Te uiuiraa mana’o
Mautini e aore ra, e poha ?
Te ora nei te taata papaʻi i Utaha, HAM.
I te tahi taime aita e ma’itiraa hape. E ma’itiraa noa.
Faahoho’araa na Carolyn Vibbert
Ua maere roa to’u metua tane ia ite e, ua faaoti te mau huero mautini ta’na i tanu i te matahiti i ma’iri a’e nei ia ua’a mai i ropu i te mau poha i teie pu’e tau mahanahana. Ua tupu maitai te mau poha—tera râ hoê â atoa ïa e, te mau mautini. No te maitai, ua hinaaro to’u metua tane ia vaiiho noa i te mau tumu mautini ia tupu tamau noa. Tera râ, ua ite oia e, mai te mea e vaiiho oia mai te reira, e tupohe ïa te mautini i tupu o te poha.
No reira, ua titauhia ia’na ia rave i te hoê ma’itiraa. Ua nehenehe ta’na e hutihuti i te mautini, fana’o rahi a’e ïa to te mau poha ia tupu e aore ra, a vaiiho noa i te mautini ia tupu noa na e a hi’o ia ratou ia faaaihere roa i te mau tumu poha, e na te reira e horo’a mai i te hotu iti no na maa toopiti. Mautini e aore ra, e poha ? E ma’itiraa teie i ropu e piti na hi’oraa maitai.
A faaito maitai ai oia i na mea toopiti nei, ua faaoti a’era to’u metua tane e hutihuti i te tumu mautini. Aita te reira i faataere noa i te oteo mai, ua faaoti râ oia e, e hinaaro oia i te mau poha i faanahohia hau atu i ta’na i hinaaro i te mau mautini faahitimahuta.
Na teie haapiiraa i faaite mai ia’u ia feruri i te mau ma’itiraa ta tatou e rave, i roto hoa râ i to tatou mau autaatiraa e o vetahi ê. I ni’a anei i to tatou utuafare, to tatou mau hoa, to tatou anei fatu ohipa, e aore ra, te taata anei ta tatou e haamatau ra e aore ra e faaipoipo, ia vai ana’e te ma’itiraa i ropu e piti na mea maitai, e ere ïa i te mea ohie te iteraa i te ma’itiraa ti’a e aore ra ma’itiraa maitai a’e, mai te mea hoa râ e, e hinaaro tatou e haapae i te rave i te mau ma’itiraa hape. No to tatou mata’u i te rave i te ma’itiraa hape, na te reira e tape’a roa ia tatou eiaha ia haere i mua i roto i te faaroo. Tera râ, te parau mau, maori râ, i te tahi taime, aita e ma’itiraa hape. E ma’itiraa noa. I roto i te h’ioraa o to’u metua tane, ua haamau oia i ta’na faaotiraa i ni’a i te mea faufaa roa a’e. E mea au ore roa na’na ia ite i te mau mautini ia pohe, tera râ, ua ite oia e, e tatarahapa oia i te ino ta ratou e rave i ni’a i te poha i muri a’e ra.
I roto i te oraraa, te vai ra te tahi mau ma’itiraa ta tatou e farerei nei, aita ïa e fifi, mai te huru e, eaha te maa ta’u e amu no te tamaaraa i te po’ipo’i ? Eaha te û o te ahu ta’u e oomo i teie mahana ? Ia farerei ana’e tatou i te hoê ma’itiraa i ropu e piti na mea maitai, e ti’a paha ia tatou ia rave mai ta to’u metua tane i rave e ia ui ohie noa e, « Eaha ta’u e haafaufaa hau atu ? » I muri iho a rave i te hoê faaotiraa, e a haere i mua ma te faaroo, ma te ti’aturi i te Fatu no te faaafaro ia tatou mai te mea e, ua hape rii tatou.
Tera râ, e faufaa rahi to te tahi mau ma’itiraa. Ua parau te peresideni Thomas S. Monson, « e vai tamau noa te mau faaotiraa i mua ia tatou. No te rave i te reira mau faaotiraa ma te paari, e titauhia te itoito—te itoito i te parauraa, aita, te itoito i te parauraa e. E faataa mau te mau faaotiraa i te tapaeraa hopea » (« Na Ture e Toru no te Ma’itiraa » Liahona, nov. 2010, 68). Ia farerei ana’e tatou i teie huru ma’itiraa, teie te hoê uiraa maitai a’e no te ui, « eaha ta te Fatu e haafaufaa rahi a’e ? » Mai te mea e, ua ite tatou i te pahonoraa i taua uiraa ra, te ohipa e titauhia ia tatou, o te ana’iraa ïa i ta tatou mau faufaa i ni’a i Ta’na e i muri iho, e haapa’o i te reira ma’itiraa. E riro te reira ei ma’itiraa ti’a i te mau taime atoa.