Tikōt in Baak Eo
Rijeje eo ej jokwe ilo Baja California, Mexico.
Fátima!
Kōmeļeļe jān BRian Beach
Iaar etal im alooj pija ippān jet m̧ōtta jān kabun̄ in. Ke kōmij deļo̧n̄e mall eo, kōm̧ ar bōk juon tikōt kōn jikin baak eo. Ālkin an jem̧ļo̧k pija eo, kōm ar kile ke ejako tikōt eo. Ilo jinoin kōm ar ļōmņak bwe kōm naaj kōļļāik tikōt eo, ak ejjeļo̧k iaam̧ ewōr an 180 pesos n̄an kōļļāiki.
Jekjek eo ilo am jab maron̄ kōļļāiki wōnāān baak eo kar likūt wōt wa eo ilo mall eo bwe ren atōke, eo me enaaj lukkuun ļapļo̧k wōnāān. Būrom̧ōj eaar itok ioon ro m̧ōtta, eļaptata eo ej kattōr kōnke wa eo ej waan jemān. Iaar diwōj nam̧ōj ļo̧k im jar. Iaar kajjitōk ippān Jemedwōj Ilan̄ kōn aolep aō tōmak im ettā bwe En letok n̄an kōm juon iaļ n̄an mejaļ būrabōļam̧ eo am im ro̧o̧l ilo aenōm̧m̧an n̄an kapijuknen ko am. Ijamin naaj meļo̧kļo̧k ta eo eaar waļo̧k jejjo jekōn ālkin aō kōjem̧ļo̧k jar eo aō.
Ke ij ro̧o̧l ļo̧k iturin wa eo, juon armej iturū ekar kūr eta. Eaar Francisco, juon m̧ōtta jān high school. Eaar kajjitōk ta eo ij kōm̧m̧ane, im iaar jiron̄ ļo̧k e ta eo eaar waļo̧k. Ilo ejjeļo̧k āliklik, eaar kwaļo̧k waļļet eo an im kar letok ebwe jāān n̄an kōļļāiki tikōt eo ejako. Kain jouj in eaar juon uwaak eo em̧ōkaj n̄an kajjitōk ko aō n̄an Jemedwōj Ilan̄.
Francisco emaron̄ jab jeļā jon̄an jipan̄ eo an, ak ijeļā ke inaaj lukkuun kam̧m̧oolol kake ilo aolepān mour eo aō.
Jet iien Jemedwōj Ilan̄ ej uwaaki jar ko ilo kabwilōn̄lōn̄, ak jide ejjab jerbal. Jemedwōj Ilan̄ im Jisōs Kraist relukkuun jeļā kajjied im rej letok tōl n̄an kōj ilo mour ko ad.
Ijeļā bwe n̄e jej mour jim̧we, jej m̧ōņōņō kōn kōjeraam̧m̧an ko me Jemedwōj Ilan̄ wōt emaron̄ litoki n̄an kōj, ekoba kallim̧ur eo An n̄an kōj bwe “n̄e [jej] kōm̧m̧ani men kein, naaj kotak [kōj] ilo raan eo āliktata” (Alma 37:37).