’a i te mau mana’o (faaatearaa i te hoê ohipa, paraparauraa i te mau metua, raveraa i te ohipa taviniraa, e te vai atura).